شەتەلدەردەگى قازاقستاندىقتار دا ءوز تاڭداۋلارىن جاسادى
دۇيسەنبى, 16 قاڭتار 2012 7:30
رەسەي
رەسەيدىڭ ماسكەۋ, سانكت-پەتەربۋرگ, كالينينگراد, ومبى, استراحان قالالارىندا قازاقستان پارلامەنتى ءماجىلىسىنىڭ دەپۋتاتتارىن سايلاۋ ءۇشىن سايلاۋ ۋچاسكەلەرى ۇيىمداستىرىلعان. سونىڭ ءبىرى – ماسكەۋدەگى قازاقستان ەلشىلىگىنىڭ جانىنداعى №143 سايلاۋ ۋچاسكەسى. ول جەرگىلىكتى ۋاقىت بويىنشا 7.00 ساعاتتا (استانا ۋاقىتى بويىنشا بۇل 9.00 ساعات) سايلاۋشىلارعا ەسىگىن ايقارا اشتى. مۇندا 500-گە جۋىق قازاقستاندىق داۋىس بەرۋگە ءتيىس. ولاردىڭ كوبى ستۋدەنتتەر مەن جوعارى اسكەري وقۋ ورىندارىنىڭ كۋرسانتتارى, سونداي-اق ەلشىلىك قىزمەتكەرلەرى مەن ولاردىڭ وتباسى مۇشەلەرى.
دۇيسەنبى, 16 قاڭتار 2012 7:30
رەسەي
رەسەيدىڭ ماسكەۋ, سانكت-پەتەربۋرگ, كالينينگراد, ومبى, استراحان قالالارىندا قازاقستان پارلامەنتى ءماجىلىسىنىڭ دەپۋتاتتارىن سايلاۋ ءۇشىن سايلاۋ ۋچاسكەلەرى ۇيىمداستىرىلعان. سونىڭ ءبىرى – ماسكەۋدەگى قازاقستان ەلشىلىگىنىڭ جانىنداعى №143 سايلاۋ ۋچاسكەسى. ول جەرگىلىكتى ۋاقىت بويىنشا 7.00 ساعاتتا (استانا ۋاقىتى بويىنشا بۇل 9.00 ساعات) سايلاۋشىلارعا ەسىگىن ايقارا اشتى. مۇندا 500-گە جۋىق قازاقستاندىق داۋىس بەرۋگە ءتيىس. ولاردىڭ كوبى ستۋدەنتتەر مەن جوعارى اسكەري وقۋ ورىندارىنىڭ كۋرسانتتارى, سونداي-اق ەلشىلىك قىزمەتكەرلەرى مەن ولاردىڭ وتباسى مۇشەلەرى.
ۇلىبريتانيا
مۇنداعى سايلاۋ ۋچاسكەسى لوندون قالاسىنىڭ ورتالىعىندا ورنالاسقان قر ەلشىلىگىنىڭ جانىنان ۇيىمداستىرىلدى. №122 سايلاۋ ۋچاسكەسى جەرگىلىكتى ۋاقىت بويىنشا تاڭعى ساعات 7.00-دەن باستاپ جۇمىس ىستەدى. ونىڭ ەسىگى كەشكى ساعات 8.00-گە دەيىن سايلاۋشىلار ءۇشىن اشىق بولدى. سايلاۋ ۋچاسكەسىندە تالاپقا ساي داۋىس بەرۋ كابيناسى ءتيىستى قۇرالدارمەن جابدىقتالعان.
سايلاۋ كوميسسياسىنىڭ توراعاسى ارمان نارباەۆتىڭ ايتۋىنشا, تاڭعى شاقتىڭ وزىندە 50-گە جۋىق ادام كەلىپ, داۋىس بەرىپ ۇلگەردى. دەگەنمەن, مۇنداعى سايلاۋشىلاردىڭ ءتىزىمى از ەمەس. ولار بىرنەشە مىڭ قازاقستاندىقتى قۇرايدى.
تۇركيا
انكاراداعى №230 سايلاۋ ۋچاسكەسىندە قر پارلامەنتى ءماجىلىسىنىڭ دەپۋتاتتارىن سايلاۋعا داۋىس بەرۋشىلەر جەرگىلىكتى ۋاقىت بويىنشا تاڭعى ساعات 7.00-دەن باستاپ كەلە باستادى. 14.00 ساعاتتا 165 ادام داۋىس بەرىپ ۇلگەردى. بۇل مۇنداعى جالپى سايلاۋشىلاردىڭ 54 پايىزىن قۇرايدى.
انكارادا تۇراتىن قازاقستاندىق ازاماتتارمەن قاتار, سايلاۋ ۋچاسكەسىنە باسقا دا قالالاردان, اتاپ ايتقاندا, ەسكيشەحير, كونيا, كايسەري جانە باسقا دا قالالاردان سايلاۋشىلار كەلىپ داۋىس بەردى.
جوعارى ليگادا وينايتىن قازاقستاندىق فۋتبول كومانداسى وسى ساتتە انتاليا قالاسىندا جاتتىعۋ ويىندارىن وتكىزىپ جاتقان بولاتىن. ولار دا ءوز داۋىستارىن جوعارىداعى سايلاۋ ۋچاسكەسى ارقىلى بەرۋدى وتىنگەن ەكەن. سپورتشىلاردىڭ بۇل تىلەگى قاناعاتتاندىرىلىپ, ولار دا سايلاۋشىلار تىزىمىنە تىركەلدى.
