بىلىكسىز كادرلاردان ارىلماي بولمايدى
بەيسەنبى, 19 ءساۋىر 2012 7:53
ەلباسىمىز ن. نازارباەۆتىڭ «قازاقستان رەسپۋبليكاسى قۇقىق قورعاۋ ورگاندارىنىڭ قىزمەتكەرلەرىن كەزەكتەن تىس اتتەستاتتاۋدان وتكىزۋ تۋرالى» جارلىعى دەر كەزىندە قابىلدانعان قۇجات دەپ بىلەمىن. مۇنداي اۋقىمدى شارا ەلىمىزدە العاش رەت وتكىزىلىپ وتىرعانىنا قاراماستان, العا قويعان ءمان-ماقساتى جاعىنان ماڭىزى وتە زور. ءويتكەنى, اتالمىش سالا بويىنشا قوردالانىپ قالعان پروبلەمالار ءالى دە كوپ.
بەيسەنبى, 19 ءساۋىر 2012 7:53
ەلباسىمىز ن. نازارباەۆتىڭ «قازاقستان رەسپۋبليكاسى قۇقىق قورعاۋ ورگاندارىنىڭ قىزمەتكەرلەرىن كەزەكتەن تىس اتتەستاتتاۋدان وتكىزۋ تۋرالى» جارلىعى دەر كەزىندە قابىلدانعان قۇجات دەپ بىلەمىن. مۇنداي اۋقىمدى شارا ەلىمىزدە العاش رەت وتكىزىلىپ وتىرعانىنا قاراماستان, العا قويعان ءمان-ماقساتى جاعىنان ماڭىزى وتە زور. ءويتكەنى, اتالمىش سالا بويىنشا قوردالانىپ قالعان پروبلەمالار ءالى دە كوپ.
سولاردىڭ ءبىرى بىلىكتى كادر, ءوز ءىسىن جەتىك مەڭگەرگەن مامان جايىنا قاتىستى. بۇل ماسەلە توڭىرەگىندە وي قوزعاساق, كەڭەستىك زامانداعى قۇقىق قورعاۋ ورگانى قىزمەتكەرلەرىنىڭ سىمعا تارتىلعانداي ءتۇر-تۇلعاسىن, ىشكى جان دۇنيەسىن ءسوز ەتپەي بولمايدى. جۇرتشىلىق بۇل سالا وكىلدەرىن الا ءجىپتى اتتاپ وتپەيتىن ادىلدىگى ءۇشىن شىن پەيىلىمەن سىيلايتىن, ولار زاڭنان قيا اتتامايتىن. قازىر زاڭعا ەمەس, كىمنىڭ قولى ۇزىن, كىم باي, سوعان تاۋەلدى سەكىلدى. نەگە؟ ويتكەنى, بۇگىنگى قۇقىق قورعاۋ قىزمەتكەرىنىڭ قاتارىن «زامانىنا قاراي امالىن تاپقان» كەزدەيسوق ادامدار كوبەيتىپ جىبەرگەن. ۇكىمەت بەرگەن وكىلەتتىلىك پەن بيلىكتى جەكە باسىنا شەكسىز پايدالانىپ, الدىنا نەشە ءتۇرلى ساۋالدارمەن, وتىنىشتەرمەن كەلگەندەردى ۇرشىقشا ۇيىرۋگە ءتوسەلىپ العان. ارينە, ءبارىن كىنالاۋدان اۋلاقپىز. بىراق «ءبىر قارىن مايدى ءبىر قۇمالاقتىڭ ءشىرىتۋى» بايقالادى. بىرەۋ ايتىپتى عوي, «قارنىمنىڭ اشقانىنا ەمەس, قادىرىمنىڭ قاشقانىنا ناليمىن» دەپ. سول ايتقانداي, قادىرىن كەتىرىپ جۇرگەن – وزدەرى. ءوزدەرى دەپ وتىرعانىم – پروكۋراتۋرا, قارجى پوليتسياسى, كەدەن, ىشكى ىستەر سالاسىنىڭ وكىلدەرى. يىعىنا پوگون ىلگەندەردىڭ ءوزدەرى سىبايلاس توپ قۇرىپ, قىلمىسكەر بولىپ شىقسا, تامىر-تانىستىق جولىمەن جىلى ورىنداردى يەلەنىپ وتىرسا, كاسىپتىك بىلىكسىزدىك تانىتىپ جاتسا, بالىقتىڭ باستان شىرىگەنى وسى بولماي ما؟ قازىر شيكىوكپە, بوزوكپەلەر قۇقىق قورعاۋ ورگانىنىڭ جالىنا جارماسۋعا ەش يمەنبەيدى. قولىنان كەلە مە, ءبىلىمى جەتە مە – شارۋاسى جوق. بار ويلارى – الدىمەن ورنالاسىپ الايىن, سوسىن ءبىر ءجونى بولار. بىردە جۇمىس بابىمەن ءبىر كۇشتىك قۇرىلىمعا بارا قالدىم. «قالقام, باستىعىڭا جولىعايىن دەپ ەدىم» دەپ ءجونىمدى ايتا بەرگەنىم سول ەدى, جوق, تەز ايتىڭىز, اسىعىسپىن دەپ تۇيەدەن تۇسكەندەي سولق ەتكىزدى. «تەاتر كيىم ىلگىشتەن باستالادى» دەگەندەي, كىرمەي جاتىپ مىناسى ەتەگىمنەن السا, شەنى ۇلكەن, قىزمەتى جوعارى باستىعى قانداي ەكەن دەپ قاتتى نالىدىم.
