قامقورلىقتىڭ قايتارىمى بولادى
بەيسەنبى, 15 قاراشا 2012 7:13
بىرىڭعاي ۇلتتىق دەنساۋلىق ساقتاۋ جۇيەسى (بۇدج) اياسىندا دەنساۋلىق ساقتاۋ سالاسى مەملەكەتتىك ساياساتىنىڭ ماقساتى – حالىقتىڭ دەنساۋلىق جاعدايىن جاقسارتۋ, ولاردىڭ ءومىر ءسۇرۋ ۇزاقتىعىن ارتتىرۋ, اۋرۋدىڭ الدىن الۋدى دامىتۋدىڭ نەگىزىندە ونى ازايتۋ جانە مەديتسينالىق كومەكتىڭ ساپاسى مەن قولجەتىمدىلىگىن ارتتىرۋعا سايادى.
وسى ماقساتقا جەتۋ دەنساۋلىق ساقتاۋدى دامىتۋدىڭ باسىم ستراتەگياسىنىڭ ساقتالۋىن تالاپ ەتەدى. دەنساۋلىق ساقتاۋ سالاسىنداعى مەملەكەتتىك ساياساتتىڭ ماڭىزدى ماقساتتارىنىڭ قاتارىنا مەديتسينا قىزمەتكەرلەرىنە جاسالاتىن مەديتسينالىق كومەكتىڭ ساپاسى مەن تيىمدىلىگىن ارتتىرۋ كىرەدى.
بەيسەنبى, 15 قاراشا 2012 7:13
بىرىڭعاي ۇلتتىق دەنساۋلىق ساقتاۋ جۇيەسى (بۇدج) اياسىندا دەنساۋلىق ساقتاۋ سالاسى مەملەكەتتىك ساياساتىنىڭ ماقساتى – حالىقتىڭ دەنساۋلىق جاعدايىن جاقسارتۋ, ولاردىڭ ءومىر ءسۇرۋ ۇزاقتىعىن ارتتىرۋ, اۋرۋدىڭ الدىن الۋدى دامىتۋدىڭ نەگىزىندە ونى ازايتۋ جانە مەديتسينالىق كومەكتىڭ ساپاسى مەن قولجەتىمدىلىگىن ارتتىرۋعا سايادى.
وسى ماقساتقا جەتۋ دەنساۋلىق ساقتاۋدى دامىتۋدىڭ باسىم ستراتەگياسىنىڭ ساقتالۋىن تالاپ ەتەدى. دەنساۋلىق ساقتاۋ سالاسىنداعى مەملەكەتتىك ساياساتتىڭ ماڭىزدى ماقساتتارىنىڭ قاتارىنا مەديتسينا قىزمەتكەرلەرىنە جاسالاتىن مەديتسينالىق كومەكتىڭ ساپاسى مەن تيىمدىلىگىن ارتتىرۋ كىرەدى.
قازىرگى تاڭدا زاماناۋي مەنەدجمەنتتەگى وزەكتى تاقىرىپتاردىڭ ءبىرى ەڭبەكتى نەگىزدەۋ ەكەنى ايان. ارينە ۇيىم ءوز ماقساتى مەن ءمىندەتىنە قول جەتكىزۋگە تالپىنعاندا تاۋارلار مەن قىزمەتتەردى ءوندىرۋدىڭ وزىق تەحنولوگياسىن قۇرۋ, بىلىكتى كادرلاردى جيناۋ جانە ولاردىڭ ءوزارا ارەكەتىنىڭ ءتيىمدى قۇرىلىمىن ازىرلەۋ جەتكىلىكسىز بولادى. ءاربىر قىزمەتكەر الدىنا قويىلعان مىندەتتى ورىنداۋ ءۇشىن بارىنشا كۇش جۇمساپ, ءتيىمدى ەڭبەك ەتۋى قاجەت.
