كورمە-جارمەڭكە «كورمە» ورتالىعىندا 24 جانە 27 ءساۋىر ارالىعىندا جۇمىس ىستەيدى. بيىل اتالمىش شارا ءتورتىنشى رەت وتپەك.
Eurasian Book Fair 2019 كورمە-جارمەڭكەسىنە 13 ەلدىڭ 90 كومپانياسى قاتىسادى دەپ كۇتىلۋدە. ولاردىڭ اراسىندا رەسەي, ءازىربايجان, ارمەنيا, تاجىكستان, قىرعىزستان, وزبەكستان, تۇركيا, قىتاي, يران, پولشا, بەلگيا, لاتۆيا, ۋكراينا سىندى ەلدەر بار.
«فوليانت», «الماتى كىتاپ», «اتامۇرا», «مەكتەپ», «قازاق ەنتسيكلوپەدياسى» سياقتى قازاقستاننىڭ جەتەكشى باسپالارى, «مانن, يۆانوۆ ي فەربەر», «بەلىي گورود», «روزوۆىي جيراف», «كومپاسگيد», «ساموكات» سياقتى رەسەيلىك اتاقتى باسپالار قاتىسۋشىلاردىڭ قاتارىندا.
«حالىقارالىق كىتاپ كورمە-جارمەڭكەسىن وتكىزۋدىڭ باستى ماقساتى – كىتاپتى ناسيحاتتاۋ, قاتىسۋشىلاردىڭ ادەبي مۇراسىن دامىتۋ, وقىرمان مادەنيەتىن قالىپتاستىرۋ», – دەپ مالىمدەدى «قازمەديا ورتالىعىندا» وتكەن بريفينگتە قر مادەنيەت جانە سپورت مينيسترلىگىنىڭ مادەنيەت جانە ونەر ىستەرى دەپارتامەنتىنىڭ ديرەكتورى ءابىل جولامانوۆ.
ونىڭ ايتۋىنا قاراعاندا كورمە باعدارلاماسىندا 150-دەن استام ءىس-شارا, تۇساۋكەسەرلەر, ادەبي ەكسكۋرسيالار, پوەزيالىق باعدارلار, اۆتورلارمەن, باسپاگەرلەرمەن, سۋرەتشىلەرمەن, پوليگرافيستەرمەن وتەتىن كەزدەسۋلەر بار.
كورمە بارىسىندا كىتاپتاردى باسپا باعاسى بويىنشا ساتىپ الۋ مۇمكىندىگى قاراستىرىلعانىن ايتا كەتۋ كەرەك.
بالالار ءۇشىن شەبەرلىك ساباقتارى, كونكۋرستار, «اليسا عاجايىپتار ەلىندە» ەرتەگىسىنىڭ جەلىسى بويىنشا ۇيىمداستىرىلاتىن ينتەراكتيۆتى كۆەستەر, انيماتورلاردىڭ قاتىسۋىمەن وتەتىن ويىن-ساۋىق باعدارلامالار قاراستىرىلعان.
