قازاقستان رەسپۋبليكاسى پرەزيدەنتىنە ۇمىتكەرگە قويىلاتىن بارلىق تالاپتار وبەكتيۆتى, حالىقارالىق ستاندارتتارعا , ۇلتتىق زاڭناما تالاپتارىنا ساي كەلەدى. ماسەلەن قازاقستان رەسپۋبليكاسى كونستيتۋتسياسىنىڭ 41-بابى مەن 1995 جىلدىڭ 28 قىركۇيەگىندە قابىلدانعان «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 54-بابىنا سايكەس قزاقستان رەسپۋبليكاسىنىڭ پرەزيدەنتىنە بولىپ تۋمىسىنان رەسپۋبليكا ازاماتى بولىپ تابىلاتىن, قىرىق جاسقا تولعان, مەملەكەتتىك ءتىلدى ەركىن مەڭگەرگەن, قازاقستاندا سوڭعى ون بەس جىل بويى تۇراتىن جانە جوعارى ءبىلىمى بار ازامات كانديدات بولا الادى, دەدى رامازان سارپەكوۆ.
سونىمەن قاتار, ينستيتۋت ديرەكتورى قر پرەزيدەنتى كانديداتىنا وزگە دە تالاپتاردىڭ قويىلۋى مۇمكىن ەكەندىگىن اتاپ ءوتتى. اتاپ ايتقاندا, پرەزيدەنت لاۋازىمىن اتقارۋعا كەدەرگى كەلتىرەتىن اۋرۋىنىڭ جوق ەكەندىگىن ناقتىلاۋ ءۇشىن مەديتسينالىق كۋالاندىرۋ جۇرگىزىلەدى. ناتيجەسىندە كانديداتتىڭ دەنساۋلىعى تۋرالى مەديتسينالىق قورىتىندى راسىمدەلەدى. مۇنان بولەك, پرەزيدەنت كانديداتىنىڭ مەملەكەتتىك قىزمەتتە نە بولماسا سايلانبالى مەملەكەتتىك لاۋازىمدا كەمىندە 5 جىلدىق ەڭبەك ءوتىلى بولۋى ءتيىس.
بۇعان قوسا, كانديداتتىڭ سوڭعى 15 جىل قازاقستاندا تۇرعانى مەن مەملەكەتتىك ءتىلدى ەركىن مەڭگەرگەندىگىن ورتالىق سايلاۋ كوميسسياسى بەكىتكەن ەرەجەگە ساي ايقىندالادى. سوتتالعاندىعى بەلگىلەنگەن تارتىپپەن وتەلمەگەن نەمەسە الىپ تاستالماعان, سىبايلاس جەمقورلىق قىلمىس جانە سىبايلاس جەمقورلىق قۇقىق بۇزۋشىلىق جاساۋداعى كىناسىن سوت زاڭدا بەلگىلەنگەن تارتىپپەن تانىعان ادام قازاقستان رەسپۋبليكاسى پرەزيدەنتتىگىنە كانديدات بولا المايتىندىعىن دا بىلگەن ءجون, - دەدى ينستيتۋت باسشىسى.
