ەكى كۇن ىشىندە الماتى تۇرعىندارى مەن قوناقتارى بۇركىتشىلەردىڭ, شاباندوزداردىڭ, كوكپارشىلاردىڭ, ساداق اتۋشىلاردىڭ شەبەرلىكتەرىنە ءتانتى بولىپ, باتىرلاردىڭ جەكپە-جەگىن, جەلدەي ەسكەن ات ۇستىنەن جەردەن تيىن العانداردىڭ ەپتىلىگىن, ۇلتتىق ويىنداردى تاماشالادى, ۇلتتىق اس مازىرىنەن ءدام تاتتى. « ۇلى دالا – كوشپەندىلەر الەمى» قازاقتار مەن تۇركى حالىقتارىنىڭ باي مۇراسىمەن كەڭىنەن تانىسۋعا مۇمكىندىك بەردى.
«فەستيۆالدە ءىرى ەتنومۋزىكانتتار مەن سپورتشىلار, بۇركىتشىلەر مەن قولدانبالى ونەر شەبەرلەرى وزدەرىنىڭ تالانتتارىن پاش ەتتى. ەتنومادەنيەت فەستيۆالىنىڭ باستى ماقساتى – كوشپەلى حالىقتىڭ ەرتە تاريحىن جاڭعىرتۋ, وسكەلەڭ ۇرپاققا ءار ۇلتتىق ءوزارا ۇقساستىعىن ءتۇسىندىرۋ», - دەدى قالالىق مادەنيەت باسقارماسىنىڭ باسشىسى نۇرلان سىدىقوۆ.
شارا بارىسىندا قازاقستاننىڭ جەتى دۇركىن, الەمنىڭ ەكى دۇركىن چەمپيونى, گينەسستىڭ رەكوردتار كىتابىنا ەكى رەت ەنگەن سەرگەي تسىرۋلنيكوۆتىڭ باسقارۋىمەن الىپتار شوۋى بولدى. ولار كۇرەسەدى, شەگەنى قولدارىمەن قاعادى, تەمىردى مايىستىرادى, گير كوتەرەدى. الىپ كۇش يەسى سەرگەي تسىرۋلنيكوۆ شەبەرلىك سىنىپتارىن وتكىزەدى جانە كورەرمەندەر ءۇشىن ارنايى جارىستار ۇيىمداستىردى. بۇدان وزگە, اندروش بيرونىڭ باسقارۋىمەن ماجارستاننان كەلگەن قوناقتار اسكەري ات ويىندارىنا قاتىسادى, بۋرياتتىق شامان ۆەليگتو بادماەۆ ىستىق تاستار ارقىلى كوز تيۋدەن قورعايدى. باشقۇرتستاننان كەلگەن ساداقشىلار جاياۋ جانە ات ۇستىندە تۇرىپ «مەرگەن ۋكسى» مەرگەندىك ونەرلەرىن كورسەتتى. قىرعىزدىڭ «سالبۋرۋن» كومانداسى بۇركىتپەن جانە تازى يتپەن اڭ اۋلاۋ شەبەرلىگىن ۇسىنادى.
الماتى اكىمى باۋىرجان بايبەك بورالداي قورعاندارى اۋماعىندا ساق مادەنيەتى ورتالىعى قۇرىلىسىنىڭ جوباسىمەن تانىستى. قازىردىڭ وزىندە ونىڭ جوبالىق-سمەتالىق قۇجاتتارى جاسالىپ, مەملەكەتتىك ساراپتاماعا جىبەرىلدى. قالا باسشىسى ءوزىنىڭ سوزىندە مۇنداي ورتالىقتىڭ پايدا بولۋى الماتىنىڭ تۋريستىك الەۋەتىن, ەل تارحيىنا دەگەن قىزىعۋشىلىقتى ارتتىراتىنىن, قۇندى ارحەولوگيالىق پاركتى قورعاۋعا, بولاشاق وسكەلەڭ ۇرپاق ءۇشىن تاريحي-مادەني مۇرا جاۋھارىن كوزدىڭ قاراشىعىنداي ساقتاۋعا مۇمكىندىك بەرەتىنىن ايتتى.
ەلباسىنىڭ « ۇلى دالانىڭ جەتى قىرى» باعدارلامالىق ماقالاسى اياسىندا الماتىدا رايىمبەك باتىردىڭ ماۆزولەيى رەكونسترۋكتسيالانادى. وسىناۋ كيەلى ورىندا مەموريالدى مۋزەي كەشەنى اشىلادى. بۇلاردان وزگە, «ەتنولەند» ەتنومادەني كەشەن سالۋ جوسپارلانىپ وتىر.
فەستيۆال اياسىندا بىرقاتار زاماناۋي ۇلتتىق ونەر كورمەلەرى ۇيىمداستىرىل يدى, «تۇران», «حاسساك» ەتنو-فولكلورلىق انسامبلدەرى, تۇركيادان, مونعوليادان, التاي مەن تىۆادان, چۋۆاشيا مەن قىرعىزستاننان جانە باسقا ەلدەردەن كەلگەن تانىمال ارتيستەر ءوز ونەرلەرىن كورسەتتى.
نيەت بىلدىرۋشىلەردىڭ بارلىعى ءتۇرلى جارىستار مەن ۆيكتورينالارعا قاتىسىپ, باعالى سىيلىقتار جانە ۇستالىق, زەرگەرلىك ونەردىڭ قۇپياسىنا بويلاپ, ۇلتتىق اس مازىرىنەن ءدارىس الدى, قولونەرشىلەر مەن باسقا دا قولدانبالى زاتتاردى جاساۋشىلاردىڭ ساباقتارىنا قاتىستى, شاعىن كيىز ءۇيدى قۇرۋ مەن جيناۋدى ۇيرەندى.
ساپارباي پارمانقۇل,
«Egemen Qazaqstan»
