كانادانىڭ CTV جاڭالىق اگەنتتىگىنىڭ مالىمەتىنە سۇيەنسەك, قازاقستان قۇراماسىن قولداعاندار سانى ارتىپ, جانكۇيەرلەر «العا, قازاقستان» دەپ قولداي كورسەتىپ وتىرعان ەكەن.
ۆيكتوريا قالاسىنا جينالعان كورەرمەندەر قولداۋى قازاقستان مەن فينليانديا اراسىنداعى كەزدەسۋدەن كەيىن باستالعان. سول ماتچتا ەلىمىزدىڭ قۇراماسى 5:0 ەسەبىمەن ەسە جىبەردى. ال ويىن بارىسىندا قاقپاشى دەميد ەرەمەەۆ 51 مارتە قاقپاسىن شايبادان امان الىپ قالعان ەدى.
اقش ۇلتتىق قۇراماسىنىڭ باپكەرى مايك حاستينگستىڭ سوزىنە قاراعاندا, ۆيكتورياعا جينالعان جانكۇيەرلەر قازاقستاندىقتارعا ەرەكشە ىستىق سەزىمىن بىلدىرگەن.
«كانادا حوككەي» ماركەتينگ ءبولىمىنىڭ جەتەكشىسى دين ماكينتوشتىڭ ايتۋىنشا, قازاقستان قۇراماسىنىڭ كوپجىلدىق ۇزىلىستەن كەيىن تارتىسقا قايتا قوسىلۋى, تۋرنيرگە ماركەتينگتىك تۇرعىدا پايدا اكەلگەن. دۇكەن سورەلەرىندە قازاقستان قۇراماسىنىڭ جەيدەلەرى قالماعان ەكەن. «كانادا جانكۇيەرلەرى جەڭىلگەندەردى شەتتەتپەيدى, ءتىپتى بىرنەشە جىل ساپتا كورىنبەگەندەردى دە جىلى قابىلدايدى», دەيدى دين ماكينتوش.
قازاقستان قۇراماسىنىڭ جەيدەسىن كيگەن جانكۇيەر بيلل بريستوۋ قازاقستاندىق حوككەيشىلەردىڭ جىگەرىنە ءتانتى بولىپتى.
«جىگىتتەر جان-تانىمەن وينادى. ولاردان باسقا كوماندالاردىڭ ساپىندا ۇلتتىق حوككەي ليگاسىندا ونەر كورسەتەتىندەر بار. سوعان قاراماستان, قازاقستاندىق سپورتشىلار ءار ويىن سايىن بارىن سالادى», دەدى ول.