بۇدج ەنگىزۋدىڭ ەڭ ماڭىزدى قاعيداتىنىڭ ءبىرى سوڭعى ناتيجە بويىنشا ەڭبەككە اقى تولەۋ ەكەندىگى تالاسسىز. مەديتسينا كادرلارى, ەڭ الدىمەن دارىگەرلەر ەمدەۋ-الدىن الۋ مەكەمەلەرىنىڭ ىشكى رەسۋرستارىنىڭ اسا ماڭىزدى بولىگى. مىنە, سوندىقتان دا ولاردىڭ قىزمەت ناتيجەلىلىگى وسىعان بايلانىستى قامتاماسىز ەتىلەدى. قازىرگى تاڭدا, دەنساۋلىق ساقتاۋدى قايتا قۇرۋ كەزەڭىندە, تەحنيكالىق, تەحنولوگيالىق جانە ۇيىمداستىرۋشىلىق جاڭارتۋلار نەگىزگى باعىتتار بولىپ وتىر. الايدا, دارىگەرگە جان-جاقتى جاعداي جاساپ, ونى ەڭ جاڭا قۇرال-جابدىقتارمەن قامتاماسىز ەتسەڭ دە ناقتى ناتيجەگە تولىق قول جەتكىزىلمەۋى دە مۇمكىن. ءبىزدىڭ ويىمىزشا, جوعارىدا كەلتىرىلگەن جاڭارتۋلارمەن بىرگە, جەتىلدىرىلگەن تۇجىرىمدامانىڭ باستى نىسانى مەديتسينا قىزمەتكەرلەرى بولىپ قالا بەرەدى. مىنە, سوندىقتان دا ولاردىڭ ەڭبەك قىزمەتىن ۇنەمى جاڭعىرتۋ كەرەك. ماسەلەنىڭ ءمانىسى مىنە, وسىندا.
دارىگەر ماماندىعىنىڭ بەدەلدىلىگى بۇگىنگى كۇنى دە جوعارى بولىپ وتىر. دەنساۋلىق ساقتاۋداعى ەڭبەكتىڭ تومەن نەگىزدەلۋىنە قاراماستان, مەديتسينا قىزمەتكەرى ماماندىعىن العىسى كەلەتىندەر سانى ازايىپ وتىرعان جوق. جىل سايىن مەديتسينا وقۋ ورىندارىنا ءتۇسۋ كونكۋرسى ەڭ جوعارى بولىپ تۇر.
كاسىپتىك مەديتسينالىق قاۋىمداستىق دارىگەرلەر مەن قىزمەتكەرلەر قۇرامىنىڭ بىلىكتىلىك دەڭگەيىنە, اتقاراتىن قىزمەتتىڭ ەتيكالىق نورمالارىنىڭ ساقتالۋىنا, سىبايلاس جەمقورلىقتى ەڭسەرۋگە جاڭا تالاپتاردى قۇرۋى ءتيىس. كاسىپتىك قاۋىمداستىقتار مەن قوعامدار بولىپ بىرىككەن دارىگەرلىك ۇيىمدار قىزمەتكەرلەردى اتتەستاتتاۋ مەن سەرتيفيكات بەرۋدە, جوعارى بىلىكتى مامانداردى انىقتاۋ مەن كوتەرمەلەۋدە, بىلىكتىلىگى تومەن مامانداردان ارىلۋدى جۇرگىزۋدە شەشۋشى ءرول اتقارۋى ءتيىس. سونىمەن قاتار, ەكونوميكالىق نەگىزدەۋدى ارتتىرۋ جونىندەگى مىناداي ءىس-شارالار جۇزەگە اسىرىلۋى ءتيىس:
- مەديتسينالىق قىزمەتكەرلەر ەڭبەگىنە اقى تولەۋدى ەكونوميكا بويىنشا ورتاشا دەڭگەيگە دەيىن ارتتىرۋ;
- جاس ماماندارعا قارجىلىق جانە الەۋمەتتىك قولداۋ كورسەتۋ مۇمكىندىگى (تۇرعىن ءۇي نەمەسە جالداۋدىڭ جارتىلاي تولەمىن بەرۋ, نەسيەگە قول جەتكىزۋ, مەديتسينالىق مەكەمەنىڭ ارالاسۋى ارقىلى يپوتەكالىق باعدارلامالارعا قاتىسۋ مۇمكىندىگىن ۇسىنۋ);
- ەڭبەككە اقى تولەۋدىڭ ديففەرەنتسيالىلىعىن كۇشەيتۋ, ونىڭ ىنتالاندىرۋشى بولىگىن ارتتىرۋ (25-30%-دان كەم ەمەس), مەديتسينالىق ۇيىمداردا بولەك ءبولىمشەلەر مەن قىزمەتكەرلەردىڭ ەمدەۋ-پروفيلاكتيكالىق قىزمەتىنىڭ سوڭعى ناتيجەسىنىڭ ناقتى قىزمەت كولەمدەرى مەن كورسەتكىشتەرىن ەسەپكە الۋ نەگىزىندە ەكونوميكالىق ىنتالاندىرۋ ءجۇيەلەرىن ەنگىزۋ.
