«استانا – كاسىپكەرلەر قالاسى. تۇراقتى ءارى سەرپىندى دامۋ ءۇشىن ينۆەستيتسيالىق سالىمدار قاجەت. وتكەن جىلى قالاعا 1 ترلن تەڭگەدەن استام ينۆەستيتسيا قۇيىلدى. بۇل – استانا ءۇشىن تاريحي رەكوردتىق كورسەتكىش. بيىل ينۆەستيتسيا ءوسىمى جالعاسۋدا. ونەركاسىپ, دەنساۋلىق ساقتاۋ, ساۋدا, قىزمەت كورسەتۋ سىندى سالالاردا دا ينفھۆەستيتسيا كولەمىنىڭ ءوسىم بايقالادى», – دەدى استانا قالاسىنىڭ اكىمى باقىت سۇلتانوۆ حالىققا ەسەپ بەرۋ كەزدەسۋىندە.
ونىڭ ايتۋىنشا, استاناعا تارتىلعان ينۆەستيتسيالاردىڭ جالپى كولەمىنىڭ تورتتەن ءبىرى شەتەلدىك ينۆەستورلارعا تيەسىلى. ينۆەستيتسيانىڭ جالپى كولەمىنىڭ 86%-ى – شاعىن جانە ورتا بيزنەستىڭ سالىمى. قالا ينۆەستيتسيالارىن جەكە باستامالار قۇرايدى.
«ەل بويىنشا شاعىن جانە ورتا بيزنەستىڭ ەڭ جوعارى ۇلەسى – استانادا. ناقتىراق ايتقاندا, ول قالانىڭ جالپى وڭىرلىك ءونىمىنىڭ 61%-ىن قامتىپ وتىر. قالادا 120 مىڭنان استام بيزنەس سۋبەكتىلەرى جۇمىس ىستەيدى. بۇل وتكەن جىلمەن سالىستىرعاندا 20%-عا ارتىق. بۇگىن بيۋدجەتكە سالىق تۇسىمدەرىنىڭ جارتىسىنان استامى (57%) – شاعىن جانە ورتا بيزنەس سالىقتارى», – دەپ اتاپ ءوتتى سۇلتانوۆ.
كاسىپكەرلەردى قولداۋ ءۇشىن مەملەكەتتىك باعدارلامالار بەلسەندى پايدالانىلۋدا. وسى شارالاردىڭ بارلىعى قولدا بار 9 مىڭنان استام جۇمىس ورنىن ساقتاۋعا جانە 6,3 مىڭنان استام جاڭا جۇمىس ورنىن قۇرۋعا مۇمكىندىك بەردى. كاسىپكەرلەردى قولداۋدىڭ تاعى ءبىر تەتىگى ەلباسىنىڭ باستاماسىمەن جۇرگىزىلەتىن سالىقتىق راقىمشىلىق بولىپ تابىلادى. جينالعان سالىقتاردان بوساتۋ شاعىن جانە ورتا بيزنەسكە ءوندىرىستى ۇلعايتۋعا, ال جالپىلاي العاندا, تابىستى ارتتىرۋعا جانە ءومىر ءسۇرۋ ساپاسىن جاقسارتۋعا مۇمكىندىك بەرەدى.
«مەملەكەت باسشىسىنىڭ تاپسىرماسى بويىنشا استانا كاسىپكەرلەرىنىڭ كارتاسى ازىرلەنۋدە. بۇل ءاربىر كاسىپكەر بويىنشا ەگجەي-تەگجەيلى دەرەكتەر بازاسى بولادى, وندا جالپى مالىمەتتەردەن باسقا, ولاردىڭ وزەكتى مارتەبەسى كورسەتىلەدى. دالىرەك ايتقاندا, كاسىپكەر نەسيەسىنىڭ بار-جوعى, ول بانكروتقا ۇشىراي ما, سالىق تولەدى مە, قانداي ماماندارعا مۇقتاج ەكەندىگىن كورسەتەدى. قازىر دەرەكتەردى جاڭارتىپ, جاعدايدى ناقتى ۋاقىت رەجيمىندە باقىلاۋعا مۇمكىندىك بەرەتىن پورتالدى ازىرلەۋ مۇمكىندىگى قاراستىرىلۋدا», – دەپ اتاپ ءوتتى استانا اكىمى.
ستاتيستيكتەردىڭ مالىمەتتەرىنە سايكەس, قازاقستاننىڭ ەلورداسىندا ونەركاسىپ كولەمىنىڭ 6,7%-عا ءوسىمى بايقالادى. وتكەن جىلى قالادا 7 جوبا ىسكە قوسىلىپ, سونىڭ ەسەبىنەن 700-دەن استام جاڭا جۇمىس ورنى اشىلدى.
