ءوڭىر باسشىسى «يدەال پلاست CONSTRUCTION» جشس-ءنىڭ مەتالل-پلاستيكالىق تەرەزەلەر مەن ۆيتراجدار شىعاراتىن فابريكاسىندا بولدى. فابريكا 2009 جىلى اشىلعان. بۇگىندە مۇندا ءوندىرىس پروتسەسىن 80 پايىزعا دەيىن اۆتوماتتاندىرۋعا مۇمكىندىك بەرەتىن الدىڭعى قاتارلى تۇرىك جابدىعى ورناتىلعان. بۇل جوعارى حالىقارالىق ساپا ستاندارتتارىن ساقتاۋدى قامتاماسىز ەتەدى. كاسىپورىن باسشىسى اركادي ياكوۆلەۆتىڭ ايتۋىنشا وسىعان ۇقساس جابدىق تەك الماتىدا عانا بار.
فابريكادا 25 ادام جۇمىسپەن قامتىلعان. ورتاشا ەڭبەكاقى 90-110 مىڭ تەڭگە. تولىق ىسكە قوسىلعان كەزدە مۇندا جىلىنا 215 مىڭ شارشى مەتر تەرەزە مەن 120 مىڭ شارشى مەتر ۆيتراج شىعارا الادى. ءونىم قازاقستاننىڭ بارلىق وڭىرىندە جوعارى سۇرانىسقا يە.
ءوندىرىستى قاراپ شىققان وبلىس اكىمى دامۋ جوسپارىمەن تانىسىپ, تەحنيكالىق جاراقتانۋى مەن جوعارى تەحنولوگيالىق جابدىققا تاڭدانعانىن جەتكىزدى.
- تەحنولوگيالار مەن يننوۆاتسيالاردىڭ بولاشاعى بار. ارىپتەستەرىڭىز – شاعىن جانە ورتا بيزنەس وكىلدەرى سىزدەردەن ۇيرەنسە عوي. ءوز كەزەگىمىزدە, بىزدەر دامىپ, ەكسپورتقا شىعىپ, زاماننان ىلگەرى جۇرەتىن جەرگىلىكتى وندىرۋشىلەرگە جان جاقتى قولداۋ كورسەتۋگە دايىنبىز. بۇل ءۇشىن كوپتەگەن مەملەكەتتىك قولداۋ شارالارى بار, دەپ اتاپ ءوتتى ءوڭىر باسشىسى.
ايتا كەتۋ كەرەك, 2019 جىلى فابريكا ءونىم تۇرلەرىن كەڭەيتپەك.
- «بيزنەستىڭ جول كارتاسى – 2020» مەملەكەتتىك باعدارلاماسى اياسىندا لاميناتتالعان جانە بويالعان پۆح-پروفيلدەرىن شىعارۋدى جولعا قويۋدى جوسپارلاپ وتىرمىز, - دەدى جوسپارلارىمەن بولىسكەن اركادي ياكوۆلەۆ.
سونداي-اق, وبلىس اكىمى مۇناي-گاز سالاسىنداعى ونەركاسىپ نىساندارىن جوبالاۋ, سالۋ, جاڭعىرتۋ جانە تەحنيكامەن قايتا قارۋلاندىرۋ قىزمەتتەرىن كورسەتەتىن «ەكوەكسپرەسس اقتوبە» جشس – كوپسالالى ينجەنەرلىك-قۇرىلىس جانە ءوندىرىس كاسىپورنىنا باردى. مۇندا مۇناي قىزدىراتىن پەشتەر, بۋ گەنەراتور قوندىرعىلارى مەن باسقا دا مامانداندىرىلعان جابدىقتار وندىرىلەدى. بۇگىندە كاسىپورىننىڭ 2009 جىلدان بەرى جۇمىس جاساپ كەلە جاتقان سەرىكتەستەرى قازاقستانداعى ءىرى مۇناي وندىرەتىن, ەنەرگەتيكالىق جانە مۇناي سەرۆيس كومپانيالارى بولىپ تابىلادى.
تەمىر قۇسايىن,
«ەگەمەن قازاقستان»