سونىمەن, مەديتسينالىق قىزمەتكەردىڭ ەڭبەگىن ۋاجدەۋ – ادامدى قىزمەتكە ىنتالاندىراتىن ىشكى جانە سىرتقى قوزعاۋشى كۇشتەردىڭ جيىنتىعى, ولار قىزمەتتىڭ شەكتەرىن جانە نورمالارىن قويادى, وسى قىزمەتكە بەلگىلى ءبىر ماقساتتارعا جەتۋگە باعىتتالعان باعدار بەرەدى. ونىڭ ىنتالاندىرۋشى فاكتورى مەديتسينالىق قىزمەتتى جۇزەگە اسىراتىن قىزمەتكەرلەردىڭ لاۋازىمدىق ءمىندەتتەرىن ادال اتقارۋى, جۇمىستى ورىنداۋدىڭ جوعارى ساپاسى. سونىڭ ىشىندە اسا كۇردەلى جانە شۇعىل جۇمىستاردى, باستاماشىلدىق, شىعارماشىلىق بەلسەندىلىك جانە باسقا دا جەتىستىكتەر ءۇشىن اقشالاي سىياقى تۇرىندەگى ماداقتاۋدى انىقتايتىن قۇقىقتىق نەگىزى قازاقستان رەسپۋبليكاسى دەنساۋلىق ساقتاۋ مينيسترلىگىنىڭ 2012 جىلعى 13 ساۋىردەگى № 245 بۇيرىعىمەن بەكىتىلگەن ديففەرەنتسيالانعان قوسىمشا اقى ءتولەۋ بولىپ تابىلادى.
جاڭا تەحنولوگيالار, ءدارى-ءدارمەكتەر, دياگنوستيكالاۋ مەن ەمدەۋ ادىستەرىنىڭ پايدا بولۋى قازىرگى زامانعى دارىگەردەن ءبىلىمىنىڭ تۇراقتى جەتىلدىرىپ وتىرۋىن تالاپ ەتەدى. ەلباسى ن.نازارباەۆ قازاقستان حالقىنا 2011 جىلعى جولداۋىندا «ءاربىر قازاقستاندىقتىڭ جەكە ۇستانىمى «ءومىر بويى ءبىلىم الۋ» بولۋى ءتيىس» دەپ اتاپ كورسەتتى. بۇل, سونداي-اق ديپلومنان كەيىنگى جوعارى كاسىپتىك بىلىمگە دە قاتىستى, ول ءۇشىن قازىرگى كەزدە بارلىق جاعدايلار جاسالدى. جەكە العاندا, كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا ديپلومنان كەيىنگى جانە قوسىمشا كاسىپتىك ءبىلىم بەرۋ ورتالىعى (دقو) بار, وعان: كارديولوگيا, ىشكى اۋرۋلار, گاستروەنتەرولوگيا, كلينيكالىق جانە زەرتحانالىق دياگنوستيكا كافەدرالارى كىرەدى.
دقو ورتالىعىنىڭ نەگىزگى باعىتى ءبىلىم بەرۋ قىزمەتى, سونىڭ ىشىنە قوسىمشا مەديتسينالىق ءبىلىم بەرۋ, دارىگەرلەردى جەتىلدىرۋ تسيكلدارى جانە ديپلومنان كەيىنگى ءبىلىم بەرۋ, رەزيدەنتۋرادا تار شەڭبەرلى ماماندىقتار بويىنشا كادرلاردى دايارلاۋ.
ءبىلىم بەرۋ ۇردىسىنە ءبىزدىڭ ينستيتۋتتىڭ جەتەكشى عىلىمي قىزمەتكەرلەرى, اتاپ ايتقاندا, 15 مەديتسينا عىلىمدارىنىڭ دوكتورى مەن 36 عىلىم كانديداتى قاتىسادى.
