بەلسەندى جاستار تاڭەرتەڭنەن شاعىن اۆتوبۋسپەن قالا ءىشىن ارالاپ, جۇمىس جاساپ جاتقان قىزمەتكەرلەرگە تىسكەباسار ۇسىنىپ, شايعا شاقىردى. ودان بولەك جۇمىس توقتاپ قالماس ءۇشىن قولدارىنا كۇرەك الىپ, جول جيەكتەرىندەگى قاردى تازالاپ, جاياۋجولداردى مۇزدان تازارتۋعا كومەكتەستى.
«بىلتىر جاستار جاڭا جىلدىق مەرەكە كەزىندە وزگەلەر دەمالىپ جاتقاندا جۇمىسى توقتامايتىن كوممۋنالدى قىزمەتكەرلەردىڭ جۇمىسىنا العىس ايتۋ ماقساتىندا وسى اكتسيانى باستاپ ەدى. كەيىنىرەك ەلىمىزدىڭ بارلىق جاستارى قوسىلىپ, ءار ايماقتا ىستىق ءشاي بەرۋ شارالارى كوبەيدى. اسىرەسە استانا, اقمولا, سولتۇستىك, شىعىس قازاقستان سەكىلدى قىسى قاتتى ايماقتاردا اياز كەزىندە ءبىر توپ جاستار كوشەلەرگە شىعىپ, وزگەلەرگە كومەكتەسكەنى قۋانتادى» - دەدى «جاس وتان» جاستار قاناتىنىڭ توراعاسى دانيار سۇندەتباەۆ.
ەستەرىڭىزگە سالا كەتسەك, اكتسيا استانا قالاسىندا بىلتىر تۋرا وسى ۋاقىتتا باستالىپ, ەلىمىزدىڭ بارلىق ايماقتارىندا جالعاسىن تاۋىپ ەدى. جاستار جاڭا جىل سەكىلدى وتباسىلىق مەرەكەنى ءار ادام جاقىندارىمەن قارسى السا دەيدى, ال ول مۇمكىن بولماعان جاعدايدا جاقسى ادامدارمەن جانە كەرەمەت كوڭىل كۇيدە بولۋ كەرەكتىگىنە سەنىمدى.
قاتىسۋشىلار ءۇشىن شارانىڭ ەڭ كەرەمەت كەزى قىزمەتكەرلەردىڭ كۇتپەگەن جەردەن پايدا بولعان بىزگە شىنايى كۇلكى سىيلاپ, العىستارىن جاۋدىرعان ءساتى دەيدى. اراسىندا باتاسىن بەرىپ, كۇندەلىكتى كەزدەسەتىن قيىندىقتارىمەن بولىسەتىندەرى دە از ەمەس ەكەن.
