اقتوبە مەن لوندوننىڭ اراسى
سارسەنبى, 11 شىلدە 2012 7:31
ءدۇبىر
وليمپياداعا 16 كۇن قالدى
اقتوبە ءوڭىرى الەمدىك سپورت دودالارىندا ولجا سالىپ جۇرگەن سايىپقىران سپورتشىلاردان كەندە ەمەس. الايدا, ءتورت جىلدا ءبىر بولاتىن وليمپيا ويىندارىندا وبلىس سپورتشىلارىنىڭ ەسەسى كەتىپ جۇرگەنى دە راس.
سارسەنبى, 11 شىلدە 2012 7:31
ءدۇبىر
وليمپياداعا 16 كۇن قالدى
اقتوبە ءوڭىرى الەمدىك سپورت دودالارىندا ولجا سالىپ جۇرگەن سايىپقىران سپورتشىلاردان كەندە ەمەس. الايدا, ءتورت جىلدا ءبىر بولاتىن وليمپيا ويىندارىندا وبلىس سپورتشىلارىنىڭ ەسەسى كەتىپ جۇرگەنى دە راس.
سوناۋ 2000 جىلى وتكەن سيدنەي وليمپياداسىندا وبلىس نامىسىن قورعاعان بوكسشى ەرماحان ىبىرايىموۆتىڭ التىن جۇلدە الىپ, اقتوبەلىكتەردى عانا ەمەس, بارشا قازاقستاندىقتاردى اقجارىلقاپ قۋانىشقا بولەگەنى بەلگىلى. سول وليمپياداعا قاتىسقان دزيۋدوشى جەرلەستەرىمىز اسحات شاحاروۆ, گۇلنار كوشەرباەۆا ءجۇلدەلى ورىندارعا جەتە المادى. ودان كەيىنگى وليمپيادالاردا دا اقتوبەلىك سپورتشىلاردىڭ جولى بولمادى. 2004 جىلعى افينا وليمپياداسىنا ۇكىلى ءۇمىتپەن اتتاندىرعان بوكسشىمىز گاليب جافاروۆ الەمنىڭ ازۋلى بىلعارى قولعاپ شەبەرلەرىنە جوندەم قارسىلىق كورسەتە المادى. 2008 جىلى وتكەن بەيجىڭ وليمپياداسىنا تاعى دا بوكسشى گاليب جافاروۆقا جانە دزيۋدوشى سالامات وتارباەۆقا سەنىم ارتىلدى. نە بابى كەلىسپەدى, نە باعى جانبادى – بۇل جولى دا ۇلكەن جارىسقا ۇكىلەپ قوسقان بوكسشىمىز دا, دزيۋدوشى سالامات وتارباەۆ تا مىقتىلار قاتارىنان كورىنە المادى. ەكەۋى دە الەمدىك جارىستاردا جارقىراي كورىنگەنىمەن, وليمپيادادا السىزدىك تانىتتى.
ەندىگى ماقسات قايتكەندە دە ءۇستىمىزدەگى جىلى وتەتىن XXX جازعى لوندون وليمپياداسىندا اقتوبەلىك سپورتشىلاردى مەيلىنشە كوبىرەك قاتىستىرۋ بولاتىن. قازىر بەلگىلى بولعانىنداي, بۇل وليمپيادادا وبلىس نامىسىن زىلتەمىرشى فارحاد حاركي مەن سۋدا جۇزۋدەن الەكساندر ترابرين قورعايتىن بولدى. تاعى ءبىر قۋانىشتى ءجايت – وليمپيادانىڭ شارشى الاڭدارىندا وتەتىن بوكسشىلاردىڭ باسەكەسىنە حالىقارالىق دارەجەدەگى ايۆا تورەشىسى ر.رىسپاەۆتىڭ قازىلىق ەتەتىنى. بۇل جەرلەسىمىزگە كورسەتىلگەن ۇلكەن سەنىم ەكەنى ءسوزسىز. بۇعان دەيىن ءارتۇرلى الەمدىك جانە حالىقارالىق بوكس جارىستارىندا تورەشىلىك ەتىپ, تاجىريبە جيناقتاعان ر.رىسپاەۆ بۇل جولى دا ءادىل قازىلىق ەتىپ, ابىرويعا بولەنەدى دەگەن سەنىم مول.
