باعىتىمىز – دەنساۋلىق, ارمانىمىز – وليمپيادا!
سەنبى, 14 شىلدە 2012 6:43
وليمپياداعا 13 كۇن قالدى
الەم قۇلاق تۇرگەن لوندون وليمپياداسىن قوستانايلىقتار دا تاعاتسىزدانا كۇتىپ وتىر. سپورتتىڭ شىڭى سانالاتىن وليمپياداعا قوستانايلىقتار ەكى ءدۇلد ۇلىن قوسادى. وسىعان دەيىن تالاي جارىستاردا توپ جارعان يۆان دىچكو مەن جەلاياق قىزىمىز مارينا ماسلەنكو ەلىمىزدىڭ نامىسىن قورعايتىن بولادى.
سەنبى, 14 شىلدە 2012 6:43
وليمپياداعا 13 كۇن قالدى
الەم قۇلاق تۇرگەن لوندون وليمپياداسىن قوستانايلىقتار دا تاعاتسىزدانا كۇتىپ وتىر. سپورتتىڭ شىڭى سانالاتىن وليمپياداعا قوستانايلىقتار ەكى ءدۇلد ۇلىن قوسادى. وسىعان دەيىن تالاي جارىستاردا توپ جارعان يۆان دىچكو مەن جەلاياق قىزىمىز مارينا ماسلەنكو ەلىمىزدىڭ نامىسىن قورعايتىن بولادى.
وليمپيادا – سپورتتى جانى سۇيگەن ءار جاستىڭ ارمانى. ال قوستاناي سپورتىنىڭ جالپى باعىتى – سالاماتتى ءومىر سالتى, دەنساۋلىق. سوناۋ 90-شى جىلداردان بەرى سپورتتى جانىنا سەرىك ەتەتىندەردىڭ قاراسى مولايا ءتۇستى. ءسوزىمىز قۇرعاق بولماسىن, 2001 جىلى وبلىستا 178 مىڭنان اسا ادام سپورتقا ماڭىز بەرسە, ال 1997 جىلى ولاردىڭ قاتارى نەبارى 57 مىڭ عانا بولاتىن. ءبۇگىندە وبلىس بويىنشا 230 مىڭ ادام سپورت جانە دەنەشىنىقتىرۋمەن ۇزدىكسىز اينالىسادى.
ەلىمىز تاۋەلسىزدىك العان جىلداردان باستاپ, 20 جىلدىڭ ىشىندە جاڭادان 360 سپورت نىسانى بوي كوتەرگەن ەكەن. قازىر جۇرتشىلىق جاتتىعۋعا, شىنىعۋعا باراتىن سپورت عيماراتتارىنىڭ سانى سوناۋ 90-شى جىلداردىڭ باس كەزىمەن سالىستىرعاندا 1,5 ەسەدەي وسكەن. وبلىس ورتالىعىن بىلاي قويعاندا, قازىر اۋداندارداعى, ەلدى مەكەندەردەگى ستاديونداردىڭ, سپورت زالدارىنىڭ جابدىقتالۋى كىمدى دە بولسا تاڭقالدىراتىنداي. قاراسۋ, قوستاناي اۋداندارىنداعى الاڭى جاساندى ءشوپپەن جابىلعان ستاديونداردان 1500-2500 كورەرمەن فۋتبول تاماشالاي الادى. قوستاناي اۋدانىنداعى ستاديون استىنان جىلىتىلاتىندىقتان, وندا قىس ايلارىندا دا جاتتىعۋ وتكىزۋگە, ءتىپتى فۋتبول ويناۋعا مۇمكىندىك بار. قوستاناي قالاسىندا بىرنەشە باسسەين ىسكە قوسىلعان. قالالارداعى, اۋىلدارداعى سپورت كەشەندەرى جۇرتشىلىقتىڭ قۋانىشىنا اينالعان.
بۇگىندە وبلىستا سپورت زالدارى مەن باسقا دا عيماراتتارعا ءجوندەۋ جۇمىستارى جۇرگىزىلدى. جاڭادان 30 سپورتزال سالىندى. قازىر اۋىل ادامدارى قىس ايلارىندا سپورت كەشەندەرىنىڭ ارقاسىندا بوس ۋاقىتىن ءتيىمدى پايدالانادى. جۇمىستان كەيىن ساندالىپ, اششى سۋعا قۇنىققانداردى قازىر اۋىلدان دا, قالادان دا سيرەك بايقايمىز. سپورتپەن اينالىسقان جاننىڭ كەزبە بولىپ ءجۇرۋگە ۋاقىتى قالمايدى, ونىڭ قاسيەتتىلىگى دە وسىندا بولسا كەرەك.
