اۋدارما • 04 قاڭتار، 2019

The New York Times. بۇركىتشى قازاق قىزى

The New York Times باسىلىمى موڭعولياداعى بۇركىتشى قازاق قىزى تۋرالى كولەمدى ماقالا جاريالادى. ماقالانىڭ قىسقاشا مازمۇنىن نازارلارىڭىزعا ۇسىنىپ وتىرمىز.

Egemen Qazaqstan

The New York Times

بايان-ولگەي، موڭعوليا - جۇما كۇنى ساباق بىتكەن سوڭ، زامانبول ۇيىنە ورالىپ، ءۇي جۇمىسىن ورىنداپ جانە جاسوسپىرىمدەرگە ءتان ءۇي جاعدايىنداعى ءوز مىندەتتەرىن اتقارادى. ال سەنبىدە ول اتىن ەرتتەپ، ءوزىنىڭ ۇيرەتىلگەن جىرتقىش قۇسىمەن قار تاۋلارىنا باعىت الىپ، سەنىمدى ارىپتەسىمەن جابايى اڭداردى اۋلاۋعا بەت الادى.

زامانبول 14 جاستاعى بۇركىتشى قىز. موڭعوليانىڭ التاي ولكەسىن مەكەن ەتكەن قازاق قىزى بۇرىنعى كوشپەندى اتا-بابالارىنىڭ ءىزىن جالعاپ جۇرگەن جاستاردىڭ ءبىرى. ونىڭ اڭ اۋلاۋ قابىلەتى اتاسىنان بەرىلگەن. اتاسىنىڭ جانىندا ول جانە ونىڭ بۇركىتى ءتىپتى قاسقىر دا اۋلايتىن.

اتاسى وعان بۇركىتپەن قالاي اڭ اۋلاۋ تۋرالى، اسپانداعى قۇستاردى قالاي شاقىرۋعا بولاتىنىن ۇيرەتتى. اتاسى قايتىس بولعان سوڭ، ول قۇستى ءوز قامقورلىعىنا الدى.

- اتامنىڭ جولىن جالعاستىرعىم كەلدى، - دەدى زامانبول.

سودان باستاپ ول قۇسبەگىلىكتىڭ قىر-سىرىن تەرەڭ ۇيرەنە باستادى. اڭشىلار قۇستارى يەلەرىنىڭ داۋىستارىنا ۇيرەنۋى ءۇشىن ءجيى ءان ايتادى. ۇرعاشى بۇركىتتەر ەركەكتەرىنە قاراعاندا ۇلكەن جانە كۇشتى، كوبىنە اڭ اۋلاۋدا قولدانىلادى.

اڭ اۋلاۋ وتكەن عاسىردا جوعالىپ كەتتى. الايدا بۇل كاسىپتى باتىس موڭعوليانىڭ بايان-ولگەي ايماعىنداعى التاي قازاقتارى ساقتاپ قالدى، وندا 400-گە جۋىق ەتنيكالىق قازاقتار رەسمي تۇردە بۇركىتشى رەتىندە تىركەلگەن. بۇل ايماق كوبىنە قازاقتار ءارى مۇسىلماندار مەكەندەگەن موڭعولياداعى جالعىز ايماق.

قازىر التايداعى قازاق مادەنيەتى تۋرالى اقپارات بۇكىل الەمگە بەلگىلى بولا باستادى. بۇركىتشىلەر ەكى كۇندىك التىن بۇركىت فەستيۆالىنە جينالادى. 2016 جىلى تۇسىرىلگەن بۇركىتشى قىز ايشولپان تۋرالى دەرەكتى فيلم (2014 جىلى وسى جارىستا جەڭگەن) دۇنيەجۇزىنىڭ نازارىن التايدىڭ مادەنيەتىنە اۋدارۋعا كومەكتەستى.

فەستيۆال كەزىندە دالا كەڭەس ءداۋىرىنىڭ ماشينالارىمەن، گوبەلەندەرمەن، كىتاپ جانە شولمەكتەرمەن كومكەرىلەدى. بالالار جەردە وتىرىپ قوي سۇيەكتەرىمەن وينايدى. قازان ايىندا فەستيۆالگە كەلگەن شەتەلدىك تۋريستەر سانى 1000-نان استام ادامدى قۇرادى، دەپ حابارلادى قۇزىرلى ورگاندار.

كەيبىر عالىمدار فەستيۆال مادەنيەتتىڭ ءبىر ءتۇرى رەتىندە عانا ەمەس، شوۋ رەتىندە عانا ۇيىمداستىرىلادى دەپ الاڭدايدى. بىراق كوپتەگەن اڭشىلار فەستيۆالدا ءوز مۇرالارىن ناسيحاتتاۋ ءتاسىلىن دە كورسەتەدى.

تەحنولوگيا بۇكىل الەم بويىنشا ۇرپاقتار اراسىنداعى الشاقتىقتى كەڭەيتتى، ال بايان-ولگەي دە بۇدان تىس ەمەس. بىراق بۇركىتپەن اڭ اۋلاۋ ونىمەن اينالىساتىن ادامدار ءۇشىن قازاق جاستارىن ۇلكەندەرمەن بايلانىستىراتىن كوپىر بولدى.

زامانبول ءۇشىن بۇركىت ونىڭ اجەسى مەن اتاسىن ەسكە سالادى، بىراق ونىڭ بۇگىن اڭعا سالاتىن قۇسى وعان اتاسىنان قالعان قۇسى ەمەس.

زامانبول ءوزىنىڭ ءبىرىنشى قىرانىن ەركىندىككە جىبەرگەندە 13 جاستا بولدى. ول بۇركىتتىڭ اياعىنا باۋ بايلاپ، تاۋعا كوتەرىلىپ، ونىمەن قوشتاستى.

- مەن كوڭىلسىز بولدىم، بىراق مەن ونىڭ ەركىن بولعانىن قالايمىن، - دەدى زامانبول.

اۋدارعان ءمادينا جالەلقىزى،

«ەگەمەن قازاقستان»

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز