ساياسي ەليتا ۇلكەن ءۇمىت كۇتەدى

مەملەكەت باسشىسىنىڭ جار­لى­عىمەن قۇرىلعان اتالعان كوميس­سيا­نىڭ العاشقى وتىرىسى بىلتىرعى 9 قىر­كۇيەكتە وتكەن بولاتىن. سول ۋا­قىت­تان باستاپ ەلىمىزدىڭ توراعالىققا قاتىستى جاۋاپتى جۇمىستارى قار­قىندى تۇردە جۇزەگە اسىرىلىپ كە­لە­دى. “ەلباسى اتاپ وتكەندەي, ەقىۇ-عا توراعالىق قازاقستان مەم­لەكەتى ءۇشىن زور ماڭىزعا يە ۇلت­تىق سترا­تەگيالىق جوبا بولىپ سا­نالادى. بيىلعى جىلدىڭ 14 قاڭ­تارىندا ۆەناداعى تۇراقتى كەڭەس وتى­رىسىنداعى ءوزىنىڭ بەينەجول­داۋىن­دا قازاقستان باسشىسى نۇر­سۇلتان نازارباەۆ ەقىۇ الدىندا تۇرعان نەگىزگى قاۋىپ-قاتەرلەردى سي­پات­تاي كەلە, ولاردىڭ الدىن الۋ جول­دارىن جانە قازاقستان توراعا­لى­عىنىڭ ماڭىزدى باسىمدىقتارىن اي­قىنداپ بەردى. بۇل ۇيىم جاۋاپ­كەرشىلىگى كەڭىستىگىندەگى قاۋىپ-قا­تەر­لەرگە تالداۋ جاساۋدا, ەڭ الدىمەن ۇيىم ىشىندەگى “قاتىناستار ەكو­لوگياسىن” قالپىنا كەلتىرۋدە ەلىمىزدىڭ كوشباسشى ەكەندىگىن دالەلدەدى”, دەدى وتىرىستا سويلەگەن سوزىندە ق.ساۋداباەۆ. سونداي-اق, مەملەكەتتىك حاتشى – سىرتقى ىستەر ءمينيسترى ءوز ءسو­زىن­دە بۇل توراعالىقتىڭ مەملەكەتتى­لى­گىمىزدى نىعايتۋعا قىزمەت ەتەتىندىگىن اتاپ كورسەتتى. بۇل رەتتە ەقىۇ ال­دىندا تۇرعان ماسەلەلەر كۇردەلى ءارى ۇزاق مەرزىمدى سيپاتقا يە, سول سەبەپتى ۇيىمنىڭ جاڭاشا تۇرلەنىپ, وزگەشە جاندانۋى ءۇشىن قازاقستان تاراپىنان ۇلكەن جۇمىستار اتقا­رىلۋى ءتيىس. قازىرگى تاڭدا استانا وسى ۇدەرىستىڭ باستاماسى رەتىندە اتال­عان امبەباپ ينستيتۋتتىڭ جا­قىن بولاشاقتاعى ەۆوليۋتسيالىق دامۋىنىڭ نەگىزىن قالاۋدا. “بۇل تۇر­عىدا ءبىزدىڭ سەرىكتەستەرىمىز ۇيىمدى بۇگىنگى كۇننىڭ شىندىعىنا سايكەس بەيىمدەيتىن جانە قاۋىپ-قاتەرلەردىڭ الدىن الۋعا مۇمكىندىك بەرەتىن ەقىۇ ءسامميتىن وتكىزۋ تۋ­رالى ەلباسى باستاماسىن كوكەي­كەس­تى ءارى ۋاقتىلى قابىلدانعان شەشىم رەتىنە باعالاۋدا. سول سەبەپتى اتال­عان ءسامميتتىڭ وتكىزىلۋى قازاقستان­نىڭ حالىقارالىق ساحناداعى بەدە­لىن ەسەلەي تۇسپەك”, دەدى ق.