امەريكانىڭ “فوربس” جۋرنالى الەمدەگى بايلاردىڭ ءتىزىمىن جاريالادى. وتكەن جىلدىڭ قورىتىندىسى بويىنشا بايلار ءتىزىمىن 53,5 ميلليارد دوللار بايلىعى بار مەكسيكالىق تەلەماگنات كارلوس سليم باستاپ وتىر. ول ءبىرىنشى ورىننان اتاقتى امەريكالىق بيلل گەيتستى (53 ميلليارد) ىعىستىردى. ءۇشىنشى ورىندا – تاعى دا ءبىر امەريكالىق ۋوررەن باففەت (47 ميلليارد). ءبىر قىزىعى – داعدارىس كەزىندە رەسەيدە ميللياردەرلەر كوبەيىپتى. “فوربستىڭ” تىزىمىنە بۇرىن 32 رەسەيلىك باي كىرسە, ەندى ولاردىڭ سانى – 64.
ازاروۆ – پرەمەر-مينيستر
باسقا جەردە بيلىكتەگى ەكىنشى تۇلعا سانالاتىن پرەمەر-مينيسترلەردىڭ كىم بولعانىنا ءمان بەرىلە بەرمەيدى. ال ۋكراينادا – وزگەشە. بۇل پرەزيدەنت ۆ.يانۋكوۆيچتىڭ باعىتىن بىلدىرەدى. بۇرىن يۋ.تيموشەنكو اتقارعان قىزمەتتى ەندى ن.ازاروۆ اتقارادى. دەمەك, پرەزيدەنت ءوز ادامدارىنا سەنىم ارتادى. ۇمىتكەردىڭ ءبىرى س.تيگيپكو پرەمەردىڭ كوپ ورىنباسارلارىنىڭ ءبىرى عانا بولدى.
اتا زاڭدا اقاۋ كوپ
مولداۆيا باسشىلىعى ەل كونستيتۋتسياسىنا وزگەرىستەر ەنگىزۋ ءۇشىن بۇكىلحالىقتىق رەفەرەندۋم وتكىزۋ جونىندە شەشىم قابىلدادى. ونىڭ دا ءجونى بار: سول اتا زاڭداعى اقاۋلىقتارعا بايلانىستى. رەسپۋبليكا ءبىرازدان بەرى ءوز پرەزيدەنتىن سايلاي الماي وتىر, ءتىپتى قاجەتتى ۋاقىتىندا پارلامەنت سايلاۋىن دا وتكىزە المايدى. سونداي-اق قازىر پرەزيدەنت مىندەتىن اتقارۋشى ميحاي گيمپۋ رەفەرەندۋمعا مەملەكەتتىك ءتىلدى مولداۆان ءتىلى دەگەننەن رۋمىن ءتىلى دەپ اتاۋعا وزگەرتۋدى ۇسىنىپ وتىر. كوممۋنيستەر بۇل رەفەرەندۋمعا بويكوت جاريالاماق.
سوعىسقا دايىن
كحدر ۇكىمەتى ءوز اسكەرىن جوعارى جاۋىنگەرلىك دايىندىققا قويعانىن مالىمدەدى. مۇنى ولار وڭتۇستىك كورەياداعى اقش-پەن بىرىگىپ وتكىزىلىپ جاتقان اسكەري جاتتىعۋلارعا جاۋاپ دەپ وتىر. سول جاتتىعۋلاردى ولار سولتۇستىككە شابۋىلدىڭ رەپەتيتسياسى سانايدى. سولتۇستىك جاعىنىڭ اسكەري قولباسشىسى وڭتۇستىك كورەيانى اقش-ىمەن قوسا قوپارىپ تاستاۋعا دايىن ەكەندىكتەرىن حابارلادى. قورقىتۋعا دا بولار, بىراق شامالاپ ايتقان دا ءجون عوي.
چيليدە – جاڭا پرەزيدەنت
جەر سىلكىنىپ, استان-كەستەن بولىپ جاتقان چيليدە جاڭا پرەزيدەنت سەبەستيان پينەرا قىزمەتىنە كىرىستى. بۇعان دەيىن 20 جىل سولشىلداردىڭ بيلىگىندە بولعان بۇل ەلدە اسا باي ادامنىڭ پرەزيدەنت بولىپ سايلانۋى دا چيليلىكتەردىڭ ءبىر وزگەرىس كۇتكەنى شىعار. دەگەندە, سوڭعى پرەزيدەنت ايەل ازامات ميشەل باچەلەت حالىققا جاعىمدى بولدى. تەك ونىڭ قايتا سايلانۋىن زاڭ كوتەرمەدى. پينەراعا بيلىك تىزگىنىن ۇستاۋ وڭايعا سوقپاس. اقپانداعى جەر سىلكىنىسى ەلگە 30 ميلليارد دوللار زيان كەلتىردى. ءبىر قىزىعى – جاڭا پرەزيدەنتتىڭ يناۋگۋراتسياسى ءوتىپ جاتقاندا دا 7,2 بالل جەر سىلكىنىسى بولىپتى.
دوس بولۋ قيىن ەل
يراننىڭ كولىك ءمينيسترى حاميد بەحباحاني سول ەلدە نان تاۋىپ جۇرگەن رەسەيلىك ۇشقىشتارعا ەكى ايدا تاباندارىڭدى جالتىراتىڭدار دەپ نۇسقاۋ بەردى. سەبەبى – وزىمىزدە ۇشقىش جەتەدى دەيدى. جەتسە, بۇرىن نەگە جۇمىسقا العان؟! مۇنىڭ شىن سەبەبى باسقادا. رەسەي امالسىز اقش ۇسىنىپ وتىرعان يرانعا قارسى سانكتسيانى قولداۋعا ءماجبۇر. سونان سوڭ يرانعا س-300 زىمىران-زينيت كەشەنىن بەرسە دە ابىرويى توگىلەدى. يران ونى تۇسىنگىسى كەلمەيدى. جالپى, يرانمەن دوس بولۋ قيىن.
لاڭكەستەر ورنى – تۇرمە
تاجىكستاندا “تابليعي دجاماات” مۇسىلمان قوزعالىسىنىڭ مۇشەلەرى مەن جاقتاستارىنا سوت بولدى. ايىبى – ەكسترەميستىك ۇيىمدارمەن بايلانىسى بارلىعى. 23 ادام ءۇش جىلدان التى جىلعا دەيىن سوتتالسا, 33 ادامعا اقشاداي ايىپ بەلگىلەندى. جالپى تاجىكستاندا “تابليعي دجامااتتىڭ” قىزمەتىنە تىيىم سالىنعان.
قاراقشىلار قۇرىقتالدى
فرانتسيانىڭ اسكەري تەڭىزشىلەرى سومالي جاعالاۋىندا كۇزەتتە جۇرگەن كەزىندە 35 سومالي قاراقشىسىن قاماۋعا الىپتى. بۇل – سوڭعى ەكى جىلداعى قاراقشىلارعا قارسى كۇرەستەگى ەڭ ۇلكەن “ولجا”. سومالي قاراقشىلارى بۇكىل الەمدى شۋلاتىپ ءجۇر. بۇل ماڭمەن كەمەسى وتپەيتىن ەل از. قاراقشىلار كەمەنى ۇستايدى دا, بوساتقانعا اقشا سۇرايدى. بەرمەسەڭ, ادامىڭدى ءولتىرىپ, كەمەڭدى قارىق قىلادى. كوپ ەل بەرىپ قۇتىلادى.
ازىرلەگەن ماماديار جاقىپ.