ءبىز وبلىستىق سپورت جانە تۋريزم باسقارماسىنىڭ باستىعى اسىلبەك قۇلماعامبەتوۆكە جولىعىپ, وليمپياداعا قاتىساتىن سپورتشىلاردىڭ دايىندىعى جايلى سىر تارتقانبىز. ول لوندون وليمپياداسىنا دايىندىقتىڭ جان-جاقتى ويلاستىرىلىپ ۇيىمداستىرىلعانىن جەتكىزدى. سپورتشىلاردى دايىنداۋ بىلتىر پايدالانۋعا بەرىلگەن وسى زامانعى زامان تالابىنا ساي جابدىقتالعان وليمپيادا رەزەرۆىن دايارلاۋ ورتالىعىندا وتكىزىلگەنىن ايتتى. ولاردىڭ وليمپياداعا دايىندىعى وبلىستىڭ جانە قازاقستان رەسپۋبليكاسىنىڭ باس جاتتىقتىرۋشىلارىنىڭ باسشىلىعىمەن جۇرگىزىلگەن. وقۋ-جاتتىعۋ جيىندارىنا جانە سپورتشىلاردىڭ رەسپۋبليكالىق جانە حالىقارالىق جارىستارعا قاتىسۋ شىعىندارىنا وبلىستىق بيۋدجەتتەن جەتكىلىكتى قارجى بولىنگەن. وليمپيا ويىندارىنا قاتىسۋدان ۇمىتكەر بولعان 15 سپورتشىعا اي سايىن قارجىلاي قولداۋ كورسەتىلگەن. بۇل ماقساتقا وبلىستىق بيۋدجەتتەن 1 456 200 تەڭگە جۇمسالعان.
– وليمپيا ويىندارىنا دايىندىق – بۇل ءۇزىلىسسىز جۇرەتىن ۇدەرىس. وليمپياداعا قاتىساتىن ءبىر سپورتشىنى دايارلاۋ ءۇشىن كەمى ون جىل ۋاقىت كەرەك. ۇلكەن سپورتتان جافاروۆ, شاحاروۆ, وتارباەۆ قول ۇزگەن سوڭ, جاستاردى شىعارۋعا دەن قويدىق. سوندىقتان ءبىز بولاشاققا باعىتتالعان جوسپارلى جۇمىس جۇرگىزۋدەمىز. بولاشاق وليمپياداشىلاردى تاربيەلەۋ ءۇشىن ءبۇگىنگى كۇنمەن جۇمىس ىستەۋ ناتيجە بەرمەيتىنى بەلگىلى. سوندىقتان ەرتەڭگى وليمپياداشىلاردى دايارلاپ شىعارۋ ءۇشىن سپورت الەمىنە ەندى-ەندى اياق باسقان بالعىن سپورتشىلاردىڭ تاجىريبە جيناۋىنا, شىڭدالۋىنا كوڭىل بولۋدەمىز. ال ول ءۇشىن بۇقارالىق سپورتتى دامىتۋ باستى نازاردا ۇستالۋدا. «جۇيرىكتەن جۇيرىك وزار جارىسقاندا» دەپ حالقىمىز بەكەر ايتپاسا كەرەك. وسى باعىتتا وبلىستا سوڭعى جىلدارى سپورت الاڭدارى, ستاديوندار, مانەجدەر, تەننيس كورتتارى, باسسەيندەر, باسقا دا سپورت ورىندارى كوپتەپ سالىنىپ, سپورتپەن اينالىسۋشىلاردىڭ يگىلىگىنە قىزمەت ەتۋدە. وبلىستا ءبىراز ىلگەرىلەۋ بار. ءبىزدىڭ وڭىردەن دە الەمدىك جانە وليمپيادالىق سپورت ويىندارىنا قاتىسۋشىلار قاتارى ارتا تۇسەتىنىنە سەنىم مول, – دەيدى اسىلبەك قۇلماعامبەتوۆ.
