ادىلدىكتىڭ اتار تاڭى
سەيسەنبى, 12 ماۋسىم 2012 7:15
قۇقىق قورعاۋ ورگاندارى قىزمەتكەرلەرىن كەزەكتەن تىس اتتەستاتتاۋ شاراسى ناۋقاندىق سيپات الماعانى ءجون. ال ءتيىمدى ءناتيجەگە جەتۋ ءۇشىن مۇنداي تەكسەرىستەردى ۇنەمى ءارى جۇيەلى تۇردە ءجۇرگىزىپ, سونىمەن قاتار جەتىلدىرىپ وتىرۋ قاجەت. ارينە, ءبىر جىلدىڭ ىشىندە بارلىق قۇقىق قورعاۋ ورگاندارى قىزمەتكەرلەرىنىڭ دەنساۋلىق دايىندىعى مەن كاسىبي ءبىلىم دەڭگەيىن انىقتاپ الارمىز, بىراق ءار ماماننىڭ ادامگەرشىلىك, جەكە تۇلعالىق قابىلەتتەرىن كىم تەكسەرەدى, ادامنىڭ وسىنداي قوعام ءۇشىن ماڭىزدى قىرلارى ەسكەرىلمەي قالماي ما دەگەن سۇراق مەنى مازالايدى.
سەيسەنبى, 12 ماۋسىم 2012 7:15
قۇقىق قورعاۋ ورگاندارى قىزمەتكەرلەرىن كەزەكتەن تىس اتتەستاتتاۋ شاراسى ناۋقاندىق سيپات الماعانى ءجون. ال ءتيىمدى ءناتيجەگە جەتۋ ءۇشىن مۇنداي تەكسەرىستەردى ۇنەمى ءارى جۇيەلى تۇردە ءجۇرگىزىپ, سونىمەن قاتار جەتىلدىرىپ وتىرۋ قاجەت. ارينە, ءبىر جىلدىڭ ىشىندە بارلىق قۇقىق قورعاۋ ورگاندارى قىزمەتكەرلەرىنىڭ دەنساۋلىق دايىندىعى مەن كاسىبي ءبىلىم دەڭگەيىن انىقتاپ الارمىز, بىراق ءار ماماننىڭ ادامگەرشىلىك, جەكە تۇلعالىق قابىلەتتەرىن كىم تەكسەرەدى, ادامنىڭ وسىنداي قوعام ءۇشىن ماڭىزدى قىرلارى ەسكەرىلمەي قالماي ما دەگەن سۇراق مەنى مازالايدى.
مەن كەزىندە باس پروكۋروردىڭ كادر ماسەلەسى جونىندەگى ورىنباسارى قىزمەتىن اتقاردىم, سودان كوڭىلگە تۇيگەن ءبىراز جايتتەردى ايتىپ وتەيىن. قۇقىق قورعاۋ سالالارىندا مىقتى جۇيەلەنگەن ماماندار دايارلاۋ قىزمەتى جۇمىس ىستەۋ كەرەك, ولار ءار ماماننىڭ ءوزىنىڭ بەيىمدىلىگى مەن بىلىكتىلىگىنە قاراي قىزمەت باسپالداعىمەن كوتەرىلۋىن قاتاڭ قاداعالاپ وتىرۋلارى كەرەك. ياعني, قاراپايىم قىزمەتكەرلەر ادال قىزمەت ەتۋ بارىسىندا ۇلكەن بيىكتىكتەرگە قول جەتكىزەتىندەرىنە سەنىمدى بولۋلارى قاجەت, ال باسشىلىق ادىلدىك پەن تۋرا ءسوزدىڭ ادامى رەتىندە قولاستىنداعىلارعا ۇلگى بولعاندارى ءجون. ءبىر سوزبەن ايتقاندا, ءار قىزمەتكەر ءوزىنىڭ باسشىسىنا سەنۋى قاجەت.
بۇل ورايدا تاعى ءبىر اتاپ ايتار ءجايت, قۇقىق سالاسىندا قىزمەت اتقاراتىن ادامداردى جوو-دا كاسىبي ءبىلىم الىپ جۇرگەن كەزدەرىنەن تانىپ ءبىلۋ كەرەك جانە سول كەزدەردەن باستاپ وتان ءۇشىن, حالىق ءۇشىن ادال قىزمەت ەتۋگە تاربيەلەگەن دۇرىس.
قازىرگى كەزدە قۇقىق قورعاۋ ورگاندارى ماماندارىن اتتەستاتتاۋ قالاي ءوتىپ جاتقاندىعى تۋرالى ەلىمىزدىڭ بۇقارالىق اقپارات قۇرالدارىندا ايتىلىپ جاتىر. سونىڭ ىشىندە مەنى تاڭعالدىرعانى – مامانداردىڭ ارتىق سالماعى بولماۋى كەرەك دەگەن تالاپ. بۇل دەگەنىمىز ارتىق تالاپ, ويتكەنى ءار ادامنىڭ دەنە كۇشىنىڭ وزىندىك ەرەكشەلىگى بولادى, ونى ەسكەرۋ كەرەك, ەڭ باستى ەسكەرىلەتىن ءجايت ول ادامنىڭ كاسىبي دەڭگەيى مەن بىلىكتىلىگى تالاپقا ساي بولۋى قاجەت دەپ ەسەپتەيمىن. ارتىق سالماعىڭ بار دەپ جوعارى كاسىبي ءبىلىمى بار, ءوز ءىسىنىڭ شەبەرى اتانعان ماماندى اتتەستاتتاۋدان وتكىزبەۋ ابەستىك ەمەس پە. ەگەر مامان دەنساۋلىعىنا, ادالدىعىنا بايلانىستى قويىلاتىن تالاپتاردان وتە الماسا, وندا اڭگىمە باسقا. مەنىڭ ويىمشا, ءار مامانعا مۇقيات نازار اۋدارۋ قاجەت, ويتكەنى ءار ادامنىڭ ارتىندا وعان ءۇمىت ارتقان ونىڭ وتباسى تۇرادى, سونى ءبىرىنشى كەزەكتە ەسكەرۋىمىز كەرەك.
