زاڭدىلىقتى قاتاڭ قاداعالاۋ تاپسىرىلدى
بەيسەنبى, 1 ناۋرىز 2012 7:30
ەلىمىزدەگى زاڭدىلىقتىڭ ساقتالۋىندا پروكۋرورلاردىڭ ىقپالى قاشاندا ايرىقشا ەكەندىگى بەلگىلى. بۇل ورايدا قۇزىرلى ورگاننىڭ تەكسەرىسى كوپتەگەن كەمشىلىكتەردىڭ بەتىن اشىق تا, اشىپ تا كورسەتىپ كەلەدى. سونىڭ ءبىرى ماسەلەن, پروكۋرورلىق تەكسەرۋ قورىتىندىسى ناتيجەسىندە اشىلعان قىلمىستىق قۋدالاۋ ورگانى مەن ساراپتاۋ مەكەمەلەرى تاراپتارىنان جىبەرىلگەن كوپتەگەن زاڭ بۇزۋشىلىقتار بولىپ وتىر. مىنە, وسى ماسەلەلەردى ارقاۋ ەتكەن القا ءماجىلىسى كەشە باس پروكۋراتۋرادا بولىپ ءوتتى.
بەيسەنبى, 1 ناۋرىز 2012 7:30
ەلىمىزدەگى زاڭدىلىقتىڭ ساقتالۋىندا پروكۋرورلاردىڭ ىقپالى قاشاندا ايرىقشا ەكەندىگى بەلگىلى. بۇل ورايدا قۇزىرلى ورگاننىڭ تەكسەرىسى كوپتەگەن كەمشىلىكتەردىڭ بەتىن اشىق تا, اشىپ تا كورسەتىپ كەلەدى. سونىڭ ءبىرى ماسەلەن, پروكۋرورلىق تەكسەرۋ قورىتىندىسى ناتيجەسىندە اشىلعان قىلمىستىق قۋدالاۋ ورگانى مەن ساراپتاۋ مەكەمەلەرى تاراپتارىنان جىبەرىلگەن كوپتەگەن زاڭ بۇزۋشىلىقتار بولىپ وتىر. مىنە, وسى ماسەلەلەردى ارقاۋ ەتكەن القا ءماجىلىسى كەشە باس پروكۋراتۋرادا بولىپ ءوتتى.
وعان ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ, ۇلتتىق قاۋىپسىزدىك كوميتەتىنىڭ, ىشكى ىستەر, ادىلەت جانە دەنساۋلىق ساقتاۋ مينيسترلىكتەرىنىڭ, كەدەندىك باقىلاۋ كوميتەتىنىڭ باسشىلارى قاتىستى. وندا قىلمىستىق قۋدالاۋ ورگاندارى سوت ساراپتاماسىن تاعايىنداۋ كەزىندە تۋىندايتىن ماسەلەلەر مەن 2011 جىلداعى سىبايلاس جەمقورلىق قىلمىستارى بويىنشا سوت-تەرگەۋ ءتاجىريبەسى ءجانە پروكۋرورلىق قاداعالاۋدىڭ جاي-كۇيى تۋرالى كەڭىنەن ءسوز بولدى. القا جۇمىسىنا باس پروكۋرور اسحات داۋىلباەۆ توراعالىق ەتتى.
قىلمىستىق قۋدالاۋ ورگانى مەن ساراپتاۋ مەكەمەلەرى تاراپتارىنان جىبەرىلگەن كوپتەگەن زاڭ بۇزۋشىلىقتاردىڭ تۋىنداۋىنا سەبەپ بولىپ وتىرعان ءجايت, كوبىنە, دەر كەزىندە ساراپتاما تاعايىنداماۋ سالدارىنان قىلمىستى اشۋعا سەپتىگىن تيگىزەتىن ايعاقتاردىڭ جويىلۋ دەرەكتەرى ەكەن. بۇعان بۇرىن دا ايتىلىپ كەلە جاتقانداي, تەرگەۋشىلەر مەن انىقتاۋشىلاردىڭ كاسىبي دەڭگەيىنىڭ تومەندىگى باستى پروبلەما بولىپ وتىر. ونى ساراپتاما تاعايىنداۋ تۋرالى قاۋلىلار مەن نەگىزسىز تاعايىندالعان ساراپتامالار كورسەتكەن. وسىعان بايلانىستى القا ساراپتاما تاعايىنداۋ مەن جۇرگىزۋ ءتارتىبىن ساپالى تۇردە قايتا قاراۋ جانە ونتايلاندىرۋ, ساراپتاما مەكەمەلەرى مەن قۇقىق قورعاۋ ورگاندارىنىڭ ءوزارا ءىس-قيمىل نىساندارىن جەتىلدىرۋ, ساراپتاما زەرتتەۋلەرىنىڭ تاعايىندالۋى جانە جۇرگىزىلۋىنە ۆەدومستۆولىق باقىلاۋدى قامتاماسىز ەتۋ قاجەتتىگىن اتاپ كورسەتتى.