بۇرىن وبلىس سپورت تۇرلەرىنىڭ دامۋ كورسەتكىشتەرىنىڭ رەيتينگى بويىنشا سوڭعى ورىنداردا بولسا, قازىر بەل ورتادان بەرىك ورىن الىپ وتىر. سونداي-اق, ەلباسىنىڭ بۇقارالىق سپورتپەن حالىقتىڭ 30 پايىزىن قامتۋ جونىندەگى تاپسىرماسىنىڭ ورىندالۋى دا كوڭىل توعايتادى. قازىر وبلىس حالقىنىڭ 22,9 پايىزى سپورتپەن اينالىسادى. وبلىستا نەگىزىنەن دزيۋدو, سامبو, گرەك-ريم كۇرەستەرى, بوكس, ۋ-شۋ, كاراتە جاقسى دامىپ وتىر.
ونىڭ ايتۋىنشا, قازىرگى وليمپياداشىلاردان باسقا گرەك-ريم كۇرەسىنەن ەلىمىزدىڭ چەمپيونى اسحات قۇدايبەرگەنوۆ, كۇرەستىڭ وسى تۇرىنەن جاسوسپىرىمدەر اراسىنداعى ەلىمىزدىڭ ءتورت دۇركىن جەڭىمپازى, ازيا جانە الەم چەمپيونى مەيرامبەك ايناعۇلوۆ, سۋدا جۇزۋدەن ازيا چەمپيونى رۋسلان بايمانوۆ, ايەلدەر كۇرەسىنەن 2011 جىلعى قازاقستان كۋبوگىنىڭ جەڭىمپازى, ەل چەمپيونى, 2012 جىلعى ازيا چەمپيوناتىنىڭ قولا جۇلدەگەرى ايجان ىسماعۇلوۆا, گرەك-ريم كۇرەسىنەن ەل چەمپيونى, تۇركى تىلدەس ستۋدەنتتەردىڭ اراسىنداعى الەم ءبىرىنشىلىگىنىڭ جەڭىمپازى اسەت ءادىلوۆ, ەركىن كۇرەستەن ازيا چەمپيوناتىنىڭ قولا جۇلدەگەرى عاني ىزماعامبەتوۆ, دزيۋدودان ازيا چەمپيوناتىنىڭ كۇمىس ءجۇلدەگەرى ايگۇل بايقۇلوۆا, بوكستان ازيا بىرىنشىلىگىنىڭ قولا جۇلدەگەرى كامران شاحۆۋسارلى, دزيۋدودان قازاقستان چەمپيوناتىنىڭ كۇمىس جۇلدەگەرى قالجان تايجانوۆ, كونكي سپورتىنان ەل چەمپيوناتىنىڭ كۇمىس جۇلدەگەرى ەۆگەنيا ساۆينا بولاشاعىنان ءۇمىت كۇتتىرەتىن جاستار. ۇلكەن سپورتتا كەتكەن ەسەنى تۇگەلدەۋگە باعىتتالعان جوسپارلى جۇمىستىڭ ءناتيجەسىندە الداعى وليمپيادالاردا ونەر كورسەتىپ قالار دەگەن سپورتشىلاردىڭ ءبىر شوعىرى وسىلار.
ال لوندون وليمپياداسىنا قاتىسۋعا جولدامالاردى جەڭىپ العان اۋىر اتلەت فارحاد حاركي مەن سۋدا جۇزگىش الەكساندار ءترابريندى وبلىس اكىمى ارحيمەد مۇحامبەتوۆ جەكە قابىلداپ, 500 مىڭ تەڭگە كولەمىندە قارجىلاي قولداۋ كورسەتتى. وليمپياداعا قاتىسۋشىلاردىڭ ەڭبەك ۇجىمدارىندا, جوعارى جانە ورتا وقۋ ورىندارىندا كەزدەسۋلەرى ۇيىمداستىرىلىپ, اقتوبەلىكتەر ولاردى ۇكىلى ۇمىتپەن شىعارىپ سالدى. وليمپياداشىلار قازىر جاتتىقتىرۋشىلارىمەن بىرگە الداعى جان الىپ, جان بەرىسەتىن سپورت دوداسىنا الاڭسىز دايىندالۋدا.
