ءۇش التىن جۇلدەدەن ءۇمىت بار
بەيسەنبى, 19 ءساۋىر 2012 7:36
وليمپياداعا 99 كۇن قالدى
وسى اپتادا ۇكىمەت ۇيىندە قازاقستان سپورتشىلارىنىڭ بيىلعى ححح جازعى وليمپيا ويىندارىنا دايىندىعى قارالدى.
بۇل ماسەلە بويىنشا سپورت جانە دەنەشىنىقتىرۋ ىستەرى اگەنتتىگىنىڭ توراعاسى تالعات ەرمەگياەۆ بايانداما جاساپ, وليمپياداعا جولداما العان سپورتشىلار مەن باپكەرلەردىڭ دايىندىعى تۋرالى حابارلادى.
بەيسەنبى, 19 ءساۋىر 2012 7:36
وليمپياداعا 99 كۇن قالدى
وسى اپتادا ۇكىمەت ۇيىندە قازاقستان سپورتشىلارىنىڭ بيىلعى ححح جازعى وليمپيا ويىندارىنا دايىندىعى قارالدى.
بۇل ماسەلە بويىنشا سپورت جانە دەنەشىنىقتىرۋ ىستەرى اگەنتتىگىنىڭ توراعاسى تالعات ەرمەگياەۆ بايانداما جاساپ, وليمپياداعا جولداما العان سپورتشىلار مەن باپكەرلەردىڭ دايىندىعى تۋرالى حابارلادى.
جيىندا اگەنتتىك توراعاسى الدىمەن ليتسەنزياعا يە بولعان سپورتشىلارمەن تانىستىردى. قازىر ءبىزدىڭ قىز-جىگىتتەرىمىز جارىستىڭ 16 تۇرىنەن 74 جولدامانى يەلەنۋدە. وسىلاردىڭ ىشىندەگى ەڭ كوبىن سۋ دوبىنان ۇلتتىق قۇرامامىز جەڭىپ الدى. بۇل جولدامانى ولار بيىل جاپونيانىڭ چيبا قالاسىندا وتكەن ازيا چەمپيوناتىندا يەلەندى. سول كەزدە سەرگەي دروزدوۆ جاتتىقتىراتىن ءبىزدىڭ ەرلەر قۇراماسى ءبىرىنشى ورىن الىپ, لوندون وليمپياداسىنا بەرىلەتىن جالقى جولداماعا يە بولدى. وسى جەردە ايتاتىن نارسە, بۇل باسەكەدە ءبىزدىڭ جىگىتتەرمەن بىرگە قىزدارىمىز دا باق سىناسقان ەدى. الايدا, ولاردان گورى جىگىتتەردىڭ جولى بولدى. ءسويتىپ, ءبىزدىڭ ەرلەر قۇراماسى بەيجىڭ وليمپياداسىنا الا الماعان ليتسەنزيانى يەلەنىپ, ەندى 13 ادام بولىپ لوندون تورىندە وزگە ەلدەردىڭ مىقتىلارىمەن كۇش سىناسادى.
جالپى, وليمپياداعا جولدامالار سانى كوپ رەتتە وسىنداي سۋ دوبى سياقتى كوماندالىق سپورت تۇرلەرىنەن ليتسەنزيا يەلەنگەن ۇجىمدارعا بايلانىستى بولادى. ماسەلەن, بەيجىڭ وليمپياداسىندا وتانداستارىمىز سپورتتىڭ 23 تۇرىنەن 100-دەن استام جولداماعا يە بولدى دەسەك, سونىڭ ءبىرازى گاندبول (14), ۆولەيبول (12) سياقتى سپورت ءتۇرلەرى مەن جەڭىل اتلەتيكا (19), سۋعا ءجۇزۋ (12), بوكس (10), اۋىر اتلەتيكا (9) سىندى جارىستاردا ەنشىلەگەن ليتسەنزيالارعا بايلانىستى بولعانى بەلگىلى. دەسەك تە, قازىرگى جاعدايىمىز دا جامان ەمەس. الدا ءالى 9 شىلدەگە دەيىن سپورتتىڭ 25 تۇرىنەن جولدامالار ساراپقا سالىنادى. سول كەزدە ءبىزدىڭ قىز-جىگىتتەرىمىزدىڭ قامشىنى