ۇلكەننىڭ كورىنبەگەنى بىردەن كوزگە تۇسەدى
جۇما, 14 قىركۇيەك 2012 7:39
قىتايدا عانا ەمەس, ەل توراعاسىنىڭ ورىنباسارى, الدا سول توراعالىققا تاعايىندالاتىنى رەسمي تۇردە ايقىن بولعان سي ءتسزينپيننىڭ ءبىرازدان بەرى كوپشىلىك الدىنا شىقپاعانى بۇكىل الەمدە ءتۇرلى-ءتۇرلى اڭگىمەلەرگە ارقاۋ بولىپ وتىر.
جۇما, 14 قىركۇيەك 2012 7:39
قىتايدا عانا ەمەس, ەل توراعاسىنىڭ ورىنباسارى, الدا سول توراعالىققا تاعايىندالاتىنى رەسمي تۇردە ايقىن بولعان سي ءتسزينپيننىڭ ءبىرازدان بەرى كوپشىلىك الدىنا شىقپاعانى بۇكىل الەمدە ءتۇرلى-ءتۇرلى اڭگىمەلەرگە ارقاۋ بولىپ وتىر.
قاي ەلدە بولماسىن ءبىرىنشى باسشىنىڭ سايلانۋى – ايرىقشا وقيعا. ال الەمدەگى جەتەكشى ەلدەردىڭ باسشىسى كىم بولاتىنى سول الەمگە ورتاق وقيعاداي. ويتكەنى, الەمدىك ۇلكەن ساياسات سول ەلدەرگە, ونىڭ باسشىلارىنا تىكەلەي بايلانىستى. سودان دا سول جەتەكشى ەلدەر باسشىلارىنىڭ سايلانۋى بارشا جۇرتتىڭ نازارىنا ىلىنەدى.
ارينە, جۇرت قىتاي باسشىلىعىنا كىمنىڭ سايلاناتىنىنا دا نازار اۋدارادى. بىراق بۇل ەلدە ءبىرىنشى باسشىنىڭ سايلانۋى وزگەشەرەك. ونى بيلەۋشى پارتيانىڭ باسشىلىعى ايقىندايدى. ال مۇندا كەزدەيسوق ادامنىڭ كەلۋى استە دە مۇمكىن ەمەس. ول جىلدار بويى سىناقتا جۇرەدى. بۇعان دەيىن وسىلاي بولعان. ۋاقىتى جەتكەندە ءبىرىنشى باسشى اۋىستىرىلادى. سول ءبىرىنشى باسشىنىڭ تىكەلەي قاتىسىمەن ونىڭ ورنىن باساتىن ادام كۇنى بۇرىن تاڭدالادى جانە سايلانادى.
بيلىككە قازىرگى ەل باسشىسى حۋ تسزينتاو دا سولاي كەلگەن. ونىڭ ورنىن باساتىن سي ءتسزينپيننىڭ تاڭدالعانىنا دا ءبىراز بولدى. الدىمەن ول توراعانىڭ ورىنباسارى جانە باسقا دا ءتيىستى لاۋازىمدارعا سايلاندى. ەندى ونىڭ ەڭ جوعارعى پارتيالىق ورگاندا, پارتيا سەزىندە پارتيانىڭ باس حاتشىسى قىزمەتىنە سايلانۋى جانە قحر ءتوراعالىعىنا بەكىتىلۋى قالىپ وتىر. سي ءتسزينپيننىڭ بۇل قىزمەتكە بەكيتىنى ەل ىشىندە عانا ەمەس, بۇكىل الەمدە مويىندالىپ قويعان. ءتىپتى باسقا ەلدەردىڭ باسشىلىعى وزدەرىنىڭ رەسمي قارىم-قاتىناسىن باسقالارمەن ەمەس, قازىر سي تسزينپينمەن جۇرگىزگەندى قالايدى.
مىنە, سول ادام جۇرت كوزىنە تۇسپەي ءجۇر. ەگەر توتەنشە سەبەبى بولماسا, ول مۇمكىن ەمەس جاي. ەل باسشىلىعى بۇل ادامنىڭ كورىنبەي كەتكەنى جۇرت نازارىن اۋدارىپ, ءتۇرلى اڭگىمە تۋعىزاتىنىن جاقسى بىلەدى. سوندىقتان دا وعان جول بەرمەيدى. سوعان قاراماي, بۇل ادامنىڭ ءبىرازدان بەرى «جوعالىپ كەتۋى» شىندىق. جانە بۇعان بايلانىستى ءتۇرلى-ءتۇرلى قاۋەسەت ايتىلادى. ونى ءبىراز ادام اۆتوموبيل اپاتىنا ۇشىراپتى دەيدى, قاتتى سىرقات ەكەن دەگەن دە ءسوز بار. رەسمي ورىندار ءۇنسىز. اپاتقا ۇشىراۋى, اۋرۋلىعى تۋرالى قاۋەسەت ايتىلۋى ءوز الدىنا, ساياساتشىلار ونى بيلىككە قاتىستىرا دا اڭگىمە ەتەدى – پارتيا باسشىلىعىندا ىشكى كۇرەس بار ەكەن دەيدى, سي ءتسزينپيننىڭ سايلانۋىنا كۇمان كەلتىرىلەدى.
قالىپتاسقان ءتارتىپ بويىنشا ەل باسشىسىن سايلايتىن كومپارتيا سەزى الداعى قازان ايىندا ءوتۋگە ءتيىس. بۇل جيىن جايىندا ءالى حابار جوقتىعى جۇرتتى تاڭداندىرادى. قالاي دەگەندە دە, تۇسىنىكسىز جاي بار.
سويتسە دە, سي تسزينپين تۋرالى ازىن-اۋلاق ماعلۇمات بەرە كەتكەن ءجون بولار. ول پارتيالىق شەنەۋنىكتىڭ وتباسىندا دۇنيەگە كەلگەن. اكەسى سي چجۋنسيۋن پروۆينتسيا گۋبەرناتورى, ەل ۇكىمەتى باسشىسىنىڭ ورىنباسارى بولعان. ءوزى بارلىق پارتيالىق باسشىلىق بۋىنىنان ءوتىپ, ەڭ جوعارى بيىككە كىناراتسىز جەتكەن. جاسى – 59-دا. ءداستۇرلى باسشىلىق مەرزىمىن وتەۋگە تولىق ساي كەلەدى. كۇنى ەرتەڭ ۇلى قىتاي ەلىندە بيلىك تىزگىنىن ۇستايتىنىنا ەشقانداي كۇمان جوق ەدى. ال ەندى سونداي بيىككە كوتەرىلگەن ادامنىڭ ءبىراز ۋاقىت كورىنبەي قالعانى قالاي؟ ءبىراز جۇرت ونىمەن بىرگە تاعى ءبىر پارتيا باسشىلىعىنىڭ ادامى – حە گۋتسزياننىڭ كورىنبەي كەتكەنىنەن كوبىرەك قاۋىپ قىلادى.
ماماديار جاقىپ, «ەگەمەن قازاقستان».