بىردە وبلىستىق پروكۋراتۋرانىڭ جىلدىق ەسەبىن وقىپ وتىرىپ, جاعامدى ۇستادىم. ۇمىتپاسام, م.جۇماباەۆ اۋدانىندا بولۋ كەرەك, ىشكى ىستەر ورگانىنىڭ تەرگەۋشىسى جاق سۇيەگى, بىرنەشە قابىرعاسى سىنعان ادامدى ءوزى قۇلاپ, جاراقات الدى دەگەن قورىتىندى شىعارىپتى. كەيىن انىقتالعانداي, ونى بىرنەشە ادام تەپكىلەپ ۇرعان. بىرنەشە كۋالاردىڭ بولعانىنا قاراماستان باسقاشا ۇيعارىم شىعارۋى اتقاراتىن لاۋازىمىنا مۇلدەم سايكەسسىزدىگىن تانىتىپ تۇرعان جوق پا؟ ايىرتاۋ اۋدانىندا بولعان مىنا وقيعا تالايىمىزدىڭ جاعامىزدى ۇستاتتى. ىشكى ىستەر ورگانىنىڭ ەكى قىزمەتكەرى اراققا سىلقيا تويىپ العاننان كەيىن ءتۇن ورتاسى اۋا الدەبىر ازاماتتىڭ ۇيىنە كەلىپ, اڭگىر-تاياق ورناتقان. ونىڭ سوڭى ادام ولىمىنە ۇرىندىرعان. مەنى قۇقىق قورعاۋ ورگاندارى قىزمەتكەرلەرىنىڭ جۇمىسقا ورنالاسپاي جاتىپ-اق, شەتەلدىك كولىك مىنەتىنى, ءزاۋلىم ءۇي سالاتىنى الاڭداتپاي قويمايدى. دەمەك, جەڭ ۇشىنان جالعاسقان جەمقورلىق تىيىلماي وتىر دەگەن ءسوز. سوندىقتان اتتەستاتتاۋ كەزەكتى ناۋقانعا اينالماس ءۇشىن ونىڭ قۇرامىنا قوعامدىق ۇيىم وكىلدەرى, ارداگەرلەر, جاستار كوپتەپ تارتىلعانى ءجون. ءويتكەنى, مۇنداي سىناق كەزىندە اتتەستاتتاۋدان ءوتۋشىنىڭ ادامگەرشىلىك قاسيەتتەرى دە جان-جاقتى ساراپتاۋدان بارىنشا اشىق تۇردە ءوتىپ, بىرجاقتىلىققا ءۇزىلدى-كەسىلدى تىيىم سالىنۋى ءتيىس.
ارينە, ءبىر اتتەستاتتاۋ ارقىلى بارلىق قۇقىق قورعاۋ ورگاندارىنداعى كادر ماسەلەسىن شەشۋ قيىن. دەسەك تە, وسىنداي ءسۇزگىلەۋدى ءجيى ۇيىمداستىرىپ تۇرسا, سالا تازارىپ, ءوز ىسىنە بارىنشا ادال ادامدارمەن تولىعا تۇسەرى كۇمانسىز.
بولات ساعىندىقوۆ, سولتۇستىك قازاقستان وبلىستىق اقساقالدار القاسىنىڭ توراعاسى.
سولتۇستىك قازاقستان وبلىسى.
