اقش سەناتى ۋكرايناداعى جاعدايدى ساراپقا سالىپ, بۇل ەلدە دەموكراتيا باعىتىنداعى وڭ وزگەرىستەر بارلىعىن اتاپ ءوتىپ, ونى قۇپتاعان شەشىم قابىلدادى. سىرت قاراعاندا بيلىكتەن كەتكەن ۆ.يۋششەنكو مەن يۋ.تيموشەنكولاردىڭ باتىستىق باعىتى اقش-قا جاقىنداۋ كورىنۋگە ءتيىس بولسا دا, ولاردىڭ پرەزيدەنت ۆ.يانۋكوۆيچتىڭ العاشقى قادامدارىن قۇپتاۋى ءبىراز جۇرتتى تاڭداندىردى.
بيلىكتەن كەتكىسى جوق
پولشا پرەزيدەنتى لەح كاچينسكي ەكىنشى مەرزىمگە سايلانۋ ءۇشىن كۇرەسكە قوسىلاتىنىن مالىمدەدى. ول “زاڭ جانە ادىلەتتىلىك” پارتياسىنان تۇسپەك. ارينە, وعان ەشقانداي تاڭدانۋدىڭ قاجەتى جوق سياقتى. ەل زاڭى وعان مۇمكىندىك بەرەدى. بىراق جۇرتتىڭ بۇعان نازار اۋداراتىن ءبىر جايى بار – كەيدە ول ۇكىمەت باسشىسىمەن دە ءتىل تابىسا الماي جاتادى. پرەمەر-مينيستر تۋسك بىردە ونى شەت ەلگە بارعاندا ۇشاعىنا مىنگىزبەي تاستاپ كەتكەنى بار. مۇنداي بەدەلىن تومەندەتىپ العان قايراتكەردىڭ جەڭىستەن ۇمىتتەنۋى قيىن.
سوعىس تۇتانعالى تۇر
يەمەن رەسپۋبليكاسى تىنىشسىز. جاقىندا عانا ەلدە قاقتىعىس بولىپ, قان توگىلدى. ءبىر جاعىنان ء“ال-كايدا” لاڭكەستىك ۇيىمى ب ۇلىك سالىپ جۇرسە, ەكىنشى جاعىنان وڭتۇستىك يەمەندى جەكە مەملەكەت ەتەمىز دەيتىن سەپاراتيستەر ۇنەمى باس كوتەرىپ جاتادى. كەزىندە ەل اۋماعىندا سولتۇستىك جانە وڭتۇستىك يەمەن دەگەندە ەكى مەملەكەت پايدا بولىپ, كەيىن بىرىككەننىڭ ءجون ەكەنىن ۇعىپ, قوسىلعان ەدى. بىراق وڭتۇستىك جاعى قايتا ءبولىنۋدى كوكسەپ ءجۇر. ساراپشىلاردىڭ پىكىرىنشە, سوعىس بولماي تىنبايتىن سياقتى.
“قۇتىرعان يتتەن” ساقتان
مولداۆيا پارلامەنتى جوعارعى سوت پالاتاسىنىڭ توراعاسى يون مۋرۋيانۋدى قىزمەتىنەن بوساتتى. وعان جسپ توراعاسىنىڭ جۋرناليستەرمەن ءتىل تابىسا الماعانى سەبەپ بولىپتى. مۋرۋيانۋ جۋرناليستەردىڭ سوت ءىسىن كوبىرەك سىناپ جازعانىنا وكپەلەپ, ولار كەيدە “قوعام ءۇشىن اسا قاۋىپتى قۇتىرعان يتكە اينالىپ كەتەدى” دەگەن مالىمدەمە جاساعان كورىنەدى. مۇنىمەن, ارينە, جۋرناليستەر كەلىسپەگەن. ءتىپتى مۋرۋيانۋ رەسمي تۇردە كەشىرىم سۇراعان ەكەن, بىراق وعان “قۇتىرعان يتتەر” كەلىسپەپتى.
