توزىعى جەتكەن, اپاتتى ۇيلەر – كەز كەلگەن قالا باسشىسىنىڭ باس اۋرۋى. ويتكەنى ونداي عيماراتتار شاھار ءسانىن بۇزعانىنان بولەك, ءۇي تۇرعىندارىن باسپانامەن دە قامتاماسىز ەتۋ كەرەك. ۇيرەنشىكتى ءۇي, باۋىر باسقان اۋدانىنان كەتكىسى كەلمەيتىن ادام كوڭىلى تاعى بار. وسىنىڭ ءبارى ورال قالاسىندا ورايىمەن شەشىلىپ جاتىر. اپاتتى ۇيلەردى اۋىستىرۋدىڭ ورالدىق تاجىريبەسى بۇگىندە ەلىمىزدىڭ بارلىق وڭىرىنە ۇسىنىلۋدا.
وتكەنگە كوز سالساق, 2016 جىلى ورال قالاسىندا توزىعى جەتكەن, قۇلاعالى تۇرعان 52 ءۇي بولاتىن. وندا 1448 وتباسى الاڭ كوڭىل بولىپ تۇرىپ جاتتى.
ەلىمىزدە مەملەكەت پەن جەكەمەنشىكتىڭ ارىپتەستىگى باعدارلاماسى قولعا الىنعان تۇستا تىڭ يدەيا تۋدى: قالانىڭ قاق ورتاسىندا, كوممۋنيكاتسيا جەلىلەرىن تارتۋعا شىعىن كەتپەيتىن ىڭعايلى جەردە تۇرعان اپاتتى ءۇيدى قيراتىپ, ورنىنا جاڭا عيمارات تۇرعىزۋدى قۇرىلىس كومپانيالارى قولداپ الىپ كەتتى. ءۇي تۇرعىندارى ۋاقىتشا, قۇرىلىس اياقتالعانشا باسقا جەردە تۇرا تۇرادى, ولاردىڭ باسپانا جالداۋ شىعىنىن جەرگىلىكتى اتقارۋشى ورگاندار نەمەسە قۇرىلىس كومپانياسىنىڭ ءوزى كوتەرەدى. جاڭا ءۇي سالىنىپ بىتكەن سوڭ ول تۇرعىندار ءوزىنىڭ بۇرىنعى پاتەر كولەمىنە ساي باسپاناعا تەگىن يە بولادى. قالعان پاتەرلەردى كومپانيا ءوزى ساتادى. ەكى جاققا دا ءتيىمدى دەگەن وسى ەمەس پە؟!
مىنە, سوڭعى ءتورت جىل ىشىندە ورالدا وسىنداي 11 اپاتتى ءۇي سۇرىلگەن ەكەن. 113 پاتەردىڭ تۇرعىندارى باسقا جەرگە كوشىرىلىپ, كونە ءۇي ورىندارىندا قۇرىلىس قايناپ جاتىر. ەكى ءۇي قۇرىلىسى اياقتالىپ, جاڭا تۇرعىندارىن تاۋىپ تا ۇلگەردى: 2017 جىلى دەپو كوشەسىندەگى №18-ءۇيدىڭ قۇرىلىسى ءبىتىپ, 16 وتباسى جاڭا پاتەر كىلتىن السا, وتكەن جىلى 2-شاقىرىم كوشەسىندە دە كونە ءۇيدىڭ ورنىنا جاڭا عيمارات بوي كوتەرىپ, اپاتتى ۇيدەگى 32 وتباسى جاڭا پاتەرگە كوشتى. ءسويتىپ, ەكى جىلدا ورال قالاسى اكىمدىگىنىڭ باسپانا كەزەگىندە تۇرعان اپاتتى ۇيلەردىڭ 48 تۇرعىنى پاتەرىن جاڭارتىپ الدى.
بۇگىن پايدالانۋعا بەرىلگەن 9 قاباتتى, 126 پاتەرلىك ءزاۋلىم ءۇيدىڭ ورنىندا 12 پاتەرلىك جەرتابان ءۇي بولدى دەۋدىڭ ءوزى قيىن.
