دەپۋتاتتار ۇندەۋ جاريالادى

پارلامەنت ءماجىلىسىنىڭ جالپى وتىرىسىندا ءبىر توپ دەپۋتات قازاقستان رەسپۋبليكاسى پارلامەنتى ءماجىلىسى مەن سەناتى دەپۋتاتتارىنا, رەسپۋبليكالىق دەڭگەيدەگى بارلىق مەملەكەتتىك ورگاندار مەن ۆەدومستۆولاردىڭ قىزمەتكەرلەرىنە ۇندەۋ جولدادى. وندا بىلاي دەلىنەدى: “قادىرلى ارىپتەستەر! قۇرمەتتى باۋىرلار! الماتى وبلىسى, اقسۋ اۋدانى قىزىلاعاش اۋىلىنىڭ توپان سۋ استىندا قالىپ, 37 ادامنىڭ وپات بولعانىن جاقسى بىلەسىزدەر. قىزىلاعاشتاعى سۋ قويماسىنىڭ اپاتىنا بايلانىستى ەلباسى جۇمىس كەڭەسىن وتكىزىپ, ۇكىمەت الدىنا ناقتى تاپسىرمالار قويدى. زارداپ شەگۋشىلەرگە قارجىلاي, ماتەريالدىق, مەديتسينالىق كومەك بەرۋدى, بارلىق سۋ قويمالارىنىڭ جاعدايىن تەكسەرىپ, شۇعىل شارالار قابىلداۋدى مىندەتتەدى. قىزىلاعاشتاعى 465 ءۇيدىڭ 146-سىن سۋ شايىپ, 251 ءۇي تۇرۋعا كەلمەيتىن جاعدايدا. ال 42 ءۇي كۇردەلى جوندەۋدى قاجەت ەتەدى. اپات بولعان جەردە پرەمەر-مينيستر باستاعان ۇكىمەتتىك كوميسسيا بولدى. 700 ادام تالدىقورعانعا, 300 ادام ساعابيەن اۋىلىنا كوشىرىلدى. مەملەكەت تاراپىنان قوماقتى قارجى ءبولىندى. ءار وبلىس اكىمدىكتەرى كەم دەگەندە 50 ميلليوننان استام قارجى ءبولدى. دەمەۋشىلەر دە قوماقتى قارجى اۋداردى. الماتىنىڭ 10 جوعارى وقۋ ورنىنىڭ ستۋدەنتتەرى مەن جاستار ۇيىمدارى اپاتتان زارداپ شەككەن تۇرعىندار ءۇشىن گۋمانيتارلىق كومەك جىبەرە باستادى”. “كوپ تىلەگى – كول” دەگەن. وسى ۇندەۋگە ءماجىلىس دەپۋتاتتارى د.نوكەتاەۆا, گ.قاراعۇسوۆا, ا.ساماقوۆا, ز.باليەۆا, ل.حوچيەۆا, گ.يسىمباەۆا, س.توقپاقباەۆ, ءۇ.مەدەۋوۆ, ك.بيجانوۆ, ە.وماروۆ, ت.اسانوۆ, ر.سارپەكوۆ, ن.سابيليانوۆ, ۋ.قاليجانوۆ قول قويا وتىرىپ, ارقايسىسى 100 مىڭ تەڭگەدەن اقشا اۋداراتىندىقتارىن مالىمدەدى جانە سەنات دەپۋتاتتارىن, بارلىق دەڭگەيدەگى مەملەكەتتىك ورگاندار مەن ۆەدومستۆولاردىڭ قىزمەتكەرلەرىن ءبىر كۇندىك ەڭبەكاقىلارىن اپات زارداپتارىن جويۋعا ارنالعان قورعا اۋدارۋعا شاقىردى. ەندى بانك ەسەپ-شوتىن نازارلارىڭىزعا سالايىق: “قازاقستاننىڭ حالىق بانكى” اق تالدىقورعان ايماقتىق فيليالى: يك: 002700125 kzt            رنن: 530200007643 بيك بانكا: 194101601       كبە: 18 “ەگەمەن-اقپارات”.