اۋەجايدىڭ ديسپەتچەرلىك قىزمەتىنەن ءمالىم ەتكەندەي, اۋا رايىنىڭ قولايسىزدىعىنا بايلانىستى ۇشاقتاردى قابىلداۋ جانە اتتانۋ كەستەسىنە وزگەرىس ەنگىزىلدى. اتاپ ايتقاندا, تاڭعى 04:55-تە اۋەگە كوتەرىلۋى ءتيىس بولعان «اتىراۋ - امستەردام» رەيسىنىڭ ۇشاعى 19:05-كە كوشىرىلدى. ال الماتىدان ۇشىپ شىققان بورت اقتوبەگە قونعان. ساعات 14:20-دا استاناعا ۇشۋى ءتيىس بولعان رەيس 23:55-كە قالدىرىلدى. سونداي-اق «اتىراۋ - ورال» رەيسى توقتاتىلدى. بۇگىن ورىندالعان جالعىز جەرگىلىكتى رەيس - «اتىراۋ - تەڭىز» باعىتى بولدى.
ەسكە سالايىق, سەيسەنبى كۇنى اتىراۋدا نوسەرلى جاڭبىر باستالىپ, ول بۇگىن تاڭەرتەڭ تولاستادى. جاڭبىردان كەيىن اۋا تەمپەراتۋراسى كۇرت تومەندەپ, قالىڭ قار جاۋعان بولاتىن. اۋا رايىنىڭ قولايسىزدىعىنان, ءتىپتى, ءبىرىنشى اۋىسىمداعى وقۋشىلارعا ساباق بولعان جوق. ەلەكتر جەلىلەرىنە قار جابىسىپ قالعاندىقتان, سىمدار ءۇزىلدى. قالادا جانە قالا ماڭىنداعى ۇيلەرگە ەلەكتر بەرۋدى قالپىنا كەلتىرۋ ءۇشىن «اتىراۋ جارىق» اق-نىڭ 25 بريگاداسى جۇمىس ىستەپ جاتىر.
