مۇندايدا قازاق «اقسارباس!» دەيدى. ءبىز دە سويتتىك. «مۇزبالاقتان» كەيىن-اق ساپالى تۇسىرىلگەن وتاندىق انيماتسياعا جاقسى ماعىناسىندا دانىگىپ العان كوڭىل «كۇلتەگىننىڭ» كورسەتىلىمىنەن دە ۇلكەن ءۇمىت كۇتكەن. سەنىم الداماپتى. باستى ولجا – وسى.
كۇللى تۇركى الەمىنە ورتاق داڭقتى قولباسشى – كۇلتەگىننىڭ ەرلىگى جايلى باياندالاتىن كوركەم تۋىندى پرەمەراسىنىڭ ەلباسى نۇرسۇلتان نازارباەۆتىڭ « ۇلى دالانىڭ جەتى قىرى» اتتى باعدارلامالىق ماقالاسىنىڭ جارىققا شىعۋىمەن تۇسپا-تۇس كەلۋىنىڭ ءوزى دە – وتاندىق كينەماتوگرافيامىزداعى ۇلتتىق يدەولوگيا ماسەلەلەرىنىڭ وڭ باعىتتا جۇرگىزىلىپ كەلە جاتقاندىعىنىڭ ايقىن ايعاعى بولسا كەرەك.
مادەنيەت جانە سپورت مينيسترلىگىنىڭ تاپسىرىسى بويىنشا جاس رەجيسسەر-انيماتور اداي ءابىلدانىڭ قولىنان شىققان اتالمىش تاريحي انيماتسيالىق تۋىندى كوشپەندى حالىقتاردىڭ باسىن بىرىكتىرىپ, ۇلى دالا ءداستۇرىن جالعاستىرعان تۇرىك قاعاناتىنىڭ داڭقتى اسكەري قولباسشىسى كۇلتەگىننىڭ جاستىق شاعى مەن قاھارماندىق ەرلىگىنەن سىر شەرتەدى. فيلم ءوزىنىڭ سيۋجەت شىتىرماندىعى, وقيعا ديناميكاسى ءھام ستسەناري سونىلىعىمەن ەرەكشەلەنەدى.
– «كۇلتەگىن» ءفيلمى شىعارماشىلىق ۇجىم ءۇشىن ۇلكەن تاجىريبە بولدى. تۇسىرە ءجۇرىپ ۇيرەندىك, بىلدىك, دامىدىق. اتالمىش تۋىندىنى جارىققا شىعارۋعا ەلىمىزدىڭ جيىرمادان اسا ۇزدىك كومپيۋتەرلىك گرافيكا جانە انيماتسيا ماماندارى اتسالىستى. فيلم نەبارى ءبىر جىلدىڭ ىشىندە ءتۇسىرىلىپ, وڭدەلىپ, ەندى مىنە, كورەرمەنىمەن قاۋىشىپ وتىر. بۇل – حالىقارالىق ستاندارتتار بويىنشا وتە از ۋاقىت. الايدا بار كۇشىمىز بەن جانىمىزدى سالىپ جاساپ شىعارعان تۋىندىمىز كىشكەنتاي كورەرمەندەرىمىزبەن قاتار, بارشا ونەرسۇيەر قاۋىمنىڭ دا كوڭىلىنەن شىعادى دەپ سەنەمىز, – دەدى فيلم رەجيسسەرى اداي ءابىلدا.
بۇعان دەيىن شىعارماشىلىق قارىمىن «قوڭىراۋ» (2009 ج.), «ميكو» (2009 ج.), «اڭشى» (2010 ج.), «كوكبالاق» (2011 ج.), «جەرۇيىق» (2013 ج.), «كىلەم ۇستىندەگى قالا» (2014 ج.) سىندى بىرنەشە قىسقامەترلى فيلمدە سىناپ كورگەنىمەن, «كۇلتەگىن» – رەجيسسەر اداي ءابىلدانىڭ تولىقمەترلى انيماتسيالىق فيلمدەگى دەبيۋتى. العاشقى تاجىريبەنىڭ ارينە جاۋاپكەرشىلىگى دە جوعارى بولادى. سونى سەزىنگەندىكتەن دە بولار, كۇن دەمەي, كۇن دەمەي ىزدەنگەن رەجيسسەر ەڭبەگى ءوز جەمىسىن بەرىپ, قازاق كينەماتوگرافياسىنىڭ قورجىنى جانە ءبىر ماعىنالى دا مازمۇندى تىڭ تۋىندىمەن تولىعىپ وتىر. اتالمىش فيلم 22 قاراشادان باستاپ جالپىحالىقتىق پروكاتقا شىقتى.
نازەركە جۇماباي,
«ەگەمەن قازاقستان»
