استانا: جاڭا ماۋسىمعا – جاڭا سەرپىلىس
«استانا» ۆەلوكلۋبى ءۇشىن وتكەن ماۋسىم ساتسىزدەۋ اياقتالدى. مۇنى كوماندا باسشىلىعى دا مويىنداپ وتىر. «دجيرو دە يتاليا» كوپكۇندىگىنىڭ كوماندالىق ەسەبىندە توپ جاردى دەمەسەڭىز, «استانا» الىسقا شابا المادى. «استانانى» قاشاندا بيىكتەن كورۋگە داعدىلانعان جانكۇيەر كوڭىلى قوڭىلتاقسىپ قالدى. شاباندوزداردىڭ بابى كەلىسكەنىمەن, باعى شاپپاعان ءسات ەدى بۇل. جىعىلعانعا جۇدىرىق, الەكساندر ۆينوكۋروۆتىڭ «تۋر دە فرانستاعى» جاراقاتى دا كومانداعا ۇلكەن سوققى بولدى. دەگەنمەن, بولارى بولدى, بوياۋى ءسىڭدى. وتكەن ماۋسىمنان قايىر بولمادى دەپ قايعىرۋعا بولماس. «استانا» ءالى سپورتتىق ارەنادا. بەدەل, مۇمكىندىك بار. ەندەشە, جاڭا عانا شىمىلدىعىن تۇرگەن 2012 جىلعى ماۋسىمنان جەڭىس كۇتسەك, ارتىق ەمەس.
«استانا» ۆەلوكلۋبى ءۇشىن وتكەن ماۋسىم ساتسىزدەۋ اياقتالدى. مۇنى كوماندا باسشىلىعى دا مويىنداپ وتىر. «دجيرو دە يتاليا» كوپكۇندىگىنىڭ كوماندالىق ەسەبىندە توپ جاردى دەمەسەڭىز, «استانا» الىسقا شابا المادى. «استانانى» قاشاندا بيىكتەن كورۋگە داعدىلانعان جانكۇيەر كوڭىلى قوڭىلتاقسىپ قالدى. شاباندوزداردىڭ بابى كەلىسكەنىمەن, باعى شاپپاعان ءسات ەدى بۇل. جىعىلعانعا جۇدىرىق, الەكساندر ۆينوكۋروۆتىڭ «تۋر دە فرانستاعى» جاراقاتى دا كومانداعا ۇلكەن سوققى بولدى. دەگەنمەن, بولارى بولدى, بوياۋى ءسىڭدى. وتكەن ماۋسىمنان قايىر بولمادى دەپ قايعىرۋعا بولماس. «استانا» ءالى سپورتتىق ارەنادا. بەدەل, مۇمكىندىك بار. ەندەشە, جاڭا عانا شىمىلدىعىن تۇرگەن 2012 جىلعى ماۋسىمنان جەڭىس كۇتسەك, ارتىق ەمەس.
«استانا» جىل سايىن ماۋسىماشار تويىن جاساۋدى ادەتكە اينالدىرعان. بۇل – جانكۇيەردەن باتا الىپ, داستارقان جايىپ, كوماندانىڭ قۇرامىن تانىستىرار جيىن. «استانانىڭ» ماۋسىمدىق تۇساۋكەسەر تويى وسىعان دەيىن ءوزىمىزدىڭ ەلوردادا, موناكودا, ۆەنادا وتكەن. وسى جولى كوماندا باسشىلىعى ماۋسىماشار جيىندى يسپانيانىڭ كالپە قالاسىندا وتكىزۋدى ۇيعارىپتى. كالپەگە ارنايى ءتۇسىرىلىم جاساۋعا, كوماندانىڭ جاڭا تىنىسىن جازۋعا شەتتەن اعىلىپ ءبىراز جۋرناليست كەلگەن. «استانانىڭ» قولداۋىمەن قازاقستاننان دا بىرنەشە ءتىلشى يسپانياعا جول تارتتىق. ساپارىمىز بارىسىندا «استانانىڭ» جاڭا قۇرامىمەن تانىسىپ, بيىلعى ماۋسىمعا جوسپارىن بىلدىك. ەندى بارلىعىن رەت-رەتىمەن باياندالىق.
جاڭا ماۋسىم جانە جەڭىسكە دەگەن ءۇمىت
ماۋسىماشار جيىندا كوماندانىڭ جاڭا قۇرامى تانىستىرىلدى. 2012 جىلعى دودالاردا كلۋب نامىسىن 28 شاباندوز قورعايدى. ونىڭ توعىزى «استانانىڭ» كوك جەيدەسىن العاش كيگەندەر. كومانداعا جاڭا قوسىلعانداردىڭ ىشىندەگى تانىمالدىلارى قوس سلوۆەنيالىق – يانەتس برايكوۆيچ پەن بورۋت بوزيچ. 28 جاستاعى يانەتس «گرۋزيا تۋرىنىڭ» جەڭىمپازى, «گەرمانيا تۋرىنىڭ» ەكىنشى, «دجيرو د لومبارديا» بايگەسىنىڭ ءۇشىنشى ورىن يەگەرى. ال وردا بۇزار وتىزداعى ءبوزيچتىڭ دە قورجىنى بوس ەمەس. «ۆۋەلتا كۋبا», «سەربيا تۋرى», «سلوۆەنيا تۋرى» سىندى دودالاردى ۇتقان. مىنە, وسى قوس جىگىت بيىل كوماندانىڭ نەگىزگى كۇشتەرىنىڭ ءبىرى بولماق.
