قر ۇلتتىق ەكونوميكا مينيسترلىگىنىڭ دەرەكتەرى بويىنشا, قازىرگى تاڭدا ەلىمىزدە 18,4 ملن شاماسىندا ادام بار, ولاردىڭ ىشىندە قالا تۇرعىندارى — 10,7 ملن ادام, اۋىل تۇرعىندارى — 7,7 ملن ادام. اۋىل حالقىنىڭ سانى 42% قۇرايدى.
ە. الپىسوۆتىڭ ايتۋىنشا, جاڭا وڭىرلىك ساياساتقا سايكەس وڭىرلەردى دامىتۋدىڭ جاڭا مەملەكەتتىك باعدارلاماسى ازىرلەندى, ول باسقارىلاتىن كەنتتەنۋ ارقىلى حالىقتىڭ تۇرمىس ساپاسىن جاقسارتۋعا جانە وڭىرلەردىڭ ەكونوميكالىق باسەكەگە قابىلەتتىگىن ارتتىرۋعا باعىتتالعان.
«كەنتتەنۋ ماسەلەلەرىمەن قاتار, مەملەكەتتىك باعدارلامادا جاڭا شارالار قاراستىرىلعان. بۇل — «اۋىل – ەل بەسىگى» جوباسىن ىسكە اسىرۋ, ءىرى قالالاردىڭ توڭىرەكتەرىن دامىتۋ جوبالارىن ىسكە اسىرۋ جانە وڭىرلىك ستاندارتتار جۇيەسىن ەنگىزۋ», دەدى ە. الپىسوۆ.
وسى ماقساتقا قول جەتكىزۋ اۋىلدىق ەلدى مەكەندەردىڭ الەۋمەتتىك جانە ينجەنەرلىك ينفراقۇرىلىمىن دامىتۋعا قاراجات ءبولۋ, اۋىل تۇرعىندارىنىڭ قابىلدانعان وڭىرلىك ستاندارتتارعا سايكەس الەۋمەتتىك يگىلىكتەر مەن قىزمەتتەرگە قولجەتىمدىلىگىن قامتاماسىز ەتۋ ارقىلى جۇزەگە اسىرىلادى.
ە. الپىسوۆتىڭ ايتۋىنشا, الداعى ءۇش جىلدا «اۋىل – ەل بەسىگى» جوباسىنىڭ ءىس-شارالارىن ىسكە اسىرۋ ءۇشىن رەسپۋبليكالىق بيۋدجەتتەن 90 ملرد تەڭگە, ونىڭ ىشىندە 2019 جىلى 30 ملرد تەڭگە ءبولىندى. سونىمەن بىرگە, جوبانى جۇزەگە اسىرۋعا جەرگىلىكتى بيۋدجەتتەن شامامەن 4,7 ملرد تەڭگە ءبولىندى.
«بيىل 700 مىڭعا جۋىق ادام تۇراتىن 53 اۋىلدىق ەلدى مەكەن تاڭدالدى. 2019 جىلى جۇمىستار ۇلكەن اۋىلدىق ەلدى مەكەندەردە – حالقى كوپ اۋدان ورتالىقتارىندا جۇرگىزىلەدى, وندا جيناقتالىپ قالعان وتكىر ينفراقۇرىلىمدىق پروبلەمالاردى تەز ارادا شەشۋ قاجەت», — دەدى ول.
جوبانى ىسكە اسىرۋ قورىتىندىسى بويىنشا 2019 جىلى 4673 جاڭا جۇمىس ورنى قۇرىلادى, 73 مەكتەپ پەن بالاباقشا, 14 ەمحانا, 47 مادەنيەت ءۇيى مەن سپورت نىساندارى جوندەلەدى, 13 دەنە شىنىقتىرۋ-ساۋىقتىرۋ كەشەنى, 13 اباتتاندىرۋ نىسانىنىڭ قۇرىلىسى باستالادى.
سونداي-اق, 516 كم جول, 35 كم سۋمەن جابدىقتاۋ جەلىسى, 229 كم ەلەكترمەن جابدىقتاۋ (جارىقتاندىرۋ), 136 كم گازبەن جابدىقتاۋ, 20 كم جانە 6 جىلۋمەن قامتاماسىز ەتۋ نىساندارى جوندەلىپ, سالىنادى.
«كەلەسى جىلدان باستاپ كلاستەرلىك ءتاسىلدى ەنگىزۋدى كوزدەيمىز, وندا اۋىلدىق ەلدى مەكەندەر جەكەلەگەن توپتار – كلاستەرلەر (تىرەك اۋىلدان 10-15 كم راديۋستا) اياسىندا قاراستىرىلاتىن بولادى», دەدى ە. الپىسوۆ.
ماسەلەن, شورتاندى اۋىلى جاقىن ورنالاسقان اۋىلدار ءۇشىن تىرەك اۋىل بولىپ سانالادى. اتالعان اۋىلداردىڭ حالقى ءۇشىن بارلىق الەۋمەتتىك يگىلىكتەر مەن قىزمەتتەر تىرەك اۋىلدا ۇسىنىلادى. كولىك بايلانىسى ورنايدى.
«2025 جىلعا دەيىن 6,6 ملن اۋىل تۇرعىنىن جاقسارتىلعان ينفراقۇرىلىممەن جانە الەۋمەتتىك يگىلىكتەرمەن قامتۋ جوسپارلانعان», — دەدى ۆيتسە-مينيستر.
الدىن الا دەرەكتەر بويىنشا, 3 477 اۋىلدىق ەلدى مەكەندى بىرىكتىرەتىن 1 150 اۋىلدىق كلاستەر بار, ونىڭ ىشىندە 1 150 تىرەك اۋىل, 2 327 سپۋتنيكتىك جانە شەكارا ماڭى اۋىلدارى.
