زەرتتەۋلەر كورسەتكەندەي, سەنەك اۋىلى اكىمدىگى مەن سوقىرلار قوعامى اراسىندا مەملەكەتتىك ساتىپ الۋ تۋرالى شارت جاسالعان. وندا تاپسىرىس الۋشى قاراقيا اۋدانىنداعى ءبىر عيماراتتى جوندەۋ جانە اباتتاندىرۋ جۇمىستارىنا كىرىسەدى. ورىنداۋ مەرزىمى - 45 كۇن.
تاپسىرىس بەرۋشى اكىمدىك وكىلدەرىنىڭ ايتۋىنشا, جوندەۋ جۇمىستارى تالاپقا ساي جۇرگىزىلگەن, بىراق 20 كۇنگە كەشىكتىرىلىپ, اتقارىلعان جۇمىستار تۋرالى اكت ەڭ سوڭىندا تاپسىرىلىپ وتىر.
- تەحنيكالىق سيپاتتامالاردا كورسەتىلگەن جۇمىستاردان باسقا, شارتتا قامتىلماعان قوسىمشا تاپسىرمالاردى ءوز ەسەبىمىزدەن جۇزەگە اسىردىق. مەردىگەر كەلىسىمىنە قول قويىلعاننان كەيىن جۇمىس بارىسىندا جوبالاۋ-سمەتالىق قۇجاتتامادا قامتىلماعان جول جيەكتەرىنىڭ تاسىن توسەۋ ءىسى قوسىلعان. ونسىز جول سالۋ مۇمكىن ەمەس, ءارى جيەكتەردىڭ ساپاسى ءۇشىن ماڭىزدى ەكەنى انىقتالدى. مۇنان وزگە تاپسىرىس بەرۋشى جەرگىلىكتى باعالاۋلار بويىنشا توسەمتاس توسەۋ ءۇشىن جول جاعالاۋى كولەمى 80 تەكشە مەتر دەپ بەلگىلەگەن. ءىس جۇزىندە 150 تەكشە مەتر جەر جوندەلگەن. اتالعان جاعدايلار تۋرالى سەنەك اۋىلى اكىمگە ۋاقىتىلى حابارلاندى, دەيدى كاسىپكەر ب.تىلەپوۆ.
بۇگىندە قازاق سوقىرلار قوعامىنىڭ اقتاۋ وقۋ-وندىرىستىك كاسىپورنى مەملەكەتتىك ساتىپ الۋ كەلىسىم-شارتىنداعى جوندەۋ جانە اباتتاندىرۋ بويىنشا بارلىق جۇمىستار تولىقتاي اتقارىلعان. الايدا, اۋىل اكىمى وزگە دە قوسىمشا جۇمىستاردى ورىنداۋدى تالاپ ەتىپ, ءتيىستى قۇجاتتارعا قول قويماعان. كاسىپكەر ەل يگىلىگى ءۇشىن قوسىمشا تاپسىرمانى ورىنداۋعا قارسى ەمەس. تەك وعان دا قارجى شىعىندارى تالاپ ەتىلەتىندىكتەن وسىعان دەيىن ورىندالعان جۇمىستار بويىنشا تولىق ەسەپ ايىرىسۋىن سۇرايدى.
سونىمەن قاتار, سەنەك اكىمى كاسىپكەردى ورىنداۋ مەرزىمىن بۇزدى دەپ مەملەكەتتىك تاپسىرىستاردى ورىنداۋعا جوسىقسىز قاتىسۋشىلار دەپ تانۋ تۋرالى تالاپ-ارىزبەن مامانداندىرىلعان اۋدانارالىق ەكونوميكالىق سوتقا جۇگىنگەن. سونداي-اق, تالاپكەر سوت پروتسەسى باستالماي تۇرىپ, تالاپ قويۋ كەزەڭىن ساقتاماعان.
ماڭعىستاۋ وبلىسى كاسىپكەرلەر پالاتاسىنىڭ جاڭاوزەن فيليالىندا وسى ماسەلە بويىنشا دوڭگەلەك ۇستەل ءوتتى. وعان فيليال ديرەكتورى ق.كوشەنوۆ, سەنەك اۋىلىنىڭ اكىمى ب.ەركەعۇلوۆ, ساراپشى ق.ساليحوۆ, كاسىپكەرلەر قۇقىعىن قورعاۋ جانە سىبايلاس جەمقورلىققا قارسى كۇرەس كەڭەسىنىڭ توراعاسى ش.سۇلتانوۆ, وڭىرلىك كاسىپكەرلەر پالاتاسى ديرەكتورىنىڭ ورىنباسارى ءا. جاناەۆ, جاڭاوزەن پروكۋرورىنىڭ ورىنباسارى ءا.بوراشەۆ قاتىستى.
- شارا سوڭىندا اۋىل اكىمى اياقتالعان جۇمىستاردىڭ اكتىسىن بەرۋگە, جۇمىس قۇنىن تولىق تولەۋگە ءارى سوتقا جولدانعان ارىزدى قايتارىپ الۋعا ءتيىس دەپ كەلىسىلدى. ال, سوقىرلار قوعامى قوسىمشا جۇمىستاردى تولىق ورىنداۋعا مىندەتتەلدى, دەيدى كەڭەس توراعاسى ش.سۇلتانوۆ.
وسىلايشا, تاراپتار اراسىندا تۋىنداعان ماسەلە بەيبىت جولمەن شەشىلدى. قازاق سوقىرلار قوعامىنىڭ اقتاۋ وقۋ-وندىرىستىك كاسىپورنىنىڭ تالابى تولىعىمەن قاناعاتتاندىرىلدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
