الەم تانىعان اسەم مەيرام

مەملەكەت باسشىسى نۇرسۇلتان نازارباەۆ “قازاقستان” ورتالىق كونتسەرت زالىندا ناۋرىز مەيرامىنا ارنالىپ ۇيىمداستىرىلعان مەرەكەلىك كونتسەرتتى تاماشالاپ, كونتسەرت باستالماس بۇرىن جينالعان قاۋىمعا جانە بارشا قازاقستاندىقتارعا ارناپ مەرەكەلىك قۇتتىقتاۋ ءسوز سويلەدى. “وسىدان 19 جىل بۇرىن ەگە­مەن­دىك الماي تۇرىپ, 1991 جىلى 15 ناۋ­رىزدا مەنىڭ ارنايى جارلى­عىم­مەن ناۋرىز مەيرامى رەسمي مە­رەكە بولىپ جاريالانعانى ەستە­رى­ڭىزدە بولار. سوندا “ەسكى جىل ەسىركە, جاڭا جىل جارىلقا” دەپ ءتى­لە­دىك, جاڭا جىلعا ءۇمىت ارتىپ, بو­لاشاقتان جاقسىلىق كۇتتىك. تىلە­گىمىز قابىل بولىپ, ءبىز سول جىلى اتا-بابامىز عاسىرلار بويى ارمان­داعان ازاتتىققا, كيەلى تاۋەلسىزدىككە قول جەتكىزدىك”, دەپ اتاپ ءوتتى ەلبا­سى ءوز سوزىندە. ءتول مەرەكەسىن زارىعا كۇتكەن حالقىمەن قايتا قاۋىشقان ناۋرىزبەن بىرگە تاۋەلسىزدىگىمىزدىڭ تامىلجىعان سىرلى تاڭى اتتى. قازاق ەلىنىڭ ەركىن تىنىستاۋى دا ناۋرىزبەن بىرگە كەلگەندەي. ەندى مىنە, الەمدىك ساياساتتا قازاقستان شوق­تىعى بيىكتەگەن تۇستا يۋنەسكو ناۋرىز مەيرامىن ادامزات بالاسىنىڭ مادەني مۇراسى ساناتىنا قوستى. بيىل بىرىككەن ۇلتتار ۇيىمى تاراپىنان ناۋرىز مەرەكەسى حالىقارالىق مەيرام رەتىندە قابىلداندى. جاڭارعان, جاسارعان ناۋرىز دالا مەن قالاعا كوكتەم تىنىسىن اكەلدى. العاش رەت ساحناسىنىڭ تورىنە ونەر مايتالماندارىن تاۋەلسىزدىك مەرەكەسىندە شىعارعان “قازاقستان” ورتالىق كونتسەرت زالىنداعى وسى جولعى كونتسەرتتىڭ سالماعى تىم قوماقتى كورىندى. “ناۋرىز نۇرى” دەگەن اتاۋمەن ناعىز جۇلدىزدار شوعىرىن جيناعان كونتسەرتتىك باعدارلامانىڭ شىمىلدىعىن قۇرمانعازى اتىنداعى اكادەميالىق حالىق اسپاپتارى وركەسترى كۇي اتاسىنىڭ “سەرپەرىمەن” سەرپىپ تاستادى. قا­زاقستاننىڭ ەڭبەك ءسى­ڭىر­گەن قايرات­كەرى دۇيسەن ۇكىبايدىڭ ديريجەرلىعىمەن “سەرپەر” سارىنى اياقتالىسىمەن حالقىنىڭ قولپاش­تاپ, ءدۇر ەتكەن شاپالاعىنا قايتا-قايتا باس يگەن كسرو حالىق ءارتىسى, قر مەملەكەتتىك سىيلىعىنىڭ لاۋ­رەاتى ەرمەك سەركەباەۆ شىقتى. “وسىدان