ەسىكتى ايەكەڭنىڭ ءوزى اشتى. توقساندى ەڭسەرىپ تاستاسا دا, بەلى بۇگىلمەگەن, ەڭسەسى تۇسپەگەن شيراق قالپىندا.
تورگى بولمەگە وزدىق. جازۋ ۇستەلىنىڭ ءۇستى قوبىراعان قاعازعا تولى. ارقيلى كىتاپتار, كۇندەلىكتى گازەت-جۋرنالدار. ەڭ ۇستىندەگى «Egemen Qazaqstan» كوزىمىزگە وتتاي باسىلدى.
مەنىڭ گازەت-جۋرنالعا نازار اۋدارعانىمدى اڭعارعان بولۋى كەرەك, ءسال جىميىپ كۇلدى دە:
– ءالى دە جازۋ-سىزۋدان, وقۋدان قول ۇزگەن جوقپىز,–دەدى ايەكەڭ, – كەيدە وتكەن ءومىر سوقپاقتارىن كوز الدىما ەلەستەتىپ, كوكىرەكتىڭ تەرەڭ ءبىر تۇكپىرىندە جاتقان, ۋاقىت شىمىلدىعىمەن تۇمشالانعان جايلاردى قايتا جاڭعىرتىپ, كۇندەلىك جازعان بولامىن. اتقا ءمىنىپ جۇرگەن كەزىمىزدە تالاي جاقسى-جايساڭمەن جولداس بولدىق قوي. وسى كۇنى سولاردىڭ كوبى ومىردەن ءوتىپ كەتتى. كەيىنگىگە ونەگە بولسىن دەپ ومىرلەرىنىڭ عيبراتتى تۇستارىن مارجان تەرگەندەي ەكشەپ جازعىم كەلەدى. بىراق قايرات كەمىگەن سوڭ قالام دا ىنتاعا يلىكپەيدى ەكەن عوي.
ايدارحان تەمىرباەۆ اقساقال زامانىندا ەكى بىردەي اۋداندىق گازەتتىڭ رەداكتورى بولعان ادام. جايعاسىپ وتىرعاننان كەيىن اڭگىمەنىڭ اۋ-جايى باسىلىم جايىنا اۋىستى. وندا دا شىعا باستاعانىنا ءجۇز جىل تولعالى وتىرعان «Egemen Qazaqstan» گازەتى تاقىرىبىنا.
– قازىر گازەت وتە مازمۇندى شىعىپ جاتىر. مەن جيىرما بەسكە تولار-تولماستا زەرەندى اۋداندىق «سوتسياليستىك جول» گازەتىنىڭ رەداكتورى بولىپ تاعايىندالدىم. اۋداندىق پارتيا كوميتەتىنىڭ ءبىرىنشى حاتشىسى حاسان بەكتۇرعانوۆتىڭ ۇسىنۋىمەن. ودان سوڭ سول كەزدەگى كوكشەتاۋ وبلىسىنىڭ جەر كولەمى جاعىنان ەڭ ۇلكەن اۋدانى – قىزىلتۋدا اۋداندىق گازەتتىڭ رەداكتورى بولىپ تاعايىندالدىم. ءسوز ونەرى, ونىڭ ىشىندە كەز كەلگەنگە جالىنان سيپاتپايتىن جۋرناليستيكا وتە قيىن ونەر. ۇيرەنۋدەن جالىقپادىق. اۋدان جۋرناليستەرى وبلىستىق, رەسپۋبليكالىق باسىلىمدارعا قارايلايدى. ول كەزدە شىنىن ايتقاندا, رەسپۋبليكالىق «سوتسياليستىك قازاقستان» گازەتىنىڭ ءتىلى تىم رەسميلەۋ بولاتىن. الگى «سق-نىڭ ءتىلى سىقيىپ تۇرادى» دەي-تۇعىن ءازىل ءسوزدىڭ شىعۋىنا سەبەپ بولعان سول جايت ەدى عوي. قازىرگى «ەگەمەنمەن» سالىستىرۋدىڭ ءوزى قيىن. ۋاقىت العا جىلجىعان سايىن گازەتتىڭ دە تۇرلەنىپ, مازمۇنى بايىپ, وزگەرۋى زاڭدى. ءسوز اراسىندا «ەگەمەننىڭ» سوڭعى كەزدە ادام تۇشىنىپ وقيتىن گازەتكە اينالعاندىعىن ايتا كەتسەك تە ارتىق بولماس. اسىرەسە «تىرشىلىك تۇيتكىلدەرى», «ىزگىلىك يىرىمدەرى», «قاز-قالپىندا» ايدارلارىمەن بەرىلەتىن ماتەريالدارى قانداي تاماشا؟! سودان كەيىنگى ءبىر جاي «مۇمكىندىگى شەكتەۋلىلەر مۇمكىندىگى» ايدارىمەن بەرىلەتىن ماتەريالداردى وقىعاندا, كوڭىلىڭنىڭ ارعى تۇكپىرىندەگى بۇيىعىپ جاتقان سەزىمدەر ويانىپ, ءارى-ءسارى كۇيگە تۇسەسىڭ. مىنا زاماندا ون ەكى مۇشەسى ساۋ كەيبىر ادامدار ەكى قولىنا ءبىر كۇرەك تابا الماي داعدارىپ جۇرگەندە, تاعدىردىڭ تالكەگىنە ۇشىراعان كەمباعالداردىڭ ءومىردىڭ وكپەك جەلىنە بوي بەرمەي, قايتا العا ۇمتىلۋى تاڭعالدىرادى. ەرىكسىز ريزا بولاسىڭ. مەن سولاي ەكەنمىن-اۋ دەپ بىرەۋگە قول جايىپ وتىرماي, ءوز بەتىنشە تىربانىپ تىرلىك ىستەۋى قانداي عانيبەت. بۇل تاماشا مىسال ەمەس پە؟! مۇگەدەكتەردىڭ ءوزى مۇمكىندىگىنشە تىرلىك ىستەۋى وزگە جۇرتتىڭ دا نامىسىنا ءتيىپ, جىگەرىن جانىماي ما؟ مەنىڭشە, بۇل سول ءۇشىن قاجەت. وسىنى گازەت باسشىلارى دۇرىس اڭعارىپ وتىر. قازىر اعا گازەت ەلدى جاقسى ىستەردىڭ نەگىزىندە ۇيىستىرىپ, سوعان ناسيحاتشى بولىپ, جول سىلتەپ جۇرگەندىگى جاراسىمدى.
قارت ءجۋرناليستىڭ قاداۋ-قاداۋ ويىن قالپىنشا, شىپ-شىرعاسىن شىعارماي جازىپ الۋعا تىرىستىق. اسىرەسە ەلمەن بىرگە ەسەيىپ, ەل قامىن جەپ, جۇرت جايىن ويلاعان جاقسى باسىلىم – «Egemen Qazaqstan» گازەتىنىڭ بۇگىنگى دەڭگەيىن قۇپتاعان, قۋاتتاعان لەبىزى قانداي؟! بۇل جۇزگە تولعانىمەن جالىنى جاستىڭ قۋاتىنداي باسىلىمنىڭ بولاشاعىنا دەگەن سەنىم!
بايقال ءبايادىل,
«ەگەمەن قازاقستان»
اقمولا وبلىسى
