اۋلا كلۋبى – تاربيە ورتالىعى
سارسەنبى, 18 شىلدە 2012 7:22
قوستاناي قالاسىندا جازعى كەزەڭدە 18 اۋلا كلۋبى جۇمىس ىستەيدى, ولاردا ءتۇرلى 46 ۇيىرمە ۇيىمداستىرىلعان. سونىڭ ىشىندە جۇمىسى مەملەكەتتىك تىلدە جۇرگىزىلەتىن ۇيىرمەلەر, سپورت ءجونىندەگى تاجىريبەلى نۇسقاۋشىلار جۇرگىزەتىن 75 سپورتتىق سەكتسيا بار. جاز باستالعالى ءبۇگىنگە دەيىن وبلىستا 10 مىڭنان استام بالا سپورتتىق ءىس-شارالارعا, تۋريستىك ساپارلارعا تارتىلدى.
سارسەنبى, 18 شىلدە 2012 7:22
قوستاناي قالاسىندا جازعى كەزەڭدە 18 اۋلا كلۋبى جۇمىس ىستەيدى, ولاردا ءتۇرلى 46 ۇيىرمە ۇيىمداستىرىلعان. سونىڭ ىشىندە جۇمىسى مەملەكەتتىك تىلدە جۇرگىزىلەتىن ۇيىرمەلەر, سپورت ءجونىندەگى تاجىريبەلى نۇسقاۋشىلار جۇرگىزەتىن 75 سپورتتىق سەكتسيا بار. جاز باستالعالى ءبۇگىنگە دەيىن وبلىستا 10 مىڭنان استام بالا سپورتتىق ءىس-شارالارعا, تۋريستىك ساپارلارعا تارتىلدى. تۋريستەر سلەتتەرى ءوتتى. قالادا ءوسىپ جاتقان بالالار ءۇشىن جاز ايلارىندا تازا اۋادا ءجۇرۋدىڭ, سەرۋەندەۋدىڭ ماڭىزى وتە ۇلكەن ەكەنىن ايتىپ جاتۋدىڭ ءوزى ارتىق بولار. «ساياحات» اۋلا كلۋبىنىڭ جۇمىسى تۋعان ولكەنىڭ قىزىقتى جەرلەرىنە ەكسكۋرسيا جاساۋعا باعىتتالعان. ونىڭ مۇشەلەرى جاز ايلارىندا تابيعات اياسىنا شىعادى, پالاتالىق لاگەر ۇيىمداستىرادى. بيىل دا ول وسى جۇمىسىن بەلسەندى جۇرگىزىپ وتىر. دالادا پالاتا تىگىپ, كوستەر جاعىپ, تازا اۋادا تاماق ءپىسىرۋ, ءتۇرلى كەدەرگىلەردەن وتۋگە تالپىنۋ قالادا اقساۋساق بولىپ ءوسىپ جاتقان ۇلدار مەن قىزداردى ومىرگە يكەمدىلىككە دە ۇيرەتەدى.
«اسكەر» اسكەري-پاتريوتتىق اۋلا كلۋبى 2008 جىلدان بەرى جۇمىس ىستەپ كەلەدى. مۇندا 13-18 جاستاعى الپىستان استام جاسوسپىرىمدەر مەن قىزدار بوس ۋاقىتىن وتكىزەدى. جاز قىزىعىن پايدالى ىسپەن ۇشتاستىرۋ باستى ماقساتقا اينالعان. ولار ويىنمەن ءجۇرىپ ءورت ءسوندىرۋ ىسىنە دايىندالادى, اسكەري-تاكتيكالىق جانە ارنايى دايىندىقتى زەردەلەيدى. سپورتتىڭ بىرنەشە تۇرىنەن سەكتسيالار جۇمىس ىستەيدى. سونىمەن قوسا, بالالار اسكەري توپوگرافيا ءىسىن جانە قىسىلشاڭ جاعدايدا قالاي تىعىرىقتان شىعا ءبىلۋ كەرەكتىگىن دە اۋلا كلۋبتارىنىڭ ساياحاتىندا ۇيرەنەدى. مۇنداي ساياحاتتاردىڭ بالالاردى ادامگەرشىلىككە, دوستىققا تاربيەلەۋدە دە ماڭىزى زور.
قاي كەزدە دە ءتۇرلى جارىستار دەمالىستىڭ قىزىعىن ارتتىرا تۇسەدى. اۋلا كلۋبتارى دا ءوز جۇمىسىمەن تۇيىقتالماي, جاز بويىنا رەسپۋبليكالىق, حالىقارالىق جارىستارعا قاتىسىپ تۇرادى. مىسالى, «اسكەر» كلۋبىنىڭ ءتۇرلى جارىستاردان العان كۋبوكتارى مەن مەدالدەرىنىڭ سانى قىرىقتان اسادى! ول كورشى رەسەيدىڭ ماگنيتوگور, چەليابى قالالارىنداعى اۋلا كلۋبتارىمەن تىعىز بايلانىس ورناتقان. جاقىندا اسكەرلىكتەر سپورتتىڭ جۇدىرىقتاسۋ ءتۇرى بويىنشا وبلىستىق فەستيۆالدە ەكىنشى ورىندى, ال «الاۋ» اسكەري-پاتريوتتىق ويىندارىندا ءۇشىنشى ورىندى يەلەندى. «اسكەر» اۋلا كلۋبىندا قول كۇرەسىنىڭ وبلىسقا, ودان قالدى رەسپۋبليكاعا تانىمال باۋىرجان تەمىرحانوۆ, ەركەبۇلان ابىشەۆ, تەمىرلان مۇڭايتپاسوۆ, ۆلاديسلاۆ مالىك, ماكسيم ۋنراۋ سياقتى مايتالماندارى تاربيەلەنىپ شىقتى.
«تايپالار سلەتى», «بولاشاق سارباز» اسكەري-پاتريوتتىق ويىندارى بالالاردى ناعىز ەپتىلىككە تاربيەلەيدى. ونىڭ قىزىعى دا ءبىر توبە. ءۇندىستەردىڭ كيىمىن كيىپ العان بالالار ناعىز تاپقىرلىق پەن ەپتىلىكتى كورسەتۋ ءۇشىن تالاسادى. ال اسكەري-پاتريوتتىق ويىنداردا اۆتومات جيناۋ, گراناتا لاقتىرۋ, قاۋىپتى جەرلەردى مينادان تازارتۋ سياقتى ءتۇرلى سىننان وتەدى. اۋلا كلۋبتارى ءۇشىن جاز قىزىعى وقۋ باستالعانعا دەيىن تاۋسىلمايدى. تامىز ايىندا «جەڭىسكە قاراي العا!» اتتى سپارتاكيادا اۋلا كلۋبتارىنىڭ باسىن قوسادى.
ەپتى, كۇشتى, شىنىققان, ەرجۇرەك جاس ءوز وتانىنىڭ پاتريوتى دا بولا الادى. ويتكەنى, ول قانداي قيىندىققا دا قارسى تۇرا الادى. وزىنە سەنىمدى ادامنىڭ كوزقاراسى, پىكىرى دە تۇراقتى. ول وزگە جاستارعا دا جاقسى ۇلگى بولادى. وسىنداي جاستاردىڭ قاتارى تولىسىپ جاتسا, اۋلا كلۋبتارىنىڭ دا ماقساتقا جەتكەنى دەپ بىلەمىز.
ۆلاديمير رۋسوۆ,
«اسكەر» اۋلا كلۋبىنىڭ جەتەكشىسى.
قوستاناي.
