دۇركىرەپ وتكەن ءبىر نوسەر…
سارسەنبى, 10 قازان 2012 7:02
زايسان قالاسىندا قۇيرىقتى جۇلدىزداي ومىردەن ەرتە اعىپ وتكەن, قازىرگى قازاق پوەزياسىندا دۇركىرەپ وتكەن نوسەر جاڭبىرداي وزىندىك قولتاڭباسى بار اقىن, «الاش» سىيلىعىنىڭ يەگەرى نۇرلان ءماۋكەن ۇلىنىڭ ەسىمىن ەستە قالدىرۋ ءۇشىن ەلەۋلى شارالار ۇيىمداستىرىلدى. ءوڭىردىڭ ارداقتى ۇلىنا كوشە اتاۋى بەرىلىپ, سالتاناتتى جيىن بولىپ ءوتتى.
سارسەنبى, 10 قازان 2012 7:02
زايسان قالاسىندا قۇيرىقتى جۇلدىزداي ومىردەن ەرتە اعىپ وتكەن, قازىرگى قازاق پوەزياسىندا دۇركىرەپ وتكەن نوسەر جاڭبىرداي وزىندىك قولتاڭباسى بار اقىن, «الاش» سىيلىعىنىڭ يەگەرى نۇرلان ءماۋكەن ۇلىنىڭ ەسىمىن ەستە قالدىرۋ ءۇشىن ەلەۋلى شارالار ۇيىمداستىرىلدى. ءوڭىردىڭ ارداقتى ۇلىنا كوشە اتاۋى بەرىلىپ, سالتاناتتى جيىن بولىپ ءوتتى.
وسىناۋ شارادا زايسان اۋدانىنىڭ اكىمى سەرىك زاينۋلدين: «قازاق قاشاندا ەل اعاسىنا, قازىنالى قارتىنا, اقىلى اسقان جاسىنا جول بەرىپ, ايتقانىنان شىقپاي كەلە جاتقان حالىق. ارعى-بەرگى تاريحقا وي جىبەرسەك, ءسوز ۇستاعان پاراسات يەسىن, ەلىن جاقسىلىققا باستاعان تۇعىرلى تۇلعانى, ەلىنىڭ-جەرىنىڭ مارتەبەسىن اسقاقتاتىپ جۇرگەن ونەر ادامدارىن, ۇلتتىق ءۇردىستىڭ جالعاسى, بولاشاق جاس ۇرپاققا جەتكىزۋ ءبىزدىڭ باستى باعىتىمىز بولۋ كەرەك» دەگەن پىكىر ايتىپ, وسىنداي شارالاردىڭ وتۋىنە وبلىس اكىمى بەردىبەك ساپارباەۆتىڭ ۇيىتقى بولىپ, ۇنەمى نازاردا ۇستاپ وتىرعانىنا دا توقتالدى. ال ءوز كەزەگىندە ءسوز العان زايسان قالاسىنىڭ اكىمى مارات ءۋالي كوشە تۇرعىندارىنىڭ كەلىسىمى نەگىزىندە قابىلدانعان اۋداندىق ءماسليحات دەپۋتاتتارىنىڭ شەشىمىن كوپشىلىككە وقىپ بەرىپ, وسى كوشەنى ءجوندەۋگە 15 ملن. تەڭگەدەن استام قارجى جۇمسالعاندىعىن ايتتى. كوشەنىڭ اباتتانۋىنا زايساندىق كوپشىلىك ريزا. بۇل مارتەبەلى جيىنعا نۇرلان ماۋكەن ۇلىنىڭ كۋرستاس دوستارى مەن زامانداستارى – «ەگەمەن قازاقستان» رگ» اق ۆيتسە-پرەزيدەنتى ەركىن قىدىر, ەۋرازيا ۇلتتىق ۋنيۆەرسيتەتىنىڭ ۇستازى ايتمۇحانبەت ەسداۋلەتوۆ, «تۇركىستان» گازەتى باس رەداكتورىنىڭ ءبىرىنشى ورىنباسارى, جازۋشى جاڭابەك شاعاتاي, «قازاقستان» گازەتىنىڭ باس رەداكتورى سەرعازى مۇحتاربەك, «سەمەي تاڭى» گازەتىنىڭ ديرەكتورى – باس رەداكتور ريزا مولداشەۆا, بەلگىلى جۋرناليست ەرمۇرات باپي, جازۋشى تالعات كەڭەسباەۆ, قازمۋ-دىڭ وقىتۋشىسى, اجار بەيسەنباەۆا قاتىستى. سونىمەن قاتار, اقىننىڭ اناسى دامەش, جارى گۇلميرا, ەنەسى بيكامال جانە تۋىستارى دا تۇگەل جينالىپتى.
جيىن بارىسىندا استانا, الماتىدان كەلگەن نۇرلاننىڭ ومىردەگى, ونەردەگى دوستارى تەبىرەنە سويلەپ, ونىڭ شىعارمالارىنان ۇزىندىلەر وقىپ, ەستەلىكتەر ايتتى. جىلى لەبىزدەرىن ءبىلدىردى. سونىمەن قاتار, زايسان اۋدانىنىڭ قۇرمەتتى ازاماتى ب.جاپاروۆ, ارداگەر-ۇستاز م.بەكساتوۆ, كوشە تۇرعىنى گ.راجانوۆا, اۋداندىق ءماسليحاتتىڭ حاتشىسى د.ىدىرىشوۆ تا ءسوز ءسويلەدى. وسىناۋ جيىندا سەزىمگە تولى ساتتەر از بولمادى.
كۇزدىڭ ىزعارىنا قاراماستان مەكتەپ وقۋشىلارى اقىننىڭ ولەڭدەرىن شابىتپەن وقىدى. ال اۋداندىق مادەنيەت ءۇيىنىڭ ءارتىستەرى جينالعاندارعا ءان-جىردان شاشۋ شاشتى. نۇرلاننىڭ تۋىستارى قازاقتىڭ داستۇرىنە ساي مارقۇمعا قۇران-حاتىم ءتۇسىرىپ, اس بەردى. اس سوڭىنان اقىننىڭ جۋىردا عانا جارىق كورگەن «بويتۇمار» اتتى ولەڭدەر جيناعى قاتىسۋشى كوپشىلىككە تاراتىلدى.
نۇرلانداي ءبىرتۋار اقىندى قالىڭ ەلى, وقىرمان ۇمىتقان جوق. ەر ازاماتتارىنىڭ بىرلىگى, قۇلشىنىسىنىڭ ارقاسىندا نۇرلان ماۋكەن ۇلىنىڭ ەسىمى ءوزىنىڭ تۋعان جەرىندە دە قازاق ادەبيەتى الەمىندەگى ءتارىزدى ماڭگى جارقىراپ تۇرا بەرمەك.
قاليبەك التىباي.
شىعىس قازاقستان وبلىسى,
زايسان اۋدانى.
