بوكس بيىگىن باعىندىرعان كۇن
الماتى قالاسىنداعى بالۋان شولاق اتىنداعى سپورت سارايىندا دۇنيەجۇزىلىك بوكس سەرياسى بويىنشا «Astana Arlans» پەن يتاليالىق «Dolce&Gabbana Milano Thunder» كوماندالارىنىڭ اراسىندا وتكەن جەكپە-جەكتە «قاسقىر جىگىتتەردىڭ» باعى جاندى.
بۇل كۇنگە دەيىن قارسىلاس شىداتپاعان ميلاندىق قۇراما ءبىزدىڭ جىگىتتەرمەن كەزدەسۋگە ۋكراينا جانە افريكا بوكسشىلارىنان قۇرالعان مىقتى توپپەن كەلدى. 53,8 كگ. سالماقتا العاشقى بولىپ قولعاپ تۇيىستىرگەن قازاقستاندىق لەگيونەر حابيبۋللا يسمايل-احۋنوۆ پەن ۋكرايندىق ۆيتالي ۆولكوۆ اراسىنداعى جەكپە-جەك وتە تارتىستى وتكەنىمەن, ءبىزدىڭ جىگىتكە قاراعاندا قارسىلاستىڭ شەبەرلىگى باسىم ەكەندىگى انىق بايقالدى. ۆولكوۆ WSB كورسەتكىشى بويىنشا رەيتينگتىك 12 ساتىدا تۇرعان بوكسشى.
الماتى قالاسىنداعى بالۋان شولاق اتىنداعى سپورت سارايىندا دۇنيەجۇزىلىك بوكس سەرياسى بويىنشا «Astana Arlans» پەن يتاليالىق «Dolce&Gabbana Milano Thunder» كوماندالارىنىڭ اراسىندا وتكەن جەكپە-جەكتە «قاسقىر جىگىتتەردىڭ» باعى جاندى.
بۇل كۇنگە دەيىن قارسىلاس شىداتپاعان ميلاندىق قۇراما ءبىزدىڭ جىگىتتەرمەن كەزدەسۋگە ۋكراينا جانە افريكا بوكسشىلارىنان قۇرالعان مىقتى توپپەن كەلدى. 53,8 كگ. سالماقتا العاشقى بولىپ قولعاپ تۇيىستىرگەن قازاقستاندىق لەگيونەر حابيبۋللا يسمايل-احۋنوۆ پەن ۋكرايندىق ۆيتالي ۆولكوۆ اراسىنداعى جەكپە-جەك وتە تارتىستى وتكەنىمەن, ءبىزدىڭ جىگىتكە قاراعاندا قارسىلاستىڭ شەبەرلىگى باسىم ەكەندىگى انىق بايقالدى. ۆولكوۆ WSB كورسەتكىشى بويىنشا رەيتينگتىك 12 ساتىدا تۇرعان بوكسشى.
قانشا جەردەن حابيبۋللا ونى بۇرىشقا تاقاپ سوققىنىڭ استىنا العانىمەن, ميلاندىق شەبەر ناقتى دا ساۋاتتى سوققىسىمەن باسىم ءتۇسىپ وتىردى. كەزدەسۋدىڭ العاشقى جەڭىسىنە قوناقتار يە بولعانى ايدان انىق.
ەسەسىنە, جانكۇيەرلەردىڭ دەلەبەسىن قوزدىرىپ, وتە اسەرلى ويىن ورنەگىن كورسەتكەن مەرەي اقشالوۆ بولدى. ول ميكلوش ۆارگا ەسىمدى ۆەنگر جىگىتىمەن قولعاپ ءتۇيىستىرىپ, العاشقى كەتكەن ەسەنى جاقسىلاپ قايىردى. ايتا كەتۋ كەرەك, 60 كگ. سالماقتاعى مەرەي WSB كورسەتكىشى بويىنشا رەيتينگتىك 12 ساتىدا تۇر, سودان دا بولار, قارسىلاسىن العاشقى راۋندتان-اق قۋالاپ ءجۇرىپ توپەپ سالدى. ەسەپ – 1:1.
قالىڭ جۇرتشىلىق سەنىم ارتىپ, اسا تارتىستى وتەدى جانە جەڭىستى بولامىز دەگەن ءۇشىنشى جۇپ قانات يسلام (72,8 كگ.) مەن سەرگەي دەرەۆيانچەنكو اراسىنداعى كەزدەسۋ ءبىزدىڭ پايداعا شەشىلمەدى. شەبەر بوكسشىمىز قانات بۇل جولى سىلبىر وينادى. جالپى, بۇل كەزدەسۋدە ءبىزدىڭ جىگىتتەردىڭ ءبارى دەرلىك شارشاڭقى كورىنىپ, العاشقى 3 راۋندتان كەيىن قارسىلاسىنىڭ اشىق يەگىن كوزدەي الماي جۇرگەندەرى راس-تىن. قازاقستان قۇراماسىنىڭ كاپيتانى قانات يسلام WSB كورسەتكىشى بويىنشا رەيتينگتىك 12 ساتىدا, ال ونىڭ قارسىلاسى سەرگەي دەرەۆيانچەنكو 1 رەيتينگتەگى مىقتى بوكسشى. باعى ما, الدە بابى كەلمەدى مە, ايتەۋىر قانات قارسىلاسىنىڭ مىسى باسقانداي تىم سولعىن بوكستاستى. ونىڭ جەڭىلىسى جانكۇيەر ءبىتكەننىڭ كوڭىلىن ءتۇسىرىپ قانا قويماي, ميلاندىقتاردان تاعى دا جەڭىلىپ قالامىز با دەگەن كۇدىكتى كۇشەيتىپ جىبەردى.
