اراققا اللا اتى ارالاستىرىلدى
جۇما, 6 ءساۋىر 2012 8:28
جۇرە بەرسەڭ, كورە بەرەسىڭ دەگەن. مىنە, مۇنى دا كوردىك.
بۇعان دەيىن شايتان سۋدىڭ شولمەگىنە ءال-فارابي بابامىزدىڭ, قاسيەتتى تۇركىستاننىڭ, كيەلى دومبىرانىڭ سۋرەتتەرى سالىنعانىن ەستىگەنبىز. وعان وراي قازاقستان مۇسىلماندارى ءدىني باسقارماسىنىڭ سالماقتى نارازىلىق سوزدەرى دە ايتىلىپ, جاميعاتتىڭ كوڭىلىن ءبىرشاما ورنىنا تۇسىرۋگە سەپتەسكەن ەدى. ايتسە دە, ءدال وسى جولعى سوراقىلىق ابدەن شەكتەن شىعىپ كەتتى.
جۇما, 6 ءساۋىر 2012 8:28
جۇرە بەرسەڭ, كورە بەرەسىڭ دەگەن. مىنە, مۇنى دا كوردىك.
بۇعان دەيىن شايتان سۋدىڭ شولمەگىنە ءال-فارابي بابامىزدىڭ, قاسيەتتى تۇركىستاننىڭ, كيەلى دومبىرانىڭ سۋرەتتەرى سالىنعانىن ەستىگەنبىز. وعان وراي قازاقستان مۇسىلماندارى ءدىني باسقارماسىنىڭ سالماقتى نارازىلىق سوزدەرى دە ايتىلىپ, جاميعاتتىڭ كوڭىلىن ءبىرشاما ورنىنا تۇسىرۋگە سەپتەسكەن ەدى. ايتسە دە, ءدال وسى جولعى سوراقىلىق ابدەن شەكتەن شىعىپ كەتتى.
اراققا اللا اتى ارالاستىرىلدى.
ادامدى الجاستىراتىن, اقىلدان اداستىراتىن اراققا اقتوبە قالاسىنداعى «گەوم» جاۋاپكەرشىلىگى شەكتەۋلى سەرىكتەستىگىنىڭ «بايتەرەك» (ايتقانداي, بۇل دا بۇگىندە ءبىزدىڭ مەملەكەتتىك برەندتەرىمىزدىڭ بىرىنە اينالعان ۇعىم) شولمەگىنىڭ قاعازىنا «تەك اللادان باسقا جەڭۋشى جوق» دەگەن ءسوز جازىلعان.
مۇنىڭ قاندايلىق ماسقارا ەكەندىگىن ايتۋدىڭ ءوزى ارتىق. بۇكىل ءدىن مۇسىلمان قاۋىمى شاريعاتتىڭ اراقتى جاساۋشىعا, تاسۋشىعا, ساتۋشىعا, اراقتان پايدا تابۋشىعا قالاي قارايتىنىن جاقسى بىلەدى. اقشا تابۋ ءۇشىن ەش نارسەدەن تايىنبايتىندار ەندى, مىنە, وسىعان دا جول بەرىپ وتىر.
«گەوم» سەرىكتەستىگىنىڭ باس ديرەكتورى اندرەي گووگە بۇل قادامعا يسلام ءدىنىن قورلاۋدى, بۇكىل مۇسىلمان قاۋىمىن مازاق ەتۋدى ادەيى ويلاستىرىپ باردى, قاساقانا ىستەدى دەپ ءوزىمىز انىق بىلمەيتىن نارسەنى ايتىپ, كۇناعا باتقىمىز كەلمەيدى. جاڭاعى ءسوزدەر ارابشا جازىلعاندىقتان, ونىڭ ماعىناسىن ويلاماعان دا شىعار. بىراق, جارناما ءۇشىن, كوزگە توسىن كورىنەتىن اراب ءارىپتەرىنىڭ اراقتا تۇرعانى تاڭدانىس, قىزىعۋشىلىق تۋعىزاتىنىن ءبىلىپ, وسىنداي جازۋدى ادەيى پايدالانۋى ابدەن مۇمكىن. قالاي بولعاندا دا بۇل – اۋىر ايىپ, ۇلكەن كۇنا.
بولار ءىس بولدى دەپ وتىراتىن جەر بۇل ەمەس. ءبىز وسى اقتوبەدەگى مۇسىلمان قاۋىمىنىڭ, سوناۋ الماتىدان حابارلاسىپ, اشۋ-ىزاسىن ءبىلدىرىپ جاتقان قازاقستان مۇسىلماندارى ءدىني باسقارماسىنىڭ الداعى كەزدە مۇنداي ماسقاراعا جول بەرمەۋدىڭ قامىن قاراستىرۋ عانا ەمەس, قاسيەتتىمىزگە كىر جۇقتىرماق بولعان وسى ءونىمنىڭ بارلىق ساۋدا نۇكتەلەرىندەگى ساتىلىمنان الىنىپ تاستالۋىن, وسىنداي وسپادارلىق ورىن العان مەكەمەنىڭ باسشىلىعى مۇسىلمان قاۋىمىنان كەشىرىم سۇراۋىن تالاپ ەتۋ ءجون دەپ بىلەمىز.
ساتىبالدى ءساۋىرباي,
اقتوبە وبلىسى.