ساۋدا­باەۆ. مەملەكەتتىك كوميسسيا وتى­رىسى كەزىندە مەملەكەتتىك حاتشى – سىرتقى ىستەر ءمينيسترى اتالعان باس­تامانىڭ ۇيىمعا مۇشە ەلدەر تا­راپىنان قولداۋعا يە بولعاندىعىن, قازىرگى تاڭدا بۇل ۇدەرىس ناقتى تۇردە جۇزەگە اسىرىلا باستاعاندىعىن جەتكىزدى. بۇگىندە ونى وتكىزۋ مەرزىمى جونىندە ءتيىستى كەڭەستەر جۇرۋدە. ماسەلەن, بيىلعى جىلدىڭ قاڭتار ايىندا “ۇشتىك” فورماتىندا ەقىۇ مەن ەۋروپالىق كەڭەس ارا­سىن­داعى كونسۋلتاتسيالاردىڭ ءبىرىنشى كەزەڭى جۇزەگە اسىرىلىپ, ەۋروپالىق كەڭەس پرەزيدەنتى ح. ۆان رومپەمەن, ەۋروپالىق كوميسسيا توراعاسى جوزە مانۋەل بار­روزۋ­مەن, ەۋرووداقتىڭ سىرتقى ىستەر جانە قاۋىپسىزدىك ساياساتى جونىندەگى جو­عارعى وكىلى ك.ەشتونمەن جانە ەۋروپالىق پارلامەنت توراعاسى ە.بۋزەكپەن ارنايى كەزدەسۋلەر وتكىزىلگەن. بۇل رەتتە ايرىقشا اتاپ وتەرلىگى – ول قازاقستاننىڭ توراعالىعى كەزىندە اۋعانستانداعى كۇردەلى ءما­سە­لەلەردىڭ كۇن تارتىبىنە ەنگىزىل­گەن­دىگى. ماسەلەن, بيىلعى جىلدىڭ قاڭ­تار ايىنىڭ سوڭىندا لوندوندا ۇيىمداستىرىلعان حالىقارالىق كونفەرەنتسياعا دا اۋعانستان ءما­سەلەسى وزەك بولعانىن ايتقان ءجون. ەقىۇ ءسامميتىنىڭ كۇن تارتىبىنە دە اۋعانستان ماسەلەسىنىڭ قويىلۋى ۇلكەن قولداۋ تابۋدا. وسىعان وراي, سامميتكە دەيىنگى دايىندىق ءما­سە­لەلەرىنە رەسەي, يسپانيا, فرانتسيا, يتاليا, تۇركيا سىندى مەملەكەت­تەر اتسالىسىپ, بيىلعى جىلدىڭ ماۋسىم ايىندا ناقتى ۇسىنىستار مەن باستامالار بەلگىلەنەتىن باس­تاپ­قى باياندامانى ازىرلەۋ ءتوڭى­رە­گىندە ەلشىلەر دەڭگەيىندە كەزدەسۋ­لەر ۇيىمداستىرىلا باستاعان. “وسى جىلدىڭ جاز ايىندا الماتىدا وتە­تىن سىرتقى ىستەر مينيسترلەرىنىڭ بەيرەسمي كەزدەسۋىندە ءسامميتتىڭ كۇن ءتارتىبى مەن وتكىزىلۋ مەرزىمىن بەكىتۋ كوزدەلىپ وتىر”, دەدى مەم­لەكەتتىك حاتشى – سىرتقى ىستەر ءمينيسترى. وسىلاي دەي كەلە, قانات ساۋداباەۆ ەلباسى مەن ەلىمىزدىڭ ۇيىمعا توراعالىعىنان ەقىۇ-عا مۇشە ەلدەردىڭ ساياسي ەليتاسى مەن ساراپشىلار توبى ۇلكەن ءۇمىت كۇتىپ وتىرعانىنا توقتالدى. “بۇل بىزگە ايرىقشا جاۋاپكەرشىلىك, ال مەملەكەتتىك قۇرىلىمدارعا جۇيەلى جانە ۇيلەسىمدى ارەكەت ەتۋدى جۇكتەيدى”, دەدى ق.ساۋداباەۆ ءسوزىن قورىتىندىلاي كەلە. بۇدان كەيىن جۇمىس توبى جەتەكشىلەرىنىڭ ەسەپتەرى تىڭدالدى. وتىرىس سوڭىندا كوميسسيانىڭ جۇمىسى قورىتىندىلانىپ, ارنايى حاتتاما قابىلداندى. وندا ءتيىستى مەملەكەتتىك ورگاندارعا جۇكتەلگەن ناقتى مىندەتتەر ايقىندالعان.