وبلىستا بالالار مەن ءجاسوسپىرىمدەر سپورتىنا بارىنشا كوڭىل ءبولىنىپ وتىر. ارنايى سپورت مەكتەپتەرىنىڭ سانى تاۋەلسىزدىكتىڭ ەلەڭ-الاڭىنان بەرى قاراي ەكى ەسەگە ءوستى. ول قازىر 16 مىڭنان استام جاس سپورتشىنى قامتيدى. وندا جاتتىعۋ, سپورت ساباقتارىنىڭ بارلىعى بالالارعا تەگىن قاراستىرىلعان. تەك سوڭعى ءۇش جىلدىڭ وزىندە 300 ميلليون تەڭگەگە سپورتتىق قۇرال-جابدىقتار الىندى.
تاۋەلسىز قازاقستان تاريحىنداعى سپورت جەتىستىكتەرىندە قوستانايلىقتاردىڭ دا ۇلەسى بار. سۇر مەرگەن سەرگەي بەلياەۆ 1996 جىلعى جازعى وليمپيادانىڭ ەكى دۇركىن كۇمىس جۇلدەگەرى بولدى. گرەك-ريم كۇرەسىنەن مەن دە ازيانىڭ جەتى رەت چەمپيونى اتاندىم, جاستار اراسىنداعى الەم كۋبوگىنىڭ ەكى مارتە چەمپيونىمىن. اتاقتى كونكيشىمىز دەنيس كۋزين 2007 جىلعى قىسقى وليمپيادادا رەكوردتى جاڭارتقان ەدى. ال وتكەن جىلعى اق وليمپيادادا كونكيشى الەكساندر جيگين, شورت-ترەكشى اننا سامارينا, داريا ۆولوكيتينا, فەدور اندرەەۆ تاماشا ونەر كورسەتىپ, جۇلدەگەر اتاندى. ازيا چەمپيوناتىنىڭ ءجۇلدەگەرى بالۋان بەيبىت نۇعىمانوۆتان ءۇمىتىمىز مول. 20 جىل ىشىندە 560 سپورت شەبەرى دايىندالدى. سونىڭ ىشىندە 107 سپورتشى حالىقارالىق دەڭگەيدى باعىندىردى. جىل باسىنان بەرى جوعارى كاتەگورياداعى ون جاتتىقتىرۋشى دايىندالدى. وليمپياداعا ەل ءۇمىتى مەن نامىسىن ارقالاپ بارا جاتقان ەكى ۇلانىمىز دا وسى جاتتىقتىرۋشىلار ەڭبەگىنىڭ ارقاسىندا بيىك اسۋلاردى العان بولاتىن.
وبلىس جۇرتشىلىعى ءۇشىن 2000 جىلى ۋەفا ۇلگى-قالپى بويىنشا 8000 كورەرمەنگە ارنالعان ستاديوننىڭ اشىلۋى قۋانىش بولعان ەدى. ودان كەيىن ەلباسىمىز نۇرسۇلتان نازارباەۆ قوستاناي قالاسىنداعى جابىق مۇز ايدىنى بار سپورت سارايىنىڭ لەنتاسىن ءوزى قيدى. ليساكوۆ قالاسىنداعى سپورتتىڭ كۇرەس تۇرلەرىنە ارنالعان سپورتزال, ارقالىق قالاسىندا كۇرەس جانە اۋىر اتلەتيكاعا ارنالعان زالدارى جابدىقتالعان ءىرى سپورت كەشەنى پايدالانۋعا بەرىلدى. ماتەريالدىق بازا قالادا دا, اۋىلدا دا وسىنداي قاداممەن العا باسىپ كەلەدى.
2010 جىلى «توبىل» كومانداسى قازاقستانداعى پرەمەر-ليگا كوماندالارى اراسىندا چەمپيون بولدى. وبلىستا ۇلتتىق سپورت تۇرلەرى دە جاندانىپ كەلەدى. قازىر ونىڭ ون ءۇش تۇرىنەن جارىستار وتكىزىلەدى. اسىرەسە, توعىزقۇمالاق, قازاق كۇرەسى, ات سپورتىنا جاستاردىڭ تارتىلۋى ەرەكشە. اۋىلدى جەرلەردە ۇلتتىق سپورت سەكتسيالارى جاندانىپ كەلەدى.
قوستانايلىق سپورت كوماندالارى بارلىق رەسپۋبليكالىق جارىستارعا قاتىسىپ وتىرادى, ولاردان قۇرالاقان دا قايتىپ جۇرگەن جوق. كوماندالارىمىز سپورتتىڭ كوپتەگەن تۇرلەرىنەن ۇزدىك بەستىك اراسىنان كورىنىپ ءجۇر. جەرگىلىكتى جەردەگى ءىرىلى-ۇساقتى سپورت جارىستارىنىڭ بارلىعى دا جاستاردى الدىمەن پاتريوتتىق سەزىمگە تاربيەلەيدى. كۇشتىلەر, مىقتىلار, ەپتىلەر عانا وتانىن سۇيە الادى. وليمپيادا ارمانى دا اۋىلداعى جارىستاردان باستاۋ الادى.
سەرگەي ماتۆيەنكو,
قوستاناي وبلىستىق تۋريزم, دەنەشىنىقتىرۋ جانە سپورت باسقارماسىنىڭ باستىعى.