83 كگ. سالماقتاعى قازاقستان قۇراماسىنداعى الجيرلىك لەگيونەر ابدەلفاحيد بەنشابلا ميلان توبىنداعى فرانتسۋز جىگىتى ليۋدوۆيك گروگۋامەن كۇش سىناستى. بۇل وتە جاۋاپتى كەزدەسۋ ەدى. سوندىقتان دا سپورت سارايىنا جيىلعان كورەرمەن قۇلاق تۇندىرا ايعايلاپ, قازاقستاندىق بوكسشىنى ارقالاندىرۋدان تانبادى. بار جاۋاپكەرشىلىكتى تەرەڭ سەزىنگەن ابدەلفاحيد تا بارىن سالدى دەۋگە ابدەن بولادى. بەس راۋند بويىنا مىقتى قارسىلاستىڭ وسال جەرىن ىزدەپ, مەيلىنشە سايىس تىزگىنىن ءوز قولىنا الۋعا تىرىستى. ونىڭ جىگەرلىلىگى قازاقستان قورجىنىنا جاڭا جەڭىس پەن الەمدىك بيىككە كوتەرىلۋگە ءبىر تابان جاقىنداتۋ مۇمكىندىگىن الىپ كەلدى.
كەزدەسۋدىڭ سوڭعى جۇبى رينگ تورىنە كوتەرىلگەنشە جانكۇيەردە دەگبىر بولمادى. 99 كگ. سالماقتاعى رۋسلان مىرساتاەۆ پەن روماريك نگۋلا تانگۋم اراسىنداعى جەكپە-جەك كورەر كوزگە قىزىق جانە ەل نامىسى تارازىلاناتىن ءسات ەدى. قاناتتان جەڭىس كۇتىپ مەسەلى قايتقان جانكۇيەر بۇعان دەيىن دە قىسىلتاياڭ ساتتەردە ساعىمىزدى سىندىرماعان رۋسلاندى تىكەسىنەن تىك تۇرىپ قارسى الدى. ميلان توبىندا ونەر كورسەتەتىن كامەرۋندىق روماريك نگۋلانىڭ دەنە ءبىتىمى مەن رينگتەگى مىسى شىنىندا دا جەڭىستى شاپپاي سۇراۋعا لايىق ەكەن. سالعان جەردەن رۋسلانعا تارپا باس سالعاندا زالداعى جۇرت قولجەتىم جەردەگى جەڭىستەن قاعىلدىق-اۋ دەگەندەي, ءسال تىكسىنىپ-اق قالعان.
جانكۇيەردىڭ قولدان كەلەر قايرانى ايعايعا ىسقىرىق قوسىپ ءوز بوكسشىسىنا دەم بەرۋ عانا. شومبال جۇدىرىقتاردىڭ گۇرس-گۇرس ءۇنى مەن رينگ سىرتىنداعى باپكەرلەردىڭ شىرىلداعان داۋىسى, ارۋاق شاقىرىسقان جۇرت, سوڭعى ءۇمىت, ءبارى-ءبارى سپورت سارايىنىڭ ىشىنە سىيماي جاتقانداي اسەر قالدىردى. الما-كەزەك سوققىلاسىپ ءجۇرىپ ءۇشىنشى راۋندتى دا اياقتادى ەكى ءداۋ. ءار سوققىدا تالاي كۇش جۇمساپ, اۋىر سالماقتى كوتەرىپ ءجۇرۋدىڭ قانشالىقتى قيىن ەكەندىگى سىرت كوزگە دە انىق سەزىلىپ تۇردى. رۋسلانعا قاراعاندا قارسىلاسى تىڭ كورىنىپ, ءبىزدىڭ جىگىتتىڭ سوققىلارى دارىماي جاتقانداي بولعان.
سويتسەك, ونىڭ ءبارى ءبىر مەزەتتىك شەشۋشى سوققىعا تۇرمايدى ەكەن. بۋراداي شابىنىپ كەلەسى شابۋىلعا ۇمتىلعان ساتتە رۋسلاننىڭ سوققىسى روماريكتى ءتالتىرەكتەتىپ جىبەردى. جۇرت شۋلاپ ورىندارىنان قارعىپ تۇردى. تورەشىنىڭ ساناعىنا سەلت ەتپەگەن كامەرۋندىق قايتا شابۋىلداي بەرىپ, تاعى ءبىر مىقتى سوققىعا تاپ بولدى. وسى ءسات رينگكە ونىڭ باپكەرى ورامال لاقتىرىپ, ءوز شاكىرتىنىڭ تازا جەڭىلگەنىن ەرىكسىز مويىندادى. جەڭىس بىزدىكى!
بۇعان دەيىن «Dolce&Gabbana Milano Thunder» قارسىلاس ءبىتكەندى بەت قاراتپاي جەڭىپ كەلگەن مىقتى قۇراما ەدى. قازاقستان جاعىنىڭ جىگىتتەرى ەكىنشى ورىندى يەلەنىپ قانا جۇرمەي, مىقتى قارسىلاسقا مىقتى سوققى بەرە الاتىندىقتارىن پاش ەتتى. ەندى اقپاننىڭ اياعىنا تامان الماتىدا «Astana Arlans» قۇراماسى ءۇندىستان بوكسشىلارىمەن كەزدەسەدى. وعان دەيىن كەلەر اپتادا ماسكەۋدە وتەتىن «دينامومەن» بولاتىن كەزدەسۋدە ەل نامىسىن تاعى ءبىر تارازىلاماق. قازاق ەلىن الەمگە تانىتىپ جۇرگەن باتىرلارىمىزعا تەك ساتتىلىك تىلەيمىز.
قانات ەسكەندىر,
الماتى.
