«100 جىلعا جۋىق تاريحى بار «قازاق» راديوسىنىڭ التىن قورىندا ساقتالعان رۋحاني مۇرالارىمىزدى جارىققا شىعارۋ وتە ماڭىزدى ءارى ەلەۋلى وقيعا دەپ ويلايمىن. تۇڭعىش پرەزيدەنتىمىز ن. نازارباەۆتىڭ « ۇلى دالانىڭ جەتى قىرى» دەپ اتالاتىن ماقالاسى وسى ەكى تومدىق جيناقتى شىعارۋعا تۇرتكى بولدى. ەڭ الدىمەن, بۇل جوبا ارقىلى بالالارىمىزدىڭ ساناسىنا بابالارىمىزدىڭ باي مۇراسىن سىڭىرەمىز», - دەدى قر اقپارات جانە قوعامدىق دامۋ ءمينيسترى داۋرەن اباەۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
اتالعان جيناققا Qazaq راديوسىنىڭ «التىن قورىندا» 1948 جىلدان بەرى ساقتالعان حالقىمىزدىڭ مادەني مۇرالارى, سان عاسىرلىق تاريحقا تولى شىعارمالارى – ەرتەگىلەر, باتىرلار جىرى, ايتىس ونەرى, شەشەندىك سوزدەر, جىر-داستاندار, كۇي-تەرمەلەر جانە ت.ب ەندى.
« ۇلى دالامىزدىڭ فولكلورىمەن وسكەن ۇرپاق ەشقاشان ۇتىلمايدى. ويتكەنى, ءبىزدىڭ ەرتەگىلەرىمىز, باتىرلار جىرى, اڭىزدارىمىزدا دا بابالار اماناتى, قازاقتىڭ بولمىسى بەينەلەنگەن. «دالا فولكلورىنىڭ انتولوگياسى» جيناعىنىڭ تاعى ءبىر ەرەكشەلىگى, بۇل كىتاپتىڭ ىشىندەگى ارنايى ديسكىلەرگە جازىلعان اندەر العاشقى ورىنداۋشىلاردىڭ ۇنىمەن تۇپنۇسقا قالپىندا ەنىپ وتىر», - دەدى داۋرەن اباەۆ.
جيناقتا ءحىح عاسىرداعى حالىق كومپوزيتورلارىنان ءان ۇيرەنىپ, ولاردىڭ ءبىزدىڭ زامانىمىزعا دەيىن ۇزىلمەي جەتۋىنە ۇلەس قوسقان بارلىق ونەرپاز قامتىلعان. اتاپ ايتقاندا, امىرە قاشاۋباەۆتىڭ “بالقاديشاسى”, “دۋدارايى”, “جالعىز ارشاسى” مەن “بەسقاراگەرى” بار. كەنەن ازىرباەۆتىڭ “كوك شولاعىن”, “بوزتورعايىن”, “بۇلبۇلعا” جانە “دومبىراسىن” تىڭداۋعا بولادى. ماناربەك ەرجانوۆ, قالي بايجانوۆ, بايعابىل جىلقىباەۆ سىندى داۋىلپاز جىرشىلاردىڭ ءانى دە وسى جيناققا ەنگىزىلگەن. كۇيگە كەلسەك, دينا نۇرپەيىسوۆا, جاپپاس قالامباەۆ, ابىكەن حاسەنوۆ پەن ماعاۋيا ءحامزيننىڭ ورىنداۋىنداعى قۇندى شىعارمالار توپتاستىرىلعان.