تاعى ءبىر الاڭداتاتىن ءجايت, ول – قولاستىندا قىزمەت اتقاراتىن قىزمەتكەرلەرىنىڭ جاۋاپسىزدىعى ءۇشىن ۇلكەن شەندەگى باستىقتاردى جۇمىستان شىعارۋ ءۇردىسىنىڭ بەلەڭ الۋى. بۇل ىسكە ءبىر جاقتى قاراۋعا بولمايدى, ەڭ ءبىرىنشى باسشى قىزمەتكەرلەردىڭ ءجيى قىزمەت ورنىن اۋىستىراتىنىن ەسكەرە وتىرىپ, زاڭسىزدىققا جول بەرگەن ماماندى سول باسشىنىڭ قىزمەتكە العان نەمەسە الماعانىن تەكسەرۋ قاجەت, ەگەر شىن مانىندە باسشىنىڭ سونداي بىلىكسىز ادامدى جۇمىسقا العانى انىقتالسا عانا جاۋاپقا تارتۋ كەرەك دەپ ەسەپتەيمىن. ياعني زاڭسىزدىق جاساعان ادامدى كىم جۇمىسقا الدى, كىم قولداپ وتىر, نەگە جاۋاپسىزدىققا جول بەردى دەگەن ماسەلەلەر جان-جاقتى تەكسەرىلۋى قاجەت. ال ءومىر بويى ەلى ءۇشىن ادال ەڭبەك ەتىپ, شىنايى ىسكەرلىگىمەن, كاسىبي بىلىكتىلىگىمەن كوزگە ءتۇسىپ ۇلكەن مانساپقا قول جەتكىزگەن باسشىنى قولاستىنداعى قىزمەتكەردىڭ اقىماقتىعى ءۇشىن جاۋاپقا تارتىپ, ءبىر ساتتە جوعارعى مانسابىنان ايىرۋ شارتىمەن كەلىسە المايمىن.
قۇقىق قورعاۋ ورگاندارى تاراپىنان دا كوپتەگەن زاڭسىزدىقتاردىڭ ورىن العانىن جاسىرۋدىڭ قاجەتى جوق, بۇل سالا ماماندارىنىڭ شەكتەن شىققان ارەكەتتەرى مەن جاۋاپسىزدىقتارى قوعامدا ۇلكەن داۋ-داماي تۋدىردى. قازىرگى كەزدە ولاردىڭ ءوز قىزمەتتەرىن اسىرا پايدالانىپ, جەڭۇشىنان جالعاسقان سىبايلاس جەمقورلىقتىڭ باس كوتەرۋىنە سەبەپشى بولىپ وتىرعاندارى كوپشىلىككە ءمالىم. اسىرەسە, قوعامدا وراسان كەڭ ەتەك جايعان وسى جەمقورلىقتىڭ بوي بەرمەي بارا جاتقاندىعىن اشىق ايتپاسقا بولمايدى, بۇل – زاڭ بۇزۋشىلىقتىڭ ەڭ قاۋىپتى ءتۇرى, ول مەملەكەتتىك بيۋدجەتتىڭ جانە جەكەمەنشىك م ۇلىكتىڭ تونالۋىنا جول اشادى, ەلىمىزگە كەلەتىن ينۆەستورلاردىڭ جولىن جاۋىپ, ولاردىڭ بىزگە دەگەن سەنىمىن جويادى. جەمقورلىقتان ەڭ ۇلكەن زيان شەگەتىن, دەموكراتيالىق ستاندارتتار بويىنشا تۇرمىس دەڭگەيى ورتاشا دەپ ەسەپتەلەتىن تۇرعىنداردىڭ نەگىزگى بولىگىن قۇرايتىن شاعىن جانە ورتا بيزنەس سالاسى, قازىرگى كەزدە وسى اتالعان سالالار قۇقىق قورعاۋ ورگاندارىنىڭ ءجۇيەسىز تەكسەرىستەرىنەن باس كوتەرە الماي وتىر.
سوندىقتان دا جەمقورلىقپەن كۇرەس ماسەلەسىندە قۇقىق قورعاۋ ورگاندارىنىڭ قىزمەتكەرلەرى ءۇشىن ەڭ باستى ولشەم – ار تازالىعى بولۋى كەرەك, ياعني ولار ەشقانداي اقشاعا ساتىلمايتىن جاندار بولۋى ءتيىس. ارينە, قۇقىق قورعاۋ ورگاندارى جەمقورلىقپەن جالعىز وزدەرى كۇرەسە المايدى, بۇل باعىتتا مەملەكەت پەن قوعام بىرلەسە جۇمىستار اتقارۋى كەرەك. ەڭ ءبىرىنشى كەزەكتە اتقارىلاتىن شارا – جەمقورلىق جايلاعان مەكەمەلەر, ولاردىڭ كەسىرىنەن قوعام مەن مەملەكەتكە كەلتىرىلگەن شىعىندار جانە ت.ب. زارداپتار كولەمى جايلى اقپاراتتاردى ەلىمىزدىڭ بۇقارالىق اقپارات قۇرالدارى ۇنەمى تاراتىپ وتىرۋلارى قاجەت.
قايرات ءجۇسىپوۆ,
3-دارەجەلى مەملەكەتتىك ادىلەت كەڭەسشىسى.
