پرەزيدەنتتىڭ ورنىن بوساتۋىن تالاپ ەتتى
سەيسەنبى, 7 اقپان 2012 8:03
سيريا وپپوزيتسياسى اسكەري بولىمشەلەردىڭ حومس قالاسىن بومبالاۋى سالدارىنان كەم دەگەندە ءۇش ادامنىڭ قازا تاپقانىن حابارلادى. كەيبىر دەرەك كوزدەرىنشە, وپات بولعاندار سانى 10 ادامدى قۇراۋى ىقتيمال.
حومستىڭ ءبىر تۇرعىنىنا سىلتەمە جاساعان كاتاردىڭ «ءال-جازيرا» تەلەارناسى وتكەن دەمالىس كۇندەرى سيريادا كەم دەگەندە 88 ادامنىڭ قازاعا ۇشىراعانىن جاريا ەتتى. جالپى, بۇل اقپاراتتاردىڭ انىق-قانىعىنا كوز جەتكىزۋ قيىن. وسى ارالىقتا اقش پرەزيدەنتى باراك وباما سيريا باسشىسى باشار اسادتى بەيبىت ادامداردىڭ ولىمىنە كىنالى دەپ ايىپتاپ, ونىڭ وتستاۆكاعا كەتۋىن تالاپ ەتتى.
سەيسەنبى, 7 اقپان 2012 8:03
سيريا وپپوزيتسياسى اسكەري بولىمشەلەردىڭ حومس قالاسىن بومبالاۋى سالدارىنان كەم دەگەندە ءۇش ادامنىڭ قازا تاپقانىن حابارلادى. كەيبىر دەرەك كوزدەرىنشە, وپات بولعاندار سانى 10 ادامدى قۇراۋى ىقتيمال.
حومستىڭ ءبىر تۇرعىنىنا سىلتەمە جاساعان كاتاردىڭ «ءال-جازيرا» تەلەارناسى وتكەن دەمالىس كۇندەرى سيريادا كەم دەگەندە 88 ادامنىڭ قازاعا ۇشىراعانىن جاريا ەتتى. جالپى, بۇل اقپاراتتاردىڭ انىق-قانىعىنا كوز جەتكىزۋ قيىن. وسى ارالىقتا اقش پرەزيدەنتى باراك وباما سيريا باسشىسى باشار اسادتى بەيبىت ادامداردىڭ ولىمىنە كىنالى دەپ ايىپتاپ, ونىڭ وتستاۆكاعا كەتۋىن تالاپ ەتتى.
ۋگو چاۆەس ارگەنتينا جاعىنا شىعادى
ۆەنەسۋەلا پرەزيدەنتى ۋگو چاۆەس ۇلىبريتانياعا قارسى ىقتيمال سوعىس جاعدايىندا ارگەنتينا جاعىنا شىعاتىنىن مالىمدەدى. «ۆەنەسۋەلا – سونشالىقتى قۋاتتى دەرجاۆا ەمەس, بىراق يمپەرياليستەردىڭ كەز كەلگەن باسقىنشىلىق ارەكەتىنە قارسى تۇرۋعا ەرىك-جىگەرى جەتەدى», دەدى وسى ماسەلەگە وراي ۋ.چاۆەس.
ۆەنەسۋەلا باسشىسىنىڭ بۇل ۇستانىمى ۇلىبريتانيا مەن ارگەنتينا تالاسىپ وتىرعان فولكلەند ارالدارىنا قاتىستى جانجالدىڭ قايتالانۋى مۇمكىندىگىنە تۇسىنىكتەمە بەرگەن كەزىندە ءبىلدىرىلدى. ارگەنتينا مەن ۇلىبريتانيا اراسىنداعى فولكلەند ارالدارىنا بايلانىستى كيكىلجىڭ اقپان ايىنىڭ باسىندا وسىندا اسكەري قىزمەتىن وتەۋ ءۇشىن حانزادا ۋيليام كەلگەننەن كەيىن ۋشىعا تۇسكەن ەدى.