بۇعان قوسا, «استانا» ساپىندا ءوزىمىزدىڭ الەكساندر ۆينوكۋروۆ, اندرەي كاشەچكين, اسان بازاەۆ, ماكسيم يگلينسكي بار. بۇل تىزىمگە جۇيرىك ەنريكو گاسپاروتتو (يتاليا), رومان كرويتسيگەردى (چەحيا) قوسىڭىز. وسى مىقتىلارمەن «استانا» بيىل كەز كەلگەن شىڭدى باعىندىرۋعا قاۋقارلى كورىنەدى.
سونىمەن, تانىس بولىڭىز «استانانىڭ» جاڭا جارىس جىلىنا ۇسىنعان كوماندا قۇرامى: الەكساندر ۆينوكۋروۆ, اسان بازاەۆ, الەكساندر دياچەنكو, دميتري فوفونوۆ, دميتري گرۋزدەۆ, ماكسيم يگلينسكي, ۆالەنتين يگلينسكي, اندرەي كاشەچكين, سەرگەي رەنەۆ, ەۆگەني نەپومنياششي, اندرەي زەيتس, دميتري مۋراۆەۆ ء(بارى – قازاقستاننان), ەنريكو گاسپاروتتو, فرانچەسكو گاۆاتستسي, دجاكوپو گۋارنەري, فرانچەسكو ماشارەللي, سيمونە پونتسي, پاولو تيرالونگو ء(بارى – يتاليادان), اندرەي گريۆكو (ۋكراينا), تانەل كانگەرت (ەستونيا), فرەدريك كەسسياكوفف (شۆەتسيا), روبەرت كيسەرلوۆسكي (حورۆاتيا), رومان كرويتسيگەر (چەحيا), ەۆگەني پەتروۆ, ەگور سيلين (ەكەۋى دە – رەسەي ), كەۆين زەەلدرەيەرس (بەلگيا), يانەتس برايكوۆيچ, بورۋت بوزيچ (ەكەۋى دە – سلوۆەنيادان).
ال كوماندانى العا سۇيرەيتىن, شاباندوزدارعا جول سىلتەر كوماندا اكىمشىلىگىنىڭ بيىلعى قۇرامىنا دا بىلىكتى ماماندار ەنىپ وتىر. باس مەنەدجەر يتاليالىق دجۋزەپپە مارتينەللي, ال سپورتتىق ديرەكتورلار قۇرامى مىناداي: الەكساندر شەفەر (قازاقستان), دميتري سەدۋن (قازاقستان), گۆيدو بونتەمپي (يتاليا), گورازد ستانگەلي (سلوۆەنيا).
الەكساندر ۆينوكۋروۆ: «جانكۇيەر ءۇمىتىن اقتاۋ – پارىز»
الەكساندر ۆينوكۋروۆ بيىل سپورتتىق عۇمىرىنا نۇكتە قويماق. ۆينو لوندوندى كوزدەپ وتىر. سيدنەيدەگى جەڭىستى قايتالاسام دەيدى. نەسى بار, باتىر قاشاندا الىسقا كوز تاستايدى ەمەس پە؟ تاقيامىزعا قانداي ءجۇلدە بولماسىن, تار كەلمەس. قازاق ۆەلوسپورتىنىڭ جارىق جۇلدىزىن اڭگىمەگە تارتتىق. ۆينوكۋروۆ «ارمان ورىندالۋ كەرەك. «استانا» ءۇشىن وتكەن ماۋسىمداعى ءساتسىزدىكتىڭ ورنىن تولتىرار ءسات جەتتى. بىزدەگى ماقسات «دجيرو دە يتاليا» مەن «ۆۋەلتا». وسى ەكى گراند تۋردا وزا شاۋىپ, بايگە الساق دەگەن جوسپار بار. جاراقات جانىمىزعا جولاماسا بيىلعى قۇرامنىڭ شابىسى مىقتى. كەز كەلگەن دوداعا فاۆوريت رەتىندە اتتانامىز. بىزدەن جەڭىس كۇتەر جانكۇيەر ءۇمىتىن اقتاۋ پارىز» دەپ قىسقا قايىردى. ال كوماندانىڭ باس مەنەدجەرى دجۋزەپپە مارتينەلليدىڭ جوسپارى جويقىن. «استانانى» پۇشپاققا شىعارسام دەپ جانتالاسىپ ءجۇر. كلۋبتىڭ سپورتتىق ديرەكتورلارى دا جاڭا ماۋسىمنان كوپ جەڭىس كۇتىپ وتىر.
