جالىنداعان جاس قايرات
بەيسەنبى, 19 ءساۋىر 2012 8:11
«بولاشاق بۇگىننەن باستالادى» اتتى جالپىرەسپۋبليكالىق اكتسيا اياسىندا ءال-فارابي اتىنداعى قازاق ۇلتتىق ۋنيۆەرسيتەتىندە سەنبىلىك ءوتتى. اۋماعى 70 گەكتاردان اساتىن ۋنيۆەرسيتەتتىك كامپۋس ايماعىن تازارتۋ جانە جيناۋ جۇمىسىنا اتالمىش وقۋ ورنىنىڭ باسشىلىعى, وقىتۋشىلار قۇرامى مەن ستۋدەنتتەر, قىزمەتكەرلەر – بارلىعى 17 مىڭنان استام ادام قاتىستى.
بەيسەنبى, 19 ءساۋىر 2012 8:11
«بولاشاق بۇگىننەن باستالادى» اتتى جالپىرەسپۋبليكالىق اكتسيا اياسىندا ءال-فارابي اتىنداعى قازاق ۇلتتىق ۋنيۆەرسيتەتىندە سەنبىلىك ءوتتى. اۋماعى 70 گەكتاردان اساتىن ۋنيۆەرسيتەتتىك كامپۋس ايماعىن تازارتۋ جانە جيناۋ جۇمىسىنا اتالمىش وقۋ ورنىنىڭ باسشىلىعى, وقىتۋشىلار قۇرامى مەن ستۋدەنتتەر, قىزمەتكەرلەر – بارلىعى 17 مىڭنان استام ادام قاتىستى.
سەنبىلىككە قاتىسۋشىلار وقۋ كورپۋسى مەن جاتاقحانالار ماڭىن ارام شوپتەردەن تازارتىپ, اعاشتاردى اكتەدى, گۇلدەر, جاس شىبىقتار وتىرعىزدى, قوقىستاردى ارنايى تەحنيكا كومەگىمەن قوقىس الاڭىنا ءجونەلتتى. سەنبىلىك ۇيىمداسقان ءتۇردە جانە وتە جاعىمدى كوڭىل كۇيدە وتكىزىلدى.
قازۇۋ ستۋدەنتتەرى, ۋنيۆەرسيتەتتىڭ جاستار ۇيىمدارى كوميتەتى ەلىمىزدىڭ جاستار كونگرەسى باستاماسىنا ءۇن قوسىپ, «بولاشاق بۇگىننەن باستالادى» اكتسياسىنا قولداۋ تانىتىپ وتىر. قولداۋ شاراسى اياسىندا قازۇۋ ستۋدەنتتەر سەناتى سالاماتتى ءومىر سالتىن ناسيحاتتاۋ جولىندا جاستاردى دەنە شىنىقتىرۋمەن اينالىسۋعا جانە سپورتقا تارتۋ ماقساتىندا شاعىن فۋتبولدان ستۋدەنتتىك توپتار اراسىندا قالالىق تۋرنير وتكىزۋدى باستاپ كەتتى.
بۇدان باسقا, ۋنيۆەرسيتەتتىڭ «كومەك» ستۋدەنتتىك ۆولونتەرلار ۇيىمى قايىرىمدىلىق جارمەڭكەسىن وتكىزىپ, وندا مۇگەدەك بالالاردىڭ جاساعان قولونەر بۇيىمدارى قويىلدى.
جارمەڭكەدەن تۇسكەن قارجىنى قاسكەلەڭدەگى بالالار ۇيىنە, قالالىق ينتەرناتتا تاربيەلەنۋشىلەرگە, «SOS» بالالار اۋىلىنا تابىستايتىن بولادى.
قازىرگى كەزدە جاستاردى وسىنداي جۇمىستاردىڭ بارىنشا كوپ بولعانى مەملەكەت ءۇشىن دە, جاستاردىڭ وزدەرى ءۇشىن دە كەرەك. ويتكەنى, مۇنداي ەڭبەككە باۋلىپ, قورشاعان ورتانى قورعاۋعا ۇندەيتىن شارالار جاستاردى بولاشاقتا ورتاق ىستەرگە بىرىكتىرەتىنى ءسوزسىز. بۇگىندە مەملەكەت تاراپىنان جاستارعا قولداۋ كورسەتىلىپ وتىرعانى بەلگىلى. سوندىقتان, جاستار سەنبىلىك سيياقتى تاربيەلىك جۇمىستار ارقىلى «مەن ەلىمنەن نە الامىن» دەپ ەمەس, «مەن ەلىمە نە بەرەمىن» دەگەن ويمەن وتانىمىزعا قىزمەت ەتۋلەرى كەرەك. ال مەملەكەتتىڭ جاستارعا قولداۋ-كومەگىنە كەلسەك, ماسەلەن الماتى قالاسىندا جىل سايىن جاستاردى جۇمىسپەن جانە باسپانامەن قامتاماسىز ەتۋ ءماسەلەسى كوتەرىلەتىنىن, مەملەكەتتىك باعدارلامالار بويىنشا ولاردى جۇمىسپەن جانە جاتاقحانامەن قامتۋ ماسەلەسى شەشىلىپ جاتقانىن, سونىڭ ءبىر ءدالەلى رەتىندە «الاتاۋ» اۋدانىندا جاڭادان ستۋدەنت-جاستارعا ارنالىپ جاتاقحانالاردىڭ سالىناتىنىن ايتا كەتكەن ءجون. وسىعان بايلانىستى قالالىق جاستار ساياساتى باسقارماسىنىڭ باستىعى باقتيار ماكەن الماتىدا جاسالىپ جاتقان جۇمىستار باسقا وبلىستاردا دا جۇرگىزىلسە دەگەن نيەتىن ءبىلدىردى.
جالپى, بۇگىندە ەلىمىزدە 16 مەن 29 جاس ارالىعىنداعى 4,5 ملن. جاس تۇرادى ەكەن. قازاقستان جاستار كونگرەسىنىڭ اتقارۋشى ديرەكتورى شاحماردان بايمانوۆتىڭ ايتۋىنشا, وسى كۇندەرى ستۋدەنتتەردى جاتاقحانامەن, جاس وتباسىلاردى باسپانامەن قامتاماسىز ەتۋ, وقۋ ورىندارىنا ءتۇسۋ ءۇشىن گرانتتاردى كوبەيتۋ, وقۋ بىتىرگەن تۇلەكتەردى جۇمىسپەن قامتاماسىز ەتۋ, جاستاردىڭ عىلىممەن اينالىسۋىنا كەڭ ءمۇمكىندىك بەرۋ, دەنە تاربيەسى جانە سپورتپەن اينالىسۋىنا جاعداي جاساۋ سياقتى كوكەيكەستى ماسەلەلەر كوتەرىلۋدە.
قانات ەسكەندىر,
الماتى.