بىرنەشە جىل بۇرىن ەل­با­سىمىزعا شەكارا اسىپ شەتەلگە بار­عانىمدا ءبىر كەرەمەت كونتسەرت زالىندا ءان شىرقادىم, الدىمدا دا, ارت جاعىمدا دا, وڭ جاعىم مەن سول جاعىمدا دا جاعالاي ءان تىڭ­داعان جۇرت. سونداي ءبىر عاجايىپ ساراي كوردىم, ونداي كونتسەرت زالى بىزدە قاشان بولادى دەپ ەدىم. مىنە, ارمانداعانىم ءوز ەلىمنەن تابىل­دى”, دەپ قۋانعان ماەسترو ەكى ءان شىر­قادى. ونىڭ ءبىرى – س.مۇحا­مەد­جا­نوۆ­تىڭ “ايسۇلۋ” وپەراسىنان “سەر­كە كاۆانتيناسى” بولسا, ەكىن­شىسى س.ءباي­تەرەكوۆتىڭ ايگىلى “جان دوسىم” ءانى. ساحناعا سىنى كەتپەگەن سىرلى اياقتاي, سۇلۋ جۇزىنە سىڭعىرلاعان ءۇنى كەلىسكەن كسرو حالىق ءارتىسى, قر مەملەكەتتىك سىيلىعىنىڭ لاۋ­رەاتى بيبىگۇل تولەگەنوۆا اپامىز شىعىپ, “گاۋھارتاستى” مارجانداي مولدىرەتىپ توگىلدىرگەن ساتىندەگى حالىق اسەرىن سوزبەن ايتىپ جەتكىزۋ مۇمكىن ەمەس. ونى تەك ءدال وسى ساتتە, ءدال وسى زالدا وتىرىپ تىڭ­داعان جان  عانا سەزىنەتىن بولار. مۇنان سوڭ ۇكىلى ىبىرايدى كوز ال­دىڭا ەلەستەتىپ, ساحناعا قر حا­لىق ءارتىسى قايرات بايبوسىنوۆ كوتە­رىلگەن, ال  قر حالىق ءارتىسى, قر مەملەكەتتىك سىيلىعىنىڭ لاۋ­رەاتى قارشىعا احمەدياروۆ “ەل­با­سى” اتتى ءوز شىعارماسىن ورىن­دادى. حالىق اقىندىعىن تانيتىن مارفۋعا ايتقوجينا “دارا تۇلعا” اتتى ولەڭىنە ءان جازىپتى, ونى قا­زاقستاننىڭ ەڭبەك سىڭىرگەن قايرات­كەرى شاحماردان ءابىلوۆ ورىندادى. ءان اسقاق, ادام جانىنا قايرات جانيتىنداي ءور تۋىندى ەكەن. ناۋرىز نۇرى ساحنا ءتورىن سال­تاناتقا, قۋانىشقا بولەدى. الىبەك دىنىشەۆ, ءجانيا اۋباكىروۆا, عافيز ەسىموۆ, نۇرجامال ۇسەنباەۆا, ەس­كەندىر حاسانعاليەۆ, نۇرعالي ءنۇسىپجانوۆ, ايمان مۇساحودجاەۆا, ناعيما ەسقاليەۆا سىندى قازاق ونەرىنىڭ جارقىراعان جاقۇتتارى بىرىنەن سوڭ ءبىرى ءان شىرقاعان كونتسەرت تاماشاسى تىڭداعان جاندى ءان الەمىنىڭ ايدىنىندا تەربەپ سىرلى اۋەن سازىمەن الديلەي بەردى, الديلەي بەردى. كوڭىلدەرى كوكتەم­دەي, اۋەن سازىنان اسەرگە  بولەنگەن حالىق “ناۋرىز نۇرى” كونتسەرتىنەن تىنى­عىپ, رۋحاني تۇلەپ قايتىپ جاتتى. انار تولەۋحانقىزى.