ساراپتاما جۇرگىزۋدىڭ ناقتى كورسەتكىشتەرىن ازىرلەۋ, ولاردى نەگىزسىز تاعايىنداۋ دەرەكتەرىن جويۋ, زەرتتەۋدىڭ زاماناۋي جانە ناقتى ادىستەرىن جۇرگىزۋ اياسىن بەلسەندى تۇردە كەڭەيتۋ, زەرتحانالاردىڭ ماتەريالدىق بازاسىن جاقسارتۋ ۇسىنىلدى. پروكۋرورلارعا تەرگەۋ جانە انىقتاۋ ورگاندارى مەن ساراپتاما مەكەمەلەرىنىڭ قىزمەتىنە قاداعالاۋدى كۇشەيتۋ, ساراپتاما تاعايىنداۋ جانە جۇرگىزۋ كەزىندە قىلمىستىق پروتسەسكە قاتىسۋشىلاردىڭ قۇقىقتارىن بۇزۋ فاكتىلەرىنىڭ دەر كەزىندە جولىن كەسۋ تاپسىرىلدى.
سونداي-اق, وتىرىستا سىبايلاس جەمقورلىق قىلمىستارى بويىنشا قىلمىستىق ىستەردى تەرگەۋ جانە سوتتا قاراۋ كەزىندە ءجيى ورىن الاتىن كەمشىلىكتەر تالقىلاندى. ماسەلەن, قىلمىستىق قۋدالاۋ ورگاندارى سىبايلاس جەمقورلىققا قاتىستى قىلمىستار بويىنشا كۇدىكتىنى ۇستاۋ كەزىندە ازاماتتاردىڭ كونستيتۋتسيالىق قۇقىقتارى مەن بوستاندىقتارىنىڭ بۇزىلۋىنا جول بەرىلەتىندىگى اتاپ كورسەتىلدى. ءبىر فاكتى بويىنشا بىرنەشە قىلمىستىق ءىس قوزعاۋ ءجيى كەزدەسەدى, ناتيجەسىندە اتالعان ساناتقا قىلمىستىڭ سىبايلاس جەمقورلىققا جاتپايتىن قۇرامدارى دا ەنەدى دە, قىلمىستىق جاۋاپكەرشىلىككە كىناسىز ادامدار تارتىلادى.
كەيبىر جاعدايلاردا قىلمىستىق قۋدالاۋ شەڭبەرىنە بولماشى قىلمىستار جاساعان ادامدار ىلىگەدى, ال جۇيەلى سىبايلاس جەمقورلىق قىلمىستارى قۇقىق قورعاۋ ورگاندارىنىڭ نازارىنان تىس قالادى. نەگىزىنەن انىقتالعان قىلمىستاردىڭ سانىنا باعدارلانعان قولدانىستاعى سىبايلاس جەمقورلىققا قارسى كۇرەستىڭ تيىمدىلىگىن باعالاۋ جۇيەسى سىبايلاس جەمقورلىقپەن كۇرەستىڭ شىنايى بەينەسىن كورسەتپەيدى, كورسەتكىشتەردىڭ جاساندى تۇردە ارتۋىنا سەبەپ بولادى. وسىنداي ءجايت سالدارىنان سوتتالۋشىلاردى اقتاۋ, ءىستى قوسىمشا تەرگەۋگە قايتارۋ نەمەسە اقتالاتىن نەگىزدەرمەن قىسقارتۋ, سىبايلاس جەمقورلىققا قاتىستى قىلمىستاردى باسقا قىلمىستارعا سارالاۋعا جول بەرىلەدى.
القا قورىتىندىسى بويىنشا قۇقىق قورعاۋ جانە سوت ورگاندارىنا سىبايلاس جەمقورلىق قىلمىستارى تۋرالى قىلمىستىق ىستەردى قوزعاۋدىڭ زاڭدىلىعى مەن نەگىزدىلىگىنە ۆەدومستۆولىق باقىلاۋدى كۇشەيتۋ ءۇشىن پارمەندى شارالار قابىلداۋ, تەرگەۋ ساپاسىن ارتتىرۋ, وسى ساناتتاعى ىستەر بويىنشا زاڭسىز سوت اكتىلەرىن شىعارۋعا ىقپال ەتەتىن سەبەپتەر مەن جاعدايلاردى جويۋ, تەرگەۋ امالدارىنىڭ ساپالى جۇرگىزىلۋىنە باسشىلاردىڭ دەربەس جاۋاپكەرشىلىگىن ارتتىرۋ ۇسىنىلدى. بۇعان قوسا ءار سوتتالۋشىنى نەگىزدى اقتاۋ, قىلمىستىق ءىستى قوسىمشا تەرگەۋگە قايتارۋ نەمەسە قايتا سارالاۋ دەرەكتەرى بويىنشا تيىستى شارالار قابىلداي وتىرىپ, ەگجەي-تەگجەيلى قاراۋ قاجەتتىلىگى اتاپ كورسەتىلدى.
ءسويتىپ, اۋماقتىق پروكۋرورلارعا تەرگەۋ زاڭدىلىعىنا جانە تەرگەۋ ورگانىنىڭ سىبايلاس جەمقورلىققا قاتىستى قىلمىستىڭ جاسالعانى تۋرالى ارىزدار مەن حابارلامالاردىڭ ارقايسىسى بويىنشا دەر كەزىندە زاڭدى شەشىم قابىلداۋىنا قاداعالاۋدى كۇشەيتۋ, بارلىق قوزعالعان قىلمىستىق ىستەر بويىنشا ءمان-جايدىڭ جان-جاقتى, تولىق جانە وبەكتيۆتى تەكسەرىلۋىن قامتاماسىز ەتۋ تاپسىرىلدى.
الەكساندر تاسبولاتوۆ.