رۋمىنيا ۇكىمەتى وتستاۆكاعا كەتتى
رۋمىنيا ۇكىمەتى ەلدەگى ەكونوميكالىق تۇراقتىلىقتى قامتاماسىز ەتۋ ءۇشىن وتستاۆكاعا كەتەدى, دەپ مالىمدەدى وسى ەلدىڭ پرەمەر-ءمينيسترى ەميل بوك. ونىڭ مالىمدەۋىنشە, مۇنداي قيىن شەشىمگە رۋمىنيانىڭ بولاشاعى ءۇشىن بارۋىنا تۋرا كەلىپ وتىر.
بوك ارىپتەستەرىن ساياسي شەشىمتالدىق تانىتۋعا شاقىرىپ, ولارعا جاڭا ۇكىمەت قۇرامىن تەزىرەك انىقتاۋ قاجەتتىگىن اتاپ كورسەتتى. جىل باسىنان بەرى رۋمىنيادا بوك ۇكىمەتى مەن ەل پرەزيدەنتى ترايان بەسەسكۋگە قاتىستى كوپتەگەن نارازىلىق اكتسيالارى جالعاسقان بولاتىن. دەمونسترانتتار ەلدى داعدارىستان قۇتقارۋعا باعىتتالعان قاتاڭ ەكونوميكا شارالارىنا قارسى كوتەرىلگەن ەدى. ە.بوك ەل ۇكىمەتى باسىنا 2009 جىلى كەلگەن ەدى.
ۇلتتىق كەلىسىم ۇكىمەتىن باسقارا ما؟
پالەستينا اۆتونومياسىنىڭ باسشىسى ماحمۋد ابباسقا حاماس قوزعالىسىمەن بىرلەسىپ قۇرىلىپ جاتقان ۇلتتىق بىرلىك ۇكىمەتىنىڭ پرەمەر-ءمينيسترى لاۋازىمى ۇسىنىلدى. بۇل ۇسىنىستى كاتار ءامىرى شەيح حاماد ءال-تاني ماحمۋد ابباسپەن جانە حاماس قوزعالىسى ساياسي بيۋروسىنىڭ باسشىسى حالەد ماشالمەن كەزدەسۋى بارىسىندا جاساعان.
ابباس بۇل ۇسىنىس تۋرالى ويلانىپ كورۋگە ۋادە بەرگەن. كەيبىر دەرەك كوزدەرى ابباس پەن ماشال قازىردىڭ وزىندە قاعيداتتى تۇرعىدا كەلىسىمگە قول جەتكىزگەنىن مالىمدەپ وتىر. وسىلايشا پالەستينا اۆتونومياسىنىڭ باسشىسى پرەمەر لاۋازىمىن دا يەلەنبەك. كەلىسسوز بارىسىندا ۇلتتىق بىرلىك ۇكىمەتىندەگى باسقا ورىندارعا كىمدەر باراتىنى تۋرالى تالقىلاۋ جۇرمەگەنگە ۇقسايدى.
سايلاۋدا ساۋلي نينيستە جەڭىسكە جەتتى
فينليانديا پرەزيدەنتىن سايلاۋدا 63 جاستاعى كونسەرۆاتور ساۋلي نينيستە جەڭىسكە جەتتى. 5 اقپاندا وتكەن سايلاۋدىڭ ەكىنشى تۋرىندا كواليتسيالىق پارتيا مۇشەسى نينيستەگە سايلاۋشىلاردىڭ 63 پايىزعا جۋىعى ءوز داۋىستارىن بەرگەن.
ونىڭ قارسىلاسى, «جاسىلدار وداعىنىڭ» وكىلى پەككۋ حااۆيستو شامامەن 37 پايىز داۋىس جيناعان. ءسويتىپ, ول ءوزىنىڭ جەڭىلىسىن ءسوزسىز مويىنداعان. سايلاۋعا داۋىس بەرۋگە قۇقى بار حالىقتىڭ 69 پايىزى قاتىسقان. بۇل جوسپارلانعاننان ايتارلىقتاي از. سايلاۋشىلارعا اۋا رايىنىڭ قولايسىزدىعى دا كەرى اسەر ەتكەن سەكىلدى. س.نينيستە بۇعان دەيىن قارجى ءمينيسترى, پارلامەنت سپيكەرى جانە ادىلەت ءمينيسترى بولعان.
