اۋداندىق تاريحي-ولكەتانۋ مۋزەيىندە اۋدان اكتيۆىمەن, ءماسليحات دەپۋتاتتارى, جاستار ۇيىمدارىمەن كەزدەسكەن ءوڭىر باسشىسى جينالعان جۇرتتى ەلباسى جارلىعىمەن تانىستىرىپ, جاڭا جىلدى جاڭا اتاۋمەن باستاپ وتىرعان اۋدان حالقىن قۇتتىقتادى.
– زەلەنوۆ اۋدانى – ورال قالاسىنىڭ ازىق-ت ۇلىك بەلدەۋىنە جاتاتىن, ءوندىرىسى مەن اۋىل شارۋاشىلىعى دامىعان ءوڭىر. بۇل جەردىڭ قازاق تاريحىنداعى ورنى دا ماڭىزدى. اۋداننىڭ وتكەنى مەن بۇگىنى, تەرەڭ تاريحى تۋرالى وسى مۋزەيدەن دە كورىپ وتىرمىز. وزدەرىڭىز بىلەسىز, وتكەن جىلى وسى ءوڭىردىڭ جاستارى اۋدان اتاۋىن وزگەرتۋدى ۇسىندى. ونى حالىق قولدادى. ەندى, مىنە, ەل-جۇرتتىڭ تىلەگىن ەلباسى دا ورىنداپ, اۋدان اتاۋىن – بايتەرەك اۋدانى دەپ وزگەرتۋگە جارلىق شىعارىپ وتىر, – دەدى التاي كولگىنوۆ.
ايتا كەتەيىك, بىلتىر قىركۇيەك ايىندا باتىس قازاقستان وبلىستىق ءماسليحاتىنىڭ كەزەكتى سەسسياسىندا زەلەنوۆ اۋدانىن بايتەرەك اۋدانى دەپ اتاۋ ماسەلەسى قارالعان ەدى. باتىس قازاقستان وبلىستىق تىلدەردى دامىتۋ باسقارماسىنىڭ باسشىسى ايگۇل مىڭباەۆا زەلەنوۆ اۋدانىنداعى بارلىق 22 اۋىلدىق وكرۋگتە جانە اۋدان ورتالىعىندا وسى ماسەلە تالقىلانىپ, قوعامدىق تىڭداۋ كەزىندە كوپشىلىك تاراپىنان قولداۋ تاپقانىن ايتقان بولاتىن. كوپشىلىك ۇيعارىمى وبلىستىق ءماسليحات سەسسياسىنا قاتىسقان دەپۋتاتتار تاراپىنان دا قولداۋ تاپتى. ءسويتىپ ۇسىنىس استاناعا جىبەرىلگەن.
– جاڭالىقتى اۋدان حالقى قۋانىشپەن قارسى الدى. ەل-جۇرتتىڭ تىلەگى ەلەۋسىز قالماي, ەلباسى ارنايى جارلىق شىعارىپ, اۋدانىمىزدىڭ اتاۋى بايتەرەك بولعانىنا قۋانىشتىمىز, – دەيدى اۋداندىق تاريحي-ولكەتانۋ مۋزەيىنىڭ ديرەكتورى, اۋداندىق ءماسليحات دەپۋتاتى نۇرجان ءدۇزباتىر.
زەلەنوۆ اۋدانى بولەك اكىمشىلىك قۇرىلىم رەتىندە 1939 جىلى قۇرىلعان. 1997 جىلى اۋدان قۇرامىنا پريۋرالنىي اۋدانى كىردى, جالپى اۋماعى – 7,4 مىڭ شارشى شاقىرىمدى قۇرايدى. ورتالىعى پەرەمەتنوە اۋىلى وبلىس ورتالىعى ورال قالاسىنان 38 شاقىرىمدا ورنالاسقان. اۋداندا 22 اۋىلدىق وكرۋگ, 68 اۋىلدىق ەلدى مەكەن بار, اۋدان حالقى 60 مىڭنان اسادى. زەلەنوۆ اۋدانى باتىس قازاقستان وبلىسىنىڭ سولتۇستىگىندە, قازاقستان رەسپۋبليكاسىنىڭ مەملەكەتتىك شەكاراسىن بويلاي ورنالاسقان. رەسەي فەدەراتسياسىنىڭ 3 وبلىسىمەن – ورىنبور وبلىسىنىڭ پەرۆوماي, تاشلا اۋداندارىمەن, سامارا وبلىسىنىڭ بولشەچەرنيگوۆ اۋدانىمەن جانە ساراتوۆ وبلىسىنىڭ وزينكي, پەرەليۋب اۋداندارىمەن شەكتەسەدى.
قازبەك قۇتتىمۇرات ۇلى,
«ەگەمەن قازاقستان»