– بيىل كوماندانىڭ قۇرامىنا بىرنەشە مىقتى سپورتشىلار الدىق. «تۋر دە فرانستا» توپ جارۋ قيىنعا سوعار. بىراق «ۆۋەلتا» مەن «دجيرو د يتاليادان» قۇر قايتپاسپىز. باسقا دا بايگەلەردە جۇلدە الۋ جوسپاردا بار. جىلدىڭ باستى دوداسى – لوندون وليمپياداسى. قازىر قالتادا ەكى جولداما بار. ءبىرى ۆينوكۋروۆتىڭ ەنشىسىندە. ۆينودان جۇلدە دامەتەمىز. ءساتىن سالسا, قازاقستان ۆەلوسپورتىنىڭ ايى وڭىنان تۋار. سەبەبى, بىزدە قارجى, مىقتى مامان, جۇيرىك شاباندوزدىڭ ءبارى بار. ەندى كەرەگى جاقسى ناتيجە عانا, – دەپ اعىنان جارىلدى كوماندا ديرەكتورى الەكساندر شەفەر.
«استانا-2» – قازاق ۆەلوسپورتىنىڭ بولاشاعى
وتكەن جىلى ەلىمىزدە جاس شاباندوزداردى شىڭدايتىن «استانا-2» كومانداسى قۇرىلعانى بەلگىلى. بۇگىندە بۇل كوماندا ەكۆادور ەلىندە جاتتىعۋدا. قۇرامىندا قازاقستان ۆەلوسپورتىنىڭ ەرتەڭى سانالاتىن جاستار تاربيەلەنۋدە. ولار ەرتەڭگى كۇنى باس «استانانىڭ» قۇرامىن تولىقتىرار كادر. قازاقستاننىڭ نامىسىن قۇرلىقتىق سىنداردا قورعايتىن كوماندانىڭ العا قويعان ماقساتى ايقىن. جاپونيا, قىتاي, يران تۋرلارىندا توپ جارساق دەپ وتىر. سونداي-اق, «ۇلتتار كۋبوگىندا» ءتاۋىر ءناتيجە كورسەتۋ نەگىزگى مىندەت. قۋانىشتىسى سول, «استانا-2» ساپىنداعى بارلىق سپورتشىلار قازاقستاندىق. ءوز كەلەشەگىمىزدى دايىنداپ جاتقان جايىمىز بار. ءتىپتى بولاشاق ۆينوكۋروۆ, كونتادورلار وسى جەردەن شىقپاسىنا كىم كەپىل. «استانا-2» ناعىز شاباندوزدار ۇستاحاناسى بولسا, قانە! كۇتەيىك, يگى ءىس ءوز جەمىسىن بەرەر ۋاقىت الىس ەمەس. ماقسات ايازباەۆ – قازاق ۆەلوسپورتىنىڭ بولاشاعى.
بۇگىندە «استانا-2» كومانداسىنىڭ ساپىندا جۇرگەن قازاق ۇلانى ماقسات ايازباەۆتان ماماندار ۇلكەن ءۇمىت كۇتىپ وتىر. كوبى ماقساتتى ۆينوكۋروۆتىڭ ءىزىن باسۋعا نەگىزگى ۇمىتكەر سانايدى. ۆينوكۋروۆتىڭ ءوزى دە ماقساتتىڭ جولىنا ۇلكەن ۇمىتپەن قارايدى. تالدىقورعان ماڭىنداعى اۋىلدان شىققان ماقسات «تۋر دە فرانستا» توپ جارىپ جاتسا نۇر ۇستىنە نۇر ەمەس پە؟ «كورەيا تۋرىندا» توپ جارىپ, يتاليا جولدارىنان جۇلدە تەرگەن ايازباەۆ قازىر بار الاشتىڭ ءۇمىتى.
ءتۇيىن. «استانا» بيىلعى ماۋسىمعا دايىندىعىن پىسىقتاپ جاتىر. قازىر يسپانيانىڭ تاۋلى شاتقالدارىندا جاتتىعۋدا. ەندى اقپاننىڭ ورتاسىندا كوماندا مالايزياعا جول تارتادى. ازيا چەمپيوناتى مەن «مالاي تۋرىنا»… بۇل سىندارعا ءبىزدىڭ ۆەلوشاباندوزدار جەڭىسكە باستى ۇمىتكەر رەتىندە اتتانباق. ەندەشە, ىسكە ءسات!
رۋسلان ورمانبەك ۇلى, ارنايى «ەگەمەن قازاقستان» ءۇشىن – كالپەدەن (يسپانيا).