«ينگۋشتەر گەنوتسيدى» تالقىلانادى
گرۋزيا پارلامەنتى 1944 جىلعى ينگۋشتەردىڭ دەپورتاتسياسىن تانۋ تۋرالى ماسەلە قاراماق. وسى جىلى ينگۋشتەردىڭ رسفسر مەن ورتالىق ازيا رەسپۋبليكالارىنا كۇشتەپ قونىس اۋدارىلعاندارى بەلگىلى. تالقىلاۋ اقپان ايىنىڭ سوڭىنا بەلگىلەنگەن.
بۇل ۇسىنىستىڭ اۆتورلارى وسىنداي شەشىم قابىلداۋ تاريحي ادىلەتتىلىك بولىپ تابىلاتىنىن اتاپ كورسەتەدى. بىراق گرۋزيا پارلامەنتىندەگىلەر بۇل ۇسىنىستىڭ قاناعاتتاندىرىلاتىنىنا كۇمانمەن قارايدى. ماسەلەن, گرۋزيا پارلامەنتىندەگى دياسپورالار ماسەلەلەرى جونىندەگى كوميتەت توراعاسى نۋگزار تسيكلاۋريدىڭ پىكىرىنشە, بۇل وتە كۇردەلى ماسەلە. كوميتەتتىڭ مۇنداي ماسەلەنى ءوز موينىنا الۋى دا قيىن. سوندىقتان ناتيجەنىڭ وڭ شەشىلەتىنىنە سەنىم از.
قىسقا قايىرىپ ايتقاندا:
* مىسىر باسشىلىعى ەلدىڭ ەكس-پرەزيدەنتى حوسني مۇباراكتى اسكەري گوسپيتالدان كايردەگى تۇرمە اۋرۋحاناسىنا اۋىستىرۋمەن بايلانىستى دايىندىق جۇمىستارىن باستاپ كەتكەن. كوپشىلىك بۇرىنعى ەل باسشىسىنىڭ گوسپيتالداعى جاعدايى تىم جاقسى ەكەنىن جاقتىرماعان سەكىلدى.
* گەرمانيا پرەزيدەنتى كريستيان ۆۋلفكە 2010 جىلى Skoda اۆتوكولىگىن جالعا الۋىنا بايلانىستى مينيسترلىك زاڭىن بۇزدى دەگەن كۇدىك ءبىلدىرىلدى. تومەنگى ساكسونيانىڭ پرەمەر-ءمينيسترى بولىپ تۇرعان كەزىندە ۆۋلف ماشينەنى ىشكى باعام بويىنشا السا كەرەك. تومەنگى ساكسونيانىڭ مينيسترلىك زاڭى بويىنشا, مينيسترلەر مەن كابمين باسشىسىنا قىزمەتىنە وراي سىيلىقتار مەن باسقا دا جەڭىلدىكتەر الۋعا قۇقى جوق.
* قازىرگى كەزدە, ءبىرىنشى كەزەكتە, اۋا رايىنىڭ قولايسىزدىعىنا بايلانىستى ەۋروپا ەلدەرى گاز تاپشىلىعىن سەزىنە باستادى. وسى پروبلەماعا بايلانىستى ۋكراينا پرەمەر-ءمينيسترى نيكولاي ازاروۆ ءوز ەلىنە دە زالالى تيمەيتىندەي احۋال قالىپتاستىرا وتىرىپ, «گازپرومعا» ەۋروپانى وتىننىڭ قاجەتتى كولەمىمەن قامتاماسىز ەتۋگە قولدان كەلگەن كومەگىن جاسايتىنىن مالىمدەدى.
* فيليپپيندە ماگنيتۋداسى 6,8 باللدىق جەر سىلكىنىسى تىركەلدى. تسۋنامي پايدا بولۋ قاۋپى تۋرالى ەسكەرتۋ جاسالعان جوق. ازىرشە ءبىر ادامنىڭ عانا وپات بولعانى جايىندا اقپارات بار.
ينتەرنەت ماتەريالدارى نەگىزىندە ازىرلەندى.