وقۋ ورتالىعى بىلىكتىلىكتى ارتتىرۋ جانە قايتا دايارلاۋ تسيكلدارىندا دەنساۋلىق ساقتاۋدىڭ مەملەكەتتىك مەكەمەلەرىنىڭ ءدارىگەرلەرىن دايارلاۋعا تاپسىرىستى ورىنداۋدى ىسكە اسىرادى. قازىر مەملەكەتتىك تاپسىرىس اياسىندا بىلىكتىلىكتى ارتتىرۋ تسيكلدارىندا 72 مامان, 036 باعدارلاماسىمەن قايتا دايارلاۋ تسيكلىندا 14 ءدارىگەر, بىلىكتىلىكتى ارتتىرۋ تسيكلىندا 15 دارىگەر ءبىلىم الۋدا. جامبىل وبلىستىق جەدەل جاردەم قىزمەتىنىڭ 140 فەلدشەرىنە «كاسكاد» ادىسىمەن بىلىكتىلىكتى ارتتىرۋ تسيكلى ءجۇرگىزىلدى.
بىلىكتىلىكتى ارتتىرۋ تسيكلدارى كارديولوگيا, ىشكى اۋرۋلار, نەفرولوگيا, رەۆماتولوگيا, گاستروەنتەرولوگيا, اريتمولوگيا, ەندوكرينولوگيا, اللەرگولوگيا جانە يممۋنولوگيا, فۋنكتسيونالدىق دياگنوستيكا, مەديتسينالىق رەابيليتولوگيا ماماندىقتارى بويىنشا جۇرگىزىلەدى.
وبلىستىق دەنساۋلىق ساقتاۋ دەپارتامەنتتەرىنىڭ وتىنىمدەرى ارقىلى ەل وڭىرلەرىندە كولەمى 200 ساعاتتان اساتىن ىشكى مەديتسينانىڭ وزەكتى ماسەلەلەرى ءجونىندە بىلىكتىلىكتى ارتتىرۋدىڭ كوشپەلى تسيكلدارى وتكىزىلدى.
رەزيدەنتۋرادا ءبىلىم بەرۋ كارديولوگيا, ىشكى اۋرۋلار, گاستروەنتەرولوگيا, ەندوكرينولوگيا, اللەرگولوگيا جانە يممۋنولوگيا پاندەرىمەن جۇرگىزىلەدى.
ورتالىق زاماناۋي كومپيۋتەرلەرمەن مۋلتيمەديالىق پروەكتورلارمەن, ينتەراكتيۆتى تاقتالارمەن جابدىقتالعان. كارديوحيرۋرگتاردى ينتەرۆەنتسيالىق داعدىلارعا ۇيرەتۋ ءۇشىن سيمۋلياتسيالىق ورتالىق بار.
سونداي-اق دقو ورتالىعىنىڭ قىزمەتكەرلەرى ون-لاين رەجىمىندە وبلىستاردىڭ پراكتيكالىق دەنساۋلىق ساقتاۋ دارىگەرلەرىنە ىشكى اۋرۋلاردىڭ ءتۇرلى اسپەكتىلەرى نەگىزىندە دارىستەر جۇرگىزەدى. كۇردەلى كلينيكالىق جاعدايلاردا تەلەمەديتسينالىق تەحنولوگيالار كومەگىمەن قازاقستان وڭىرلەرىنە كونسۋلتاتسيالىق-دياگنوستيكالىق كومەك كورسەتەدى.
ورتالىقتىڭ قىزمەتكەرلەرى عىلىمي-تەحنيكالىق باعدارلامالار مەن گرانتتاردى ورىنداۋعا, سونداي-اق كونفەرەنتسيالار مەن سەزدەردى ازىرلەۋگە جانە جۇرگىزۋگە بەلسەندى قاتىسادى.
وسىلايشا, كاسىبي دەڭگەيدى تۇراقتى جەتىلدىرۋ جانە ديففەرەنتسيالانعان قوسىمشا اقى ءتولەۋ تۇرىندەگى ەكونوميكالىق ىنتالانىرۋ ناۋقاستارعا كورسەتىلەتىن مەديتسينالىق قىزمەت ساپاسىن جاقسارتۋدىڭ باستى فاكتورىنا اينالماق. مىنە, سوندا عانا قامقورلىقتىڭ قايتارىمى بولادى.
ءسالىم بەركىنباەۆ,
دەنساۋلىق ساقتاۋ مينيسترلىگى كارديولوگيا جانە
ىشكى اۋرۋلار عىلىمي-زەرتتەۋ ينستيتۋتىنىڭ ديرەكتورى,
مەديتسينا عىلىمدارىنىڭ دوكتورى,
پروفەسسور.
