ءۇشىنشى مارتە ۇشتىكتەن كورىندىك
الماتىدا اياقتالعان الەم چەمپيوناتىندا قازاقستاندىق دوپتى حوككەي شەبەرلەرى قولا جۇلدەگە قول جەتكىزدى
«مەدەۋ» مۇز ايدىنىندا دوپتى حوككەيدەن وتكەن 32-ءشى الەم چەمپيوناتى ءوز مارەسىنە جەتتى. ازيا اۋماعىندا تۇڭعىش رەت وتكىزىلگەن بۇل چەمپيوناتتىڭ جوعارى دەڭگەيدە ۇيىمداستىرىلعانىن شەتەلدىك ماماندار مەن سپورت جۋرناليستەرى تۇشىنىپ ايتتى. بۇل جارىستا قازاقستان قۇراماسى قولا جۇلدەگە يە بولدى.
الماتىدا اياقتالعان الەم چەمپيوناتىندا قازاقستاندىق دوپتى حوككەي شەبەرلەرى قولا جۇلدەگە قول جەتكىزدى
«مەدەۋ» مۇز ايدىنىندا دوپتى حوككەيدەن وتكەن 32-ءشى الەم چەمپيوناتى ءوز مارەسىنە جەتتى. ازيا اۋماعىندا تۇڭعىش رەت وتكىزىلگەن بۇل چەمپيوناتتىڭ جوعارى دەڭگەيدە ۇيىمداستىرىلعانىن شەتەلدىك ماماندار مەن سپورت جۋرناليستەرى تۇشىنىپ ايتتى. بۇل جارىستا قازاقستان قۇراماسى قولا جۇلدەگە يە بولدى.
مەملەكەت باسشىسى نۇرسۇلتان نازارباەۆ قازاقستان مەن شۆەتسيا قۇرامالارى اراسىندا بەنديدەن وتكەن الەم چەمپيوناتىنىڭ جارتىلاي فينالدىق ويىنىن تاماشالادى.
بۇعان دەيىن شۆەتسيا قۇراماسىمەن بولعان جارتىلاي فينالدىق كەزدەسۋ وتە تارتىستى ءارى شيەلەنىستى ءوتتى. قوس كوماندا دا اقتىق سىنعا ءوتۋ جولىندا بارىن سالدى. ماتچتىڭ العاشقى مينۋتتارىنان-اق ءبىزدىڭ جىگىتتەر شۆەدتەرگە جىبەرىپ العان اۋەلگى ەسەسىن قايتارا الاتىندىعىن تانىتىپ, جىگەرلى ويىن ورنەگىن كورسەتە ءبىلدى. «مەدەۋدى» باسىنا كوتەرە ايعايلاعان جانكۇيەرلەرىن جەرگە قاراتپاۋعا بەكىنگەندەي. تولاسسىز جاۋعان قار تولارساققا جەتسە دە, وسى جولى شۆەتسيا قۇراماسىن قالايدا جەڭۋگە بەكىنىپ شىققان مىنەز انىق بايقالدى. ءبىرىنشى تايمدا ەكى كوماندا قارسىلاستارىمەن ءبىر-ءبىر گولدان الماسىپ, ويىن تەڭ ەسەپپەن اياقتالدى. بۇل كۇنى قاردىڭ توقتاۋسىز جاۋعانىنا بايلانىستى ادەتتەگىدەي 45 مينۋتتان ەكى تايم وينالماي, بەنديدە رۇقسات ەتىلگەن ەرەجەگە ساي جارتى ساعاتتان ءۇش تايم ويناۋعا تۋرا كەلدى.
ەكىنشى تايمدا الاڭداعى جاعداي اسا تارتىستى باستالدى. ويىننىڭ ەكىنشى بولىگىندە قازاقستاندىقتار قارسىلاستار قاقپاسىنا ءبىر دوپ ەنگىزىپ العا شىقتى. كوپ ۇزاماي پەنالتيدەن ءۇشىنشى گولدى دا ساتىمەن سوقتى. قارسىلاسىنا قارىمتا سوققى بەرىپ شەبەر ويىن ءورنەگىن كورسەتۋدىڭ ورنىنا شۆەدتەر بارماق باستى, كوز قىستى ارەكەتتەرگە دەيىن بارعانىن ايتا كەتكەنىمىز ءجون. ءۇشىنشى تايمدا شۆەدتەر العاشقى بۇرىشتاماسىن ءساتتى پايدالانىپ, ءبىزدىڭ قاقپاعا گول سوقتى. ەسەپ ايىرماسى «مينيمۋمعا» دەيىن قىسقارىپ, ايدىنداعى ويىننىڭ كورىگى قىزدى. شابۋىلعا تۇبەگەيلى كوشكەن سكانديناۆيالىقتار قورعانىستى ۇمىتىپ, وپىق جەدى. سوڭعى ىسقىرىققا 12 مينۋت قالعاندا نيكيشوۆتىڭ شاكىرتتەرى ءتورتىنشى گولىن سوقتى. ال ويىن بىتۋگە ساناۋلى-اق سەكۋندتار قالعاندا بۇرىشتامادان بەرىلگەن كەزەكتى دوپ قازاقستان قۇراماسىنىڭ قاقپاسىنا ەندى. ماتچتىڭ نەگىزگى ۋاقىتى 4:4 ەسەبىمەن تەڭ اياقتالىپ, جەڭىمپازدى انىقتاۋ ءۇشىن ويىن وۆەرتايمعا ۇلاستى.
«التىن دوپ» قاقپا تورىندا تۋلاپ جاتقانعا دەيىن جالعاساتىن وۆەرتايمدا جانكۇيەر كۇتكەندەي جاڭالىق بولمادى. شەشۋشى ساتتە ەكى كوماندا دا ءبىر