بىرىڭعاي ءتارتىپ ەنگىزۋدى كوزدەيدى

پارلامەنت سەناتىندا ەكونوميكالىق جانە وڭىرلىك ساياسات كوميتەتىنىڭ ۇيىمداستىرۋىمەن “جەر قويناۋى جانە جەر قويناۋىن پايدالانۋ تۋرالى” زاڭ جوباسىنىڭ تۇساۋكەسەرى بولدى, دەپ حابارلادى وسى پالاتانىڭ ءباسپاسوز قىزمەتى. جيىندا نەگىزگى بايانداما جاساعان ەنەرگەتيكا جانە مينەرالدى رەسۋرستار مينيسترلىگىنىڭ جاۋاپتى حاتشىسى قاناتبەك سافينوۆ شاراعا قاتىسۋشىلاردى زاڭ جوباسىنىڭ تۇجىرىمداماسىمەن تانىستىردى. ول جەر قويناۋىن پايدالانۋعا قاتىستى قاتىناستار قازىرگى كەزدە “جەر قويناۋى جانە جەر قويناۋىن پايدالانۋ تۋرالى” جانە “مۇناي تۋرالى” زاڭدارمەن رەتتەلەتىنى جايىندا ايتا كەلىپ, جوبا وسى سالاعا قاتىستى زاڭداردى ودان ءارى جەتىلدىرۋگە جانە جۇيەلەندىرۋگە, جەر قويناۋىنىڭ يەسى رەتىندەگى مەملەكەتتىڭ مۇددەسىن قورعاۋدى قامتاماسىز ەتۋگە ارنالعانىن اتاپ ءوتتى. زاڭ جوباسىمەن جەر قويناۋىن پايدالانۋ قۇقىعى جانە وسىعان قاتىستى نىسانداردىڭ قوزعالىسىنا مەملەكەتتىك باقىلاۋ جاساۋ, مەملەكەتتىڭ باسىم قۇقىعىن ىسكە اسىرۋدى ءدال رەسىمدەۋ, جەر قويناۋىن پايدالانۋ كەلىسىمدەرىنىڭ ۇلگىسى رەتىندە ءونىمدى بىرلەسە بولۋدەن باس تارتۋ بەلگىلەنىپ وتىر. زاڭ جوباسى جەر قويناۋىن پايدالانۋ قۇقىعىن بەرۋگە كونكۋرس وتكىزۋ رەسىم­دەرى مەن تىكەلەي كەلىسسوزدەر نەگىزىندە شارت جاساسۋ ءتارتىبىن, سون­داي-اق پايدالى قازبانىڭ قانداي ءتۇرى بولسا دا جەر قويناۋىن پايدالانۋ قۇقىعىن بەرۋدىڭ بىرىڭعاي ءتارتىبىن ەنگىزۋدى كوزدەيدى. جەر قويناۋىن پايدالانۋ سالاسىنداعى اكتيۆتەردى ساتىپ الۋ-ساتۋ جونىندەگى مامىلەلەردى بەلسەندىلەندىرۋ جاعدايىندا ەكونوميكالىق قاۋىپسىزدىكتى قامتاماسىز ەتۋدەگى زاڭ جوباسىنىڭ ماڭىزدىلىعىن اتاپ وتە كەلىپ, ق.سافينوۆ وسى سالاداعى اكتيۆتەردى الىپساتارلىقپەن تارتىپ الۋ مۇمكىندىگىن بولدىرمايتىن ەرەجەلەرگە نازار اۋداردى. زاڭ جوباسىنا تەك تاۋارلار, جۇمىستار, قىزمەت كورسەتۋلەر عانا ەمەس, ماماندارمەن قامتاماسىز ەتۋدە دە “قازاقستاندىق ماز­مۇندى” قاراستىراتىن وزگەرىستەر ۇسىنىلىپ وتىر. تالقىلاۋ بارىسىندا ق.سافينوۆ دەپۋتاتتاردىڭ ساۋالدارىنا جاۋاپ بەردى.