استانادا تاعى دا بوكس ايقاسى

استانا تورىندە بوكس فەدەراتسيا­سى­نىڭ ۇيىمداستىرۋىمەن قازاقستان, ءازىربايجان, ۋكراينا مەن وزبەكستان بىلعارى قولعاپ شەبەرلەرىنىڭ قا­تى­سۋى­مەن حالىقارالىق تۋرنير باستالدى. وسىعان وراي ءبىز سپورتتىڭ وسى ءتۇ­رىنەن مەملەكەتتىك جات­تىق­تى­رۋ­شىسى بولات ابدراحمانوۆپەن كەزدەسىپ, ودان اتالعان تۋرنير مەن الداعى جا­رىستار, جالپى بوكستىڭ قازىرگى دامۋ دەڭگەيى جونىندەگى پىكىرىن بىلگەن ەدىك. –  قازىرگى كەزدە دە ەلىمىز بو­يىنشا بوكستىڭ بەدەلىن كوتەرە ءتۇسۋ ءۇشىن ۇلكەن جۇمىستار قولعا الىنىپ وتىر دەپ ايتا الامىن, – دەدى ول. – قا­زاقستان بوكس فەدەراتسياسىنا پرە­زيدەنت بولىپ تيمۋر اسقار ۇلى قۇ­لى­باەۆ كەلگەلى بەرى ەلىمىزدىڭ بارلىق ءوڭىر­لەرىندە بوكستى دامىتۋدىڭ جاڭا جوبالارى ىسكە قوسىلا باستادى. مى­سالى, بيىلعى جىلدىڭ قىركۇيەك اي­ىنا دەيىن بارلىق وبلىستاردا “بوكس سارايى” سالىناتىن بولادى. بۇل ال­دىمەن بالالار مەن جاستاردىڭ ارا­سىنان تالانتتى بوكسشىلاردى ىرىكتەپ الۋعا مۇمكىندىك بەرسە, ەكىنشى جا­عىنان بوكستى بۇقارالىق سپورت دەڭ­گەيىنە كوتەرۋگە ىقپال ەتەتىن بولادى. فەدەراتسيانىڭ تاعى ءبىر مىقتاپ قولعا العان جۇمىسى: قازىر ۇلتتىق قۇ­رامانى جاسارتۋ كەزەڭى ءجۇرىپ جاتىر, ياعني تالانتتى جاستار نەگىزگى كو­مان­داعا شاقىرىلىپ, ولاردى ءىرى حا­لىق­ارالىق جارىستارعا قاتىستىرۋ باس­تالدى. بۇرىنعى تاجىريبەلى بوكس­شىلاردان تەك ساپيەۆ قانا قۇرامادا ءجۇر. باسقاسىنىڭ ءبارى جاپ-جاس, بىراق كەلەشەگى بار جىگىتتەر. قۇراماعا جاقىندا قوسىلعان بەس بوكسشىمىز وسى كۇندەرى چەحيادا ءوتىپ جاتقان حالىقارالىق جارىستا ءجۇر. –             وسى جەردە كەشە باستالعان تۋر­نير مەن الداعى كەزدە وتەتىن ءبا­سە­كەلەر جونىندە ايتىپ بەرسەڭىز. –             جاڭا ايتىپ كەتكەن بەس بوكسشىمىزدان باسقالارىنىڭ ءبارى 16-17 ناۋرىز كۇندەرى استانادا وتەتىن ماتچتىق تۋرنيردە ونەر كورسەتەدى. بۇل باسەكەگە ءازىربايجان, ۋكراينا جانە وزبەكستان قۇرامالارى قاتىسادى. الدىمەن بىزبەن قوسقاندا وسى ءتورت قۇراما بىرلەسكەن جات­تىعۋلار وتكىزەدى, سوسىن ءبىر-بىرىمەن كەزدەسەدى. بۇل – ناعىز تاجىريبە الا­تىن, جىگىتتەرىمىزدى ءبىر سىناپ الاتىن تۋرنير بولادى دەپ ويلايمىز. قازاقستاننىڭ بوكس فەدەراتسياسى وسىنداي جارىستاردى وتكىزۋگە نەمەسە قاتىسۋعا ۇلكەن ءمان بەرىپ كەلەدى. ويتكەنى, بيىل ازيا ويىندارى وتەتىن جىل. ازيا ويىندارى دەگەنىمىز وتە ۇلكەن جارىس, ال قازاقستاننىڭ بوكس قۇ­راماسىنا ەڭ ۇلكەن سەنىم ار­تى­لا­تىنى بەلگىلى. مۇنىڭ الدىندا 23 – 31 مامىر كۇندەرى استاناداعى ء“داۋ­لەت” سپورت كەشەنىندە قىزدار ارا­سىن­دا ازيا چەمپيوناتى وتەدى. سون­دىق­تان دا رەسپۋبليكالىق بوكس فە­دە­را­تسياسىنىڭ باسشىسى تيمۋر اسقار ۇلى ۇلتتىق قۇراماعا دا, جاستار قۇرا­ما­سىنا دا ەرەكشە ءمان بەرىپ, ولاردىڭ دايىندىعى ءۇشىن بارلىق جاعدايدى جاساپ وتىر. مىسالى, قۇرامانىڭ ءبىرىنشى ءنومىرلى بوكسشىلارى 2 500, ال ەكىنشى ءنومىرلى بوكسشىلارى 1 500 دوللاردان جالاقى الىپ تۇرادى. سونىمەن قاتار جاستار قۇراماسىنا دا جاقسى جاعداي جاسالىپ وتىر. جاقىندا ءبىزدىڭ جاستار قۇراماسى يراننان كەلدى. وسىندا وتكەن ازيا چەمپيوناتىندا ءتورت بوكسشىمىز ال­تىن مەدال جەڭىپ الدى! ءبىر بوكس­شىمىز – كۇمىس, تاعى ەكى بوكسشىمىز – قولا جۇلدەگەر اتاندى. كوما­ن­دا­لىق ەسەپتە قازاقستان ءبىرىنشى ورىنعا يە بولدى. يران, قىتاي, ءۇندىستان قۇ­را­مالارى ەكى التىننان السا, ءوز­بەك­ستان ءبىر-اق التىنمەن شەك­تەل­دى. ازيادا ءبىرىنشى بولعان جاس جىگىت­تە­رىمىزگە دە ماتەريالدىق سىياقى بەرىلەدى. 2011 جىلى ءبىزدىڭ استانادا جاستار اراسىنداعى الەم چەمپيوناتى وتەتىنى بەلگىلى. ايبا-نىڭ بۇل شەشىمى – ءبىزدىڭ ەلگە كورسەتكەن ۇلكەن سەنىم. وسىنداي حالىقارالىق دەڭگەيدەگى جانە رەسپۋبليكا بويىنشا وتەتىن شارالاردى ۇيلەستىرۋدە فەدەرا­تسيا­نىڭ اتقارۋشى ديرەكتورى دانيار رۇستەم ۇلى ابۋلعازين ۇلكەن جۇ­مىس­تار اتقارىپ كەلەدى. اڭگىمەلەسكەن داستان كەنجالين.