ەلباسىمىز نۇرسۇلتان نازارباەۆ 2017 جىلى وتكەن دۇنيەجۇزى قازاقتارىنىڭ V قۇرىلتاي جيىنىندا شەتتە جۇرگەن قانداستارىمىز ءجايلى سوز ەتە وتىرىپ, پرەزيدەنت اكىمشىلىگى جانە ۇكىمەتكە بىرنەشە ناقتى تاپسىرما جۇكتەگەن بولاتىن. سونىڭ ءبىرى بۇعان دەيىن الماتى قالاسىندا جۇمىس جۇرگىزىپ كەلگەن قاۋىمداستىق كەڭسەسىن ەلورداعا كوشىرۋ ەدى. بۇل شارۋا قازىر تولىق ورىندالدى دەۋگە بولادى. سونىمەن قاتار نۇرسۇلتان ءابىش ۇلى شەتتەگى جانە ەلگە كوشىپ كەلەتىن اعايىندى قولداۋ ءۇشىن «وتانداستار» قورىن قۇرىپ, سول ارقىلى دۇنيەجۇزى قازاقتارى قاۋىمداستىعىمەن بىرلەسىپ, وتانداستارعا جان-جاقتى قولداۋ مەن كومەك بەرۋدىڭ ءىس-شارالارىن انىقتاپ, سوعان سايكەس كەشەندى باعدارلاما ازىرلەسىن دەگەن بولاتىن.
قازىرگى تاڭدا قور قۇرىلىپ, ءوز جۇمىسىن باستاپ كەتتى. سونىڭ ءبىر دالەلى, جۋىقتا كورشى رەسەي فەدەراتسياسىندا ءومىر ءسۇرىپ جاتقان قانداستارىمىز ومبى قالاسىندا باس قوسىپ, جيىن وتكىزدى. 2019 جىلدىڭ قاڭتار ايىنان باستاپ «وتانداستار» قورى كەشەندى تۇردە جۇمىسىن باستادى.
الداعى جىلى اتقارىلار تاعى ءبىر ۇلكەن ءىس – «كوشى-قون تۋرالى» زاڭعا وزگەرتۋلەر مەن تولىقتىرۋلار ەنگىزۋ ماسەلەسى كۇن تارتىبىنە قويىلىپ, بۇل قۇجات حالىقارالىق كوشى-قون ستاندارتى نەگىزىندە جەتىلدىرىلەدى دەپ كۇتىلۋدە. ياعني, الدا قابىلداناتىن جاڭا زاڭ ارقىلى ىشكى جانە سىرتقى كوشى-قون ماسەلەسىندە ورىن الىپ وتىرعان كەيبىر كەلەڭسىزدىك توقتاتىلارى انىق.
مۇحيت يزبانوۆ,
دۇنيەجۇزى قازاقتارى قاۋىمداستىعى توراعاسى بىرىنشى ورىنباسارىنىڭ كەڭەسشىسى