باسىپ, لوندونعا باراتىن ارىپتەستەرىنىڭ قاتارىن تولتىراتىنىنا سەنگىمىز كەلەدى. ال ازىرشە قولدا 74, ويدا 100-دەن اسا جولداما بار. وسى جەردە ءبىر اتتەگەن-ايىن دا ايتساق دەيمىز. ءبىزدىڭ جاڭا ايتقان گاندبول, ۆولەيبولدان بەيجىڭگە بارعان ۇلتتىق قۇرامالارىمىز بۇل جولى تۇماندى البيوندا وتەتىن وليمپياداعا قاتىسا المايدى. ليتسەنزيالىق جارىستاردا جەڭىلگەن ولاردىڭ جولى وسىلاي بوگەلدى. ءبىزدىڭ ەلدەن كوپ ليتسەنزيا العانداردىڭ ءبىرى – جەڭىل اتلەتشىلەرىمىز بولىپ وتىر. ولگا رىپاكوۆا, دميتري كارپوۆ باستاعان اتلەتتەرىمىز 12 جولداماعا يەلىك ەتۋدە. بۇل سىنعا سولتۇستىك قازاقستان وبلىسىنان ەرلى-زايىپتى يرينا مەن ەۆگەني ەكتوۆتاردىڭ جانە بولاشاعىنان كوپ ءۇمىت كۇتتىرەتىن ايمان قوجاحمەتوۆانىڭ دا قاتىساتىندارىن اتاپ وتكەن ءجون. جالپى, مۇنداي وقيعالار وليمپيا ويىندارىندا ءجيى بولا بەرمەيدى. كەشەگى كەڭەس وداعى كەزىندە دە ەرلى-زايىپتى سپورتشىلار ءبىر ەلدىڭ اتىنان تورتجىلدىقتىڭ باستى باسەكەسىنە كوپ شىعا بەرمەيتىن ەدى. ال مىنا وقيعا قازاقستان سپورتىنىڭ شەجىرەسىنە جازىلاتىن وقيعا بولعالى وتىر. ودان كەيىن وليمپياداعا باپكەر مىرزاعالي ايتجانوۆتىڭ بوكستان ۇلتتىق قۇراماسى – 9, يليا يلين, مايا مانەزا, سۆەتلانا پودوبەدوۆا, زۋلفيا چينشانلو سيياقتى زىلتەمىرشىلەرىمىز جارىسقا 8 ليتسەنزيانى يەلەنۋدە. ءبىزدىڭ ەركىن, گرەك-ريم كۇرەسىنىڭ بالۋاندارى دا بەس-التى جولدامانى جەڭىپ الدى. ايتسە دە, ولاردىڭ قورجىندى تولتىرۋعا ءالى ءمۇمكىندىكتەرى بار. وسى ورايدا, جيىندا اگەنتتىك ءتوراعاسى سپورتشىلارىمىزدىڭ الداعى ءۇش ايدا, ياعني 9 شىلدەگە دەيىن وتەتىن جارىستاردا جولدامالار سانىن كوبەيتۋ ءۇشىن بار كۇش-جىگەرلەرىن سالاتىندارىن ايتتى. سونداي-اق, ول قىز-جىگىتتەرىمىزدىڭ الدىنا ليتسەنزيانى الىپ قويماي, وليمپيادادا جوعارى ناتيجە كورسەتۋگە مىندەت قويىلىپ وتىرعانىن جەتكىزدى. مۇندا ت.ەرمەگياەۆ بيىلعى وليمپيادادا سپورتشىلارعا كەمىندە 3 التىن جۇلدەنى جەڭىپ الۋ مىندەتى جۇكتەلگەنىن, ال جالپى, ەلىمىز لوندون ءتورىندە 13-تەن استام مەدال ۇتىپ الۋدى جوسپارلاپ جاتقانىن, بۇل ناتيجە جالپىكوماندالىق ەسەپتە ۇزدىك 30 ەلدىڭ قاتارىنا كىرۋگە مۇمكىندىك بەرەتىنىن مالىمدەدى. وسى رەتتە ول اۋىر اتلەتيكا, گرەك-ريم, ەركىن كۇرەس, ايەلدەر كۇرەسى, دزيۋدو مەن بوكسقا اسا زور ءۇمىت ارتىلىپ وتارعانىن اتاپ ءوتتى. ونىڭ ايتۋىنشا, سپورتتىڭ بۇل تۇرلەرىنەن قازاقستان وليمپيادا سايىن قۇرمەت تۇعىرىنان كورىنىپ كەلەدى. ولار ءبىزدىڭ ءداستۇرلى ءۇمىت ارتاتىن سپورت تۇرلەرىنە اينالعان. سوندىقتان بۇل جولعى جارىستا دا ەلىمىز ناق وسى سپورت تۇرلەرىنە باسىمدىق بەرىپ, سولاردان التىن مەدال مەن باسقا دا جۇلدەلى ورىنداردى كۇتەتىن بولادى. دەسەك تە, ت.ەرمەگياەۆ جيىندا سپورتشىلاردىڭ وليمپياداعا دايىندىعى جوسپارلى, جۇيەلى تۇردە جۇرگىزىلىپ جاتقانىمەن, ۇكىمەت تاراپىنان قوسىمشا قارجى كەرەكتىگىن ايتتى. وسىعان وراي ول ۇكىمەتتەن لوندون وليمپياداسىنا سپورتشىلاردى دايىنداۋعا قوسىمشا 997 ملن. تەڭگە سۇرادى. ونىڭ ايتۋىنشا, اگەنتتىك «سامۇرىق-قازىنا» قورىمەن وليمپياداعا سپورتشىلاردى دايىنداۋ ءۇشىن وسىنشاما كولەمدە قارجىلاندىرۋ ماسەلەسىن ازىرلەگەن. اگەنتتىك توراعاسى وسى ماسەلەگە بايلانىستى ۇكىمەت باسشىسىنا باستامانى قولداۋدى ءوتىنىپ, مۇنداي تاجىريبەنىڭ الەمنىڭ بارلىق سپورتتىق دەرجاۆالارىندا قولدانىلاتىنىن جەتكىزدى. تاعى ءبىر ايتاتىن نارسە, بىزدە وليمپياداعا كوبىنە 6 ءوڭىردىڭ وكىلدەرىنىڭ باراتىنى بەلگىلى. مىسالى, استانا, الماتى قالالارى مەن قاراعاندى وبلىسىنان وليمپياداعا سپورتشىلاردىڭ 60 پايىزى بارسا, قالعان وبلىستاردان جارىسقا 40 پايىز عانا سپورتشىلار قاتىسادى. جيىندا وسى ماسەلە دە ءسوز بولىپ, ت.ەرمەگياەۆ وزگە وڭىرلەرگە وليمپياداعا قاتىساتىن سپورتشىلاردىڭ سانىن كوبەيتۋ كەرەكتىگىن ەسكەرتتى. سونىمەن بىرگە ول دوپينگكە قارسى ۇلتتىق ورتالىقتى قۇرۋ ماسەلەسىن دە كوتەرىپ, قازىر وسىنداي مەديتسينالىق وردانىڭ بولماۋىنان سپورتشىلاردىڭ جارىستارعا دايىندىعىندا ءبىراز قيىندىقتار بولىپ جاتقانىن, سوندىقتان, مۇنداي ورتالىق بيىل بولماسا دا بولاشاقتا سالىنسا دەگەن تىلەگىن ءبىلدىردى.
جيىندا تاعى ءبىر بەلگىلى بولعان نارسە, لوندون وليمپياداسىندا چەمپيون اتانعان سپورتشىعا 250 مىڭ اقش دوللارى بەرىلەتىن بولىپ شەشىلدى. بۇل قوماقتى سىياقىدان باسقا ەكىنشى ورىن العان وتانداستارىمىزعا 150 مىڭ, ءۇشىنشى ورىن يەگەرىنە 75 مىڭ, ءتورتىنشى ورىنعا تابان تىرەگەنگە 30 مىڭ, بەسىنشى ورىندى قانجىعاسىنا بايلاعانعا 10 مىڭ, ال التىنشى ورىندى قاناعات تۇتقانعا 5 مىڭ اقش دوللارى كولەمىندە سىياقى بەرىلەتىنى حابارلاندى.
سونداي-اق, جيىندا لوندون وليمپياداسىنا قازاقستان سپورتشىلارىنىڭ كيىمىن بەلگىلى ديزاينەر قۇرالاي نۇرقادىلوۆانىڭ جاسايتىنى بەلگىلى بولدى. ول كيىم سارى ءتۇس ارالاسقان كوگىلدىر تۇستەن تىگىلەدى ەكەن.
داستان كەنجالين.
