پارتيالاستار الدىندا ءسوز العان Nur Otan پارتياسى ءبىرجان سال اۋداندىق فيليالىنىڭ توراعاسى, اۋدان اكىمى ەرمەك نۇعىمانوۆ ءوز وڭىرىندە «اۋىل – ەل بەسىگى» جوباسى اياسىندا اتقارىلىپ جاتقان جۇمىستارعا كەڭىنەن توقتالىپ, تارقاتىپ ايتىپ بەردى. ونىڭ ايتۋىنا قاراعاندا, اۋداندا «باستاۋ-بيزنەس» باعىتى بويىنشا سوڭعى ءۇش جىلدا 88 ادام 310 ميلليون تەڭگە كولەمىندە نەسيە الىپ, ءوز كاسىپتەرىن دوڭگەلەتىپ وتىر. نەسيە الۋشىلاردىڭ باسىم كوپشىلىگى جەر جاعدايىنا بايلانىستى مال شارۋاشىلىعىمەن اينالىسۋدا. بۇگىنگى زامان تالابىنا ساي اۋىل تۇرعىندارى 21 وندىرىستىك كووپەراتيۆ قۇرىپ, شارۋاشىلىق سالاسىن جاڭا دەڭگەيگە كوتەرۋدە. اۋىلداعى الەۋمەتتىك سالانى ماماندارمەن قامتاماسىز ەتۋ بارىسىندا «ديپلوممەن – اۋىلعا!» جوباسى بويىنشا اۋداننىڭ ەلدى مەكەندەرىنە 38 جاس مامان كەلىپ, ولاردىڭ بارلىعى مەملەكەتتىك قولداۋعا يە بولدى.
مەملەكەتتىك ماڭىزى بار ءتورت پارتيالىق جوبانىڭ ءبىرى – «باقىتتى وتباسى» جوباسى. بۇل جوبا بويىنشا شورتاندى اۋدانىندا اتقارىلىپ جاتقان اۋقىمدى ىستەر جايىن پارتيانىڭ اۋداندىق فيليالى توراعاسىنىڭ ءبىرىنشى ورىنباسارى احمەديا قوجامسەيىتوۆ بايانداپ بەردى. ماقساتتى الەۋمەتتىك كومەك الۋعا 11 وتباسى ءوتىنىش ءبىلدىرگەن. ولارعا 1 ميلليون 893 مىڭ تەڭگە كولەمىندە قاراجات ءبولىنگەن. پارتيانىڭ قوعامدىق قابىلداۋىنا الەۋمەتتىك ماسەلەلەر بويىنشا 18 كوپ بالالى انادان 23 ءوتىنىش ءتۇسىپ, ونىڭ 9-ى وڭ شەشىمىن تاپقان.
– پارتيا ۇيىمداستىرعان «ناۋرىز Challenge» اكتسياسى اياسىندا وبلىستىق, اۋداندىق ءماسليحات دەپۋتاتتارىمەن ءبىرلەسىپ 251 وتباسىنا 2,3 ميلليون تەڭگە كولەمىندە ماتەريالدىق كومەك كورسەتىلدى, – دەدى ءوز سوزىندە احمەديا قوجامسەيىتوۆ.
ال جاقسى اۋدانىندا «قۇتتى مەكەن» پارتيالىق جوباسىن جۇزەگە اسىرۋ ماقساتىندا 27 پاتەرلى تۇرعىن ءۇيدىڭ قۇرىلىسى جوسپارلانىپ قويعان. بۇل پاتەرلەر الەۋمەتتىك جاعىنان از قامتىلعان وتباسىلارىنا بەرىلەدى. سونداي-اق 2020 جىلى تاعى دا بىرنەشە تۇرعىن ۇيلەردىڭ قۇرىلىسى باستالماقشى.
جيىن سوڭىندا پارتيا ارداگەرى, مەتسەنات, ەسىل اۋدانىنىڭ قۇرمەتتى ازاماتى ءۋاليحان ءارىپوۆ ءسوز الىپ, الداعى سايلاۋدا ءار ادام ءوزىنىڭ ازاماتتىق ۇستانىمىن كورسەتىپ, ماڭىزدى ناۋقاننان تىس قالماۋعا شاقىردى. كونفەرەنتسيا قورىتىندىسى بويىنشا Nur Otan پارتياسىنىڭ كەزەكتەن تىس وتەتىن سەزىنە دەلەگاتتار سايلاندى.
اقمولا وبلىسى
