ال ەكىباستۇزداعى «بوگاتىر كومىر» جشس-ءنىڭ كومىر كەنىشتەرىنەن جىل باسىنان بەرى جوسپارلانعان 40,7 ميلليون توننانىڭ ورنىنا 44,5 ميلليون توننا كومىر جونەلتىلدى. ەكسپورت كولەمى 9,4 ميلليون توننانى قۇرايدى.
سونىمەن بىرگە, سەرىكتەستىكتە كوممۋنالدىق-تۇرمىستىق كومىردى (كتك) جونەلتۋ دە تۇتىنۋشىلاردىڭ تاپسىرىستارىنا سايكەس جوسپارلى تۇردە ىسكە اسىرىلۋدا.
كتك بويىنشا 2018 جىلعا ارنالعان جىلدىق جوسپار 1 ميلليون توننانى قۇراسا, جوسپار 25 قىركۇيەكتە ورىندالدى.
وتكەن جىلدىڭ جەلتوقسان ايىنىڭ سوڭىندا سەرىكتەستىك ەكىباستۇز كومىرىن پايدالاناتىن اۋىلدىقتارعا, اۋىلداعى شاعىن قازاندىقتارعا 1,51 ميلليون توننانى قۇرايتىن تۇرمىستىق-كوممۋنالدىق كومىر ساتىلدى.
الداعى ۋاقىتتا كومىر وندىرەتىن كاسىپورىن ونىمدىلىك پەن باسەكەگە قابىلەتتىلىككە جەتكىزەتىن ساندىق جۇيەگە كوشىرپەكشى.
بۇل كۇندەرى كاسىپورىندا تاۋ-كەن جابدىقتارىن جوندەۋدى باسقارۋ مەن باقىلاۋدىڭ, جوسپارلاۋدىڭ اۆتوماتتاندىرىلعان جۇيەسى ەنگىزىلگەن.
ەكى جىلدىڭ ىشىندە «سەۆەرنىي» كەنىشىندە ونىمدىلىگى جىلىنا 2 ميلليون تونناعا دەيىن كومىر وندىرەتىن كەشەن سالۋ, سونداي-اق, جەرسەرىكتىك جۇيەنى قولدانۋ ارقىلى تاۋ-كەن كولىكتىك كەشەنىن ديسپەتچەرلىك باسقارۋدىڭ اۆتوماتتاندىرىلعان جۇيەسىن ەنگىزۋ جوباسىن ىسكە اسىرۋ جوسپارلانعان.
سونىمەن بىرگە, تاۋ-كەن جابدىقتارىن: ەكسكاۆاتورلاردى, تەحنولوگيالىق كولىكتى, بۋلدوزەرلەردى, بۇرعىلاۋ بىلدەكتەرىن جاڭارتۋدىڭ 10 جىلدىق مەرزىمگە ەسەپتەلگەن باعدارلاماسى قابىلداندى.
ال «سامۇرىق-ەنەرگو» اق – ءىرى ەلەكتر ەنەرگەتيكالىق حولدينگىندە ەنەرگيا وندىرەتىن كاسىپورىندارعا ارنالعان ەلەكتر ەنەرگياسى نارىعىنداعى جاڭا ەرەجەلەر بەكىتىلۋدە.
حولدينگتىڭ قىزمەتى ەلەكتر جانە جىلۋ ەنەرگياسىن ءوندىرۋ, ەلەكتر ەنەرگياسىن جەتكىزۋ, ءبولىپ-تاراتۋ جانە ساتۋ, ەنەرگەتيكالىق كومىر ءوندىرۋ.
حولدينگتىڭ قۇرامىنا ءبىزدىڭ وڭىردەن ەنەرگيا جانە كومىر وندىرەتىن «ەكىباستۇز گرەس-1» جشس, «ەكىباستۇز گرەس-2 ستانسالارى» اق, «بوگاتىر كومىر» جشس ەنەدى.
2019 جىلدىڭ 1 قاڭتاردان باستاپ, ءوندىرۋشى جابدىقتىڭ توزۋ دەڭگەيىن قىسقارتۋ ماقساتىندا, ەلىمىزدە قۋات نارىعى قولدانىسقا ەنگىزىلدى. بۇل ماقسات-جاڭا ەنەرگيا كاسىپورىندارىن قۇرۋعا, جۇمىس ىستەپ تۇرعاندارىن جاڭعىرتۋعا جانە قايتا قۇرۋعا مۇمكىندىك بەرەدى.
وتكەن جىلى جەلتوقساندا ەلىمىزدە بىرىڭعاي ەلەكتر ەنەرگەتيكالىق جۇيەسىنىڭ (بەج) سولتۇستىك جانە وڭتۇستىك ايماقتارى بويىنشا ەلەكتر قۋاتىنىڭ ورتالىقتاندىرىلعان ساتىلىمى ءوتتى.
ساۋدا-ساتتىق ەلەكتر ەنەرگياسى نارىعىنىڭ ەلىمىزدەگى وپەراتورى «ەقرقو» اق-تىڭ ساۋدا الاڭىندا جۇرگىزىلدى. سولتۇستىك جانە وڭتۇستىك ايماقتارىن بايلانىستىراتىن ەلەكتر جەتكىزۋ جەلىلەرىنىڭ وتكىزۋ قابىلەتىن ەسكەرە وتىرىپ وتكىزىلدى.
قۋاتتىڭ وتكىزىلگەن ساۋدا-ساتتىق ناتيجەلەرى 2019 جىلى «سامۇرىق-ەنەرگو» اق ەنەرگەتيكالىق جابدىعىنىڭ ۇزدىكسىز جۇمىس ىستەۋىن قامتاماسىز ەتۋ ماقساتىندا تولىققاندى ينۆەستيتسيالىق جۇمىس جۇرگىزۋگە مۇمكىندىك بەرەدى
ساتىلىم بارىسى ەلەكتر ەنەرگياسى نارىعىنىڭ ساۋدا الاڭىندا جۇرگىزىلىپ, وعان ەلىمىزدىڭ «سامۇرىق-ەنەرگو» اق-تىڭ نەگىزگى ءوندىرۋشى 5 كاسىپورنى: «الەس» اق, «ەكىباستۇز گرەس-1» جشس, «ەكىباستۇز گرەس-2 ستانسالارى اق, «شاردارا سەس» اق جانە « مويناق سەس» اق قاتىستى.
فاريدا بىقاي,
«ەگەمەن قازاقستان»
پاۆلودار