اۆستريا
ۆەنا قالاسىنداعى قازاقستان رەسپۋبليكاسى ەلشىلىگىنىڭ عيماراتىندا قر پارلامەنتى ءماجىلىسى دەپۋتاتتارىن سايلاۋعا داۋىس بەرۋدى ۇيىمداستىرۋ ءۇشىن №118 سايلاۋ ۋچاسكەسى اشىلعان. سايلاۋ كوميسسياسىنىڭ قۇرامىندا جەتى ادام جۇمىس ىستەيدى. ۋچاسكە سايلاۋ زاڭدىلىعىنا تولىق جاۋاپ بەرە الاتىن تەحنيكالىق قۇرالدارمەن جابدىقتالعان.
سايلاۋشىلار تىزىمىنە اۆستريادا تۇراتىن نەمەسە وسى ەلگە ۋاقىتشا كەلگەن 100-دەن استام قازاقستاندىق ازامات تىركەلىپتى. ولاردىڭ اراسىندا قالاداعى حالىقارالىق ۇيىمداردىڭ قىزمەتكەرلەرى, قازاقستاندىق ديپلوماتتار مەن ولاردىڭ وتباسى مۇشەلەرى, بيزنەس وكىلدەرى مەن ستۋدەنتتەر بار. سايلاۋعا ءبىرىنشى رەت قاتىساتىندارعا ەسكەرتكىش سىيلىقتار ازىرلەنگەن.
بەلارۋس
مينسكىدەگى قازاقستان ەلشىلىگىنىڭ عيماراتىندا ورنالاسقان №141 سايلاۋ ۋچاسكەسى جەرگىلىكتى ۋاقىت بويىنشا تاڭعى ساعات 7.00-دەن باستاپ جۇمىس ىستەدى. وسىدان ءۇش ساعاتتاي ۋاقىت وتكەن كەزدە «حابار» اگەنتتىگىنىڭ مينسكىدەگى ءتىلشىسى ۆيكتوريا كوسەنيۋكتىڭ حابارى بويىنشا سايلاۋشىلاردىڭ 60 پايىزعا جۋىعى داۋىس بەرىپ ۇلگەردى.
ۆەنگريا
بۋداپەشتەگى قازاقستان ەلشىلىگىندەگى №121 سايلاۋ ۋچاسكەسىندە جەرگىلىكتى ۋاقىت بويىنشا 13.00 ساعاتتا وسى ەلدە تۇراتىن 65 قازاقستان ازاماتى داۋىس بەردى.
قالىپتاسقان ءداستۇر بويىنشا كامەلەت جاسىنا تولىپ, ءبىرىنشى رەت داۋىس بەرۋشىلەرگە ەلىمىزدىڭ شەت ەلدەگى وكىلدىگى اتىنان ەسكەرتكىش سىيلىقتار تاپسىرىلدى. وسىنداي سىيلىقتاردىڭ ءبىرىن الۋشى 1-كۋرس ستۋدەنتى ءۋاليحان ابدىرازاق ۆەنگريانىڭ جوعارى وقۋ ورنىندا حالىقارالىق بيزنەس جۇرگىزۋ ىسىنەن ءدارىس الىپ ءجۇر. «بۇگىن مەن ءۇشىن ەرەكشە كۇن. مەن ومىرىمدە ءبىرىنشى رەت پارلامەنت سايلاۋىنا قاتىسىپ وتىرمىن.
يزرايل
بۇل ەلدە قازاقستاننىڭ تەل-اۆيۆتەگى ەلشىلىگىنىڭ عيماراتىندا سايلاۋ ۋچاسكەسى اشىلدى. كونسۋلدىق ەسەپتە سايلاۋشى رەتىندە 30-دان استام قازاقستاندىق ازامات تىركەلگەن. ولار تۇگەلگە جۋىق تاڭعى ساعاتتاردىڭ وزىندە-اق داۋىس بەرىپ ءۇلگەردى. ءبىرىنشى بولىپ سايلاۋ ۋچاسكەسىنە ستۋدەنتتەر كەلدى. سايلاۋ ۋچاسكەسىنىڭ قىزمەتكەرلەرى سايلاۋشىلار بەلسەندىلىگىنىڭ وتە جوعارى بولعاندىعىن ايتتى.
پاكستان
يسلامابادتاعى №138 سايلاۋ ۋچاسكەسىندە جەرگىلىكتى ۋاقىت بويىنشا 19.00 ساعاتتا 43 ادام قر پارلامەنتى ءماجىلىسىنىڭ سايلاۋىنا قاتىسىپ, داۋىس بەردى. ولاردىڭ 33-ءى سايلاۋشىلار تىزىمىنە الدىن الا تىركەلگەن بولسا, 10 ادام قوسىمشا تىزىممەن داۋىس بەردى.
قىرعىزستان
قازاقستانداعى پارلامەنت سايلاۋىنا ەل ازاماتتارىنىڭ قاتىسىپ, ءوز داۋىستارىن بەرۋىنە قىرعىزستاندا دا جاعداي جاسالدى. بىشكەكتەگى قازاقستان ەلشىلىگىنەن سايلاۋ ۋچاسكەسى ۇيىمداستىرىلدى. مۇندا تەك وسى ەلدە تۇرىپ جاتقان قازاقستان ازاماتتارى عانا ەمەس, سونىمەن قاتار, ءارتۇرلى سەبەپتەرمەن سايلاۋ كۇنى بىشكەكتە جانە باسقا دا جەرلەردە ۋاقىتشا جۇرگەن قازاقستاندىقتار داۋىس بەردى. ولاردىڭ بارلىعىنا دا كونستيتۋتسيالىق قۇقىن پايدالانۋىنا تولىق جاعداي جاساۋعا ەلشىلىك قىزمەتكەرلەرى ءتيىستى كومەك كورسەتتى.
ازىرلەگەن سۇڭعات ءالىپباي.
