تابيعاتتىڭ توسىن جاعدايى تۋرالى تايلاند تەحنولوگيالار جانە عىلىم مينيسترلىگى گيدرولوگيالىق جانە اۋىلشارۋاشىلىق اقپاراتتار ينستيتۋتى ءوزىنىڭ www.tmd.go.th رەسمي سايتىندا حابار تاراتقان. ينستيتۋت ماماندارىنىڭ مالىمەتىنشە, 1962 جىلدان بەرى بولماعان تروپيكالىق قاتتى داۋىل تايلاند وڭتۇستىگىنىڭ باسىم بولىگى, سامۋي مەن پحۋكەت ارالدارى جانە پحانگنگا مەن كرابي پروۆينتسيالارىنداعى تۋريستىك ايماقتارعا جاقىنداپ كەلەدى. دالىرەك ايتقاندا, تايلاندتىڭ وڭتۇستىگىندەگى سيام شىعاناعىنان انداماند تەڭىزىنە دەيىن, سامۋي, پحۋكەت, كرابي جانە پحانگنگادا جىلدامدىعى ساعاتىنا 65 شاقىرىمعا جەتەتىن قاتتى داۋىل تۇرادى.
«Reliefweb» پورتالىندا جاريالانعان ينستيتۋت وكىلدەرىنىڭ مالىمەتىنشە 1962 جىلى بولعان تروپيكالىق قاتتى قۇيىن كەزىندە 12 پروۆينتسيا قيراپ, 900-دەن استام ادام قايتىس بولعان. ال الداعى داۋىل سالدارىنان تەڭىز تولقىندارى 5 مەتردەن اسىپ كوتەرىلۋى مۇمكىن, سوندىقتان بارلىق تابيعي اپاتتاردىڭ سالدارىن جويۋ جونىندەگى اگەنتتىكتەرگە دايىن بولۋ ەسكەرتىلدى. ويتكەنى داۋىل تايلاند پەن ميانماداعى 5,3 ميلليونعا جۋىق ادام مەكەندەپ جاتقان اۋماقتى قامتيدى دەپ كۇتىلۋدە.
The New York Times تايلاند مەتەورولوگيالىق باسقارماسىنىڭ بارلىق سۋ كولىكتەرىنە سەنبىگە دەيىن جاعادا قالۋدى ەسكەرتكەنىن جازعان.
ءسىم تايلاندتاعى جەرگىلىكتى بيلىك وكىلدەرىنە سىلتەمە جاساي كەلە, «پابۋك» تروپيكالىق داۋىلىنىڭ 5 قاڭتاردا سيام شىعاناعىنان تايلاند جاعالاۋلارىنا جەتۋى مۇمكىن ەكەنىن ايتادى. ال اتالعان بيلىك وكىلدەرى جەتكىزگەن بولجام بويىنشا, 4 قاڭتاردا سۋراتتحاني, ناكحونسيتحاممارات, پحاتتحالۋنگ, سونگكحلا, پاتتاني, يالا, ناراتحيۆات, كرابي, ترانگ جانە ساتۋن پروۆينتسيالارىندا, 4-5 قاڭتاردا پحەتبۋري, پراچۋاپكحيريكحان, ناكحونسيتحاممارات, پحاتتحالۋنگ, سونگكحلا, پاتتاني, يالا, ناراتحيۆات, رانونگ, پحانگنگا, پحۋكەت, كرابي, ترانگ جانە ساتۋن پروۆينتسيالارىندا قاتتى جاۋىن جاۋماق.
سىرتقى ىستەر مينيسترلىگى قازاقستان ازاماتتارىنا توتەنشە جاعداي بولعاندا مينيسترلىك سايتىندا كورسەتىلگەن مالىمەتتەر ارقىلى تايلاندتاعى قازاقستان ەلشىلىگىنە حابارلاسۋدى ەسكەرتەدى.
ايدانا شوتبايقىزى,
«ەگەمەن قازاقستان»