مونوپولياعا قارسىلىق
ەۋروپانىڭ ىشىندە ورنالاسقان رەسەيدىڭ كالينينگراد وبلىس-انكلاۆىندا ساياسي پارتيالار بىرىگىپ, ء“بىزدىڭ كالينينگراد” وداعىن قۇرىپتى. وعان كومپارتيانىڭ, رلدپ-نىڭ, “ناشا روسسيا”, “پاتريوتى روسسي”, “سوليدارنوست”, “سپراۆەدليۆايا روسسيا” پارتيالارىنىڭ وكىلدەرى, سونداي-اق جەرگىلىكتى “سپراۆەدليۆوست” قوزعالىسى كىرىپتى. وداقتىڭ ۇيلەستىرۋشىسى, “سپراۆەدليۆوست” قوزعالىسىنىڭ جەتەكشىسى كونستانتين دوروشوكتىڭ ايتۋىنشا, بۇل كواليتسيانىڭ ماقساتى – “ەدينايا روسسيا” پارتياسىنىڭ ساياساتتاعى مونوپولياسىنا قارسى تۇرۋ. وسى تۇرعىدا ولار قاڭتاردا ايتارلىقتاي اۋقىمدى ميتينگ وتكىزگەن بولاتىن. ەندى 20 ناۋرىزدا تاعى دا ميتينگ وتكىزىپ, وعان 40-60 مىڭ ادام الىپ شىقپاق.
سويلەسكەنگە – ءولىم جازاسى
سولتۇستىك كورەياداعى ءبىر جۇمىسشى ءوزىنىڭ وڭتۇستىك كورەياعا قاشىپ كەتكەن جولداسىمەن قالتا تەلەفونمەن سويلەسكەنى ءۇشىن ءولىم جازاسىنا كەسىلىپتى. بالكىم, ول بۇل ءۇشىن جازالاناتىنىن بىلمەگەن دە شىعار. قالتا تەلەفونعا شەكارا توسقاۋىل بولا المايدى. دوس ادامعا كوڭىل كەرەك, حابارىن بىلگىسى كەلگەن بولار. تەك ول ءوز اڭگىمەسىندە كەتكەن دوسىنا ەلدە كۇرىشتىڭ قىمباتتاعانىن ايتقان ەكەن. سول ءسوز ونىڭ تۇبىنە جەتىپتى.
توقتاماساڭ – اتىلاسىڭ
قىرعىزستاننىڭ اتاقتى باتكەن وبلىسىنداعى قادامجاي اۋدانىندا شەكارا قىزمەتكەرى تالاپتى ورىنداماعان وزبەكستان ازاماتىن اتىپ ءولتىرىپتى. الدە باسىنعانى ما, الدە قاشىپ قۇتىلىپ كەتەمىن دەدى مە ەكەن, ايتەۋىر اۆتوكولىك جۇرگىزگەن وزبەكستان ازاماتى ەسكەرتىپ مىلتىق اتقانعا دا توقتاماپتى. سوندا كوزدەپ اتقان وقتان ول سول جەردە قايتىس بولادى, قاسىنداعى جولاۋشى جارالانادى. ادام ولگەن سوڭ, بۇل ىسكە ەكى جاقتىڭ رەسمي ورىندارى ارالاساتىنى انىق.
بوسقىن بالالار
بۇۇ-نىڭ بوسقىندار جونىندەگى جوعارعى كوميسسارياتى تاراتقان مالىمەتتەرگە قاراعاندا, وتكەن جىلى اۋعانستاننىڭ كامەلەتكە تولماعان 6 مىڭ جاسوسپىرىمىنەن ەۋروپا ەلدەرىنەن باسپانا سۇراپ, ءوتىنىش تۇسەدى. بۇل بۇرىنعى جىلداردان الدەقايدا كوپ. بۇۇ ساراپشىلارى شىن جاعداي بۇل رەسمي مالىمەتتەن كوپ جوعارى دەگەندى ايتادى. كوپتەگەن ءجاسوسپىرىم قايتارىپ جىبەرەدى دەگەن قاۋىپپەن رەسمي تۇردە باسپانا سۇرامايتىن كورىنەدى.
ازىرلەگەن ماماديار جاقىپ.