- مەملەكەتىمىز تاۋەلسىزدىك العاننان باستاپ ەلباسىمىزدىڭ پاراساتتى ساياساتى ارقاسىندا ەكونوميكالىق, ساياسي, الەۋمەتتىك جەتىستىكتەرگە جەتۋدە. ەلباسى نۇرسۇلتان ءابىش ۇلى نازارباەۆ قازاقستان حالقىنا جولداعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ»جولداۋىندا ەلىمىز ءۇشىن ماڭىزدى مىندەتتەردى جۇكتەپ, ەلىمىزدىڭ دامۋى مەن ەكونوميكالىق ىلگەرلەۋىنە بارشا قازاقستاندىقتارعا جول كورسەتىپ بەردى. بۇگىنگى كۇندە جۇزەگە اسىرىلىپ كەلە جاتقان مەملەكەتتىك باعدارلامالار مەن جوبالار شەڭبەرىندە ازاماتتاردى جۇمىسپەن قامتۋ, تۇرعىن ۇيگە قول جەتكىزۋ, ءوز الەۋەتىن جۇزەگە اسىرۋ ءۇشىن بارلىق جاعداي جاسالعان. بۇگىنگى شارا وسىنىڭ دالەلى, - دەدى جاڭا ءۇيدىڭ پاتەر كىلتىن تابىس ەتۋگە ارنالعان سالتاناتتى شارادا باتىس قازاقستان وبلىسىنىڭ اكىمى التاي كولگىنوۆ.
ءوڭىر باسشىسىنىڭ ايتۋىنشا, تۇرعىن ءۇي قۇرىلىسى – قازاقستان دامۋ ستراتەگياسىنىڭ باستى باعىتتارىنىڭ ءبىرى جانە جالپىۇلتتىق مانگە يە ماڭىزدى جۇمىستار قاتارىندا.
جوعارىدا ايتقانىمىزداي, ەلباسىنىڭ «بەس الەۋمەتتىك باستاماسىن» جۇزەگە اسىرۋ اياسىندا 7-20-25 باعدارلاماسى ورال قالاسىندا بىرتىندەپ ىسكە اسىرىلۋدا. «كاراۆاننىي پۋت» قۇرىلىس كومپانياسى بۇگىن تاپسىرىپ وتىرعان 126 پاتەرلىك تۇرعىن ءۇي 11 ايدىڭ ىشىندە سالىنىپ بىتكەن. ول «نۇرلى جەر» ينفراقۇرىلىمدى دامىتۋ مەملەكەتتىك باعدارلاماسى بويىنشا اپات جاعدايىندا تۇرعان ءۇيدىڭ پاتەر يەلەرىنە, تۇرعىن ءۇي كەزەگىندە تۇرعان وتباسىلارعا جانە «تۇرعىنۇيقۇرىلىسجيناقبانكى» سالىمشىلارىنا بەرىلەتىن بولدى.
پايعامبار جاسىنان اسقان وتەگەن سۇلتانعاليەۆ اقساقال بۇرىن ورال ەت كومبيناتىندا دارىگەر بولىپ قىزمەت ەتكەن ەكەن. ءوزى دە, جارى دا زەينەت دەمالىسىنا شىققان قاريالار وسى جەردەگى كونە پاتەردە ءۇش بالا تاربيەلەپ ءوسىرىپتى. بۇگىن اپاتتى ءۇي ورنىندا بوي كوتەرگەن سۋ جاڭا ءۇيدىڭ №102 پاتەرى وتەگەن ايۋپ ۇلىنا ءتيىپ, ەرەكشە قۋانىشتى.
بۇگىندە ورال قالاسىندا وسىنداي كوپپاتەرلى 5 ءۇي سالىنىپ جاتىر. ول ۇيلەردىڭ قۇرىلىسى 2019-2020 جىلدارى اياقتالماق.
«بولاشاقتا قۇلاعالى تۇرعان 7 كونە ۇيدەگى 76 پاتەر تۇرعىندارى دا وسىنداي جولمەن جاڭا باسپاناعا يە بولادى» دەيدى وبلىستىق قۇرىلىس باسقارماسى ماماندارى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
سۋرەتتى تۇسىرگەن تەمىربولات توقمامبەتوۆ