– الداعى لوندون وليمپياداسىنا وبلىستان اتتانىپ بارا جاتقان زىلتەمىرشى فارحاد حاركي مەن سۋدا ءجۇزۋشى الەكساندر ترابريننەن ءۇمىتىمىز مول. ولاردىڭ ءبىزدىڭ وبلىستىڭ نامىسىن قورعاعانىنا ءۇش-ءتورت جىلدىڭ ءجۇزى بولدى. وسىنداي الەمدىك جانە وليمپيا ويىندارىنا قاتىسىپ جۇرگەن سپورتشىلاردى تارتۋ ارقىلى جاستاردىڭ سپورتقا دەگەن قۇلشىنىسىن وياتۋدى ماقسات ەتىپ وتىرمىز. شىندىعىندا دا, وسى سپورت تۇرلەرىمەن اينالىسۋشىلار قاتارى كوبەيە تۇسۋدە. ال جەرگىلىكتى سپورتشىلار ولارعا قاراپ بوي تۇزەيدى, سولارداي بولۋعا تالپىنادى, – دەيدى اسىلبەك قۇلماعامبەتوۆ.
الەكساندر ترابرين رەسەيدىڭ استراحان وبلىسىندا تۋعان. ول 2010 جىلى كۇزدە وليمپيادا رەزەرۆىن دايارلاۋ ورتالىعىمەن ينتەرنەت ارقىلى بايلانىسقا شىعىپ, سول كەزدەن باستاپ وسىندا جاتتىعىپ جۇرگەن كورىنەدى. ونىڭ جاتتىقتىرۋشىسى ازامات سارباسوۆتىڭ مالىمدەۋىنشە, وسى ۋاقىتتان بەرى 50, 100 جانە 200 مەترگە جۇزۋدەن ەل رەكوردىن بىرنەشە رەت جاڭارتىپتى. پاۆلوداردا وتكەن قازاقستان پرەزيدەنتىنىڭ كۋبوگى جولىنداعى جارىستا 100 مەتر, ال قازاقستان قۇراماسى ساپىندا 4ح100 مەتر قاشىقتىقتا ەستافەتالىق شالقالاپ جۇزۋدەن ليتسەنزيا قۇقىن بەكىتتى. ا.ترابرين 200 مەتر قاشىقتىقتا وليمپيادالىق ءنورماتيۆتى ورىندادى.
– 100 مەترلىك قاشىقتىقتا لوندون وليمپياداسىندا جارتىلاي فينالعا شىعۋ ۇلكەن جەتىستىك بولار ەدى. بۇل الەمدەگى ون التىنشى كورسەتكىش بولماق. ارينە, ا.ءترابريننىڭ جۇرەك تۇكپىرىندە بۇدان دا جاقسى كورسەتكىشكە جەتۋ جاتقانى انىق. الايدا, باسەكە كۇشتى, قارسىلاستار دا قاراپ قالمايدى. 100 جانە 200 مەتر قاشىقتىققا جۇزۋدە 140-قا جۋىق سپورتشى باق سىناسادى دەپ كۇتىلۋدە. «ارىق ايتىپ, سەمىز شىعىپ» جاتساق, ەلىمىزگە ابىروي بولاتىنىن دا تۇسىنەمىز. سپورتشىنى قولداپ قانا قويماي, ونىمەن بىرگە جيىنداردا جۇرگەن اقتوبەلىكتەرگە دە جاعداي جاساپ وتىرعان وبلىستىق سپورت جانە تۋريزم باسقارماسىنا ريزاشىلىعىمىز شەكسىز, – دەيدى الەكساندر ترابريننىڭ جاتتىقتىرۋشىسى ازامات سارباسوۆ.
ال لوندون وليمپياداسىنا قاتىسۋعا جولدامانى جەڭىپ العان ەكىنشى سپورتشى شتانگاشى فارحاد حاركي – قىتايدا تۋىپ-وسكەن, دۇنگەن حالقىنىڭ وكىلى. قىتايلىق سپورتشى «سنپس-اقتوبەمۇنايگاز» اكتسيونەرلىك قوعامىنىڭ ارقاسىندا اقتوبەگە كەلدى. كومپانيا قىتاي اۋىر اتلەتيكا مەكتەبىنىڭ وكىلىن وليمپيادا قارساڭىندا وبلىسقا الدىردى. قىتاي حالىق رەسپۋبليكاسىندا اۋىر اتلەتيكا جاقسى دامىعان, اسىرەسە, ولار جەڭىل سالماقتا كۇشتى.
– لەگيونەرلەردىڭ ەكىنشى ەلدىڭ نامىسىن قورعاۋىندا تۇرعان ەشتەڭە جوق. ونىڭ ۇستىنە فارحاد حاركيدىڭ ۇلتى – دۇنگەن, ءدىنى – مۇسىلمان. رەسەيدىڭ ەركىن كۇرەس شەبەرلەرى الەمنىڭ 25-تەن استام ەلىنەن جينالعان, ازەربايجان زىلتەمىرشىلەردى بولگاريادان, مانەرلەپ سىرعاناۋشىلاردى اقش-تان الدىرىپ جۇرگەن جوق پا. ف.حاركي ءالى الەمدىك اۋىر اتلەتيكا ارەناسىندا «جۇمباق» سپورتشى, ءمۇمكىندىگى مول. ونىڭ شەبەرلىگىن ۇلتتىق قۇرامانىڭ باس جاتتىقتىرۋشىسى الەكسەي ني مەن تۇركيادان كەلگەن كەڭەسشى ءانۋار تۇركەلەري شىڭداۋدا. حاركيدىڭ جاسى نەبارى 21-دە. وليمپيادادان كەيىن اقتوبەدە قالادى. بۇل وڭىردە اۋىر اتلەتيكانىڭ قارقىندى دامۋىنا قوزعاۋ سالادى دەپ ويلايمىز. الەمدىك دەڭگەيدەگى دزيۋدوشى اسحات شاحاروۆتىڭ تابىسىنان كەيىن كوپتەگەن دزيۋدوشىلار ءوسىپ شىقتى. ال ەرماحان ىبىرايىموۆ پەن گاليب جافاروۆتى ۇلگى تۇتقان قانشاما جاس بوكسشىلار بوكس زالدارىنا كەلدى. «بولماساڭ دا ۇقساپ باق, ءبىر عالىمدى كورسەڭىز», دەپ ۇلى اباي اتامىز ايتقانداي, الەمگە ايگىلى سپورتشىلاردىڭ ۇلگىسى ارتتارىنان جاڭا تولقىن جاستاردى ىلەستىرەتىنى ءسوزسىز. قازىردىڭ وزىندە 18-19 جاستاعى ءبىر توپ سپورتشىمىز برازيليانىڭ ريو-دە جانەيرو قالاسىندا وتەتىن كەلەسى XXXI وليمپياداعا قاتىسۋعا باعىت ۇستاۋدا, – دەيدى وبلىستىق سپورت جانە تۋريزم باسقارماسىنىڭ باستىعى اسىلبەك قۇلماعامبەتوۆ.
اقتوبەلىكتەر قوس ساڭلاق سپورتشىنىڭ لوندون وليمپياداسىندا بابى كەلىسىپ, باعى جانۋىنا تىلەكتەس كوڭىلدە. ولاردىڭ وليمپيادادان ولجالى ورالاتىندارىنا سەنىمدى. جەرلەستەرىنىڭ سەنىمىنەن قاناتتانعان سپورشىلاردىڭ بيىكتەردەن كورىنۋگە مۇمكىندىكتەرى مول. ولاي بولسا, ءالىپتىڭ ارتىن باعىپ, وليمپيادانىڭ جارىس جولدارىنا كوز تىگەيىك, اعايىن.
ساتىبالدى ءساۋىرباي,
«ەگەمەن قازاقستان»
اقتوبە وبلىسى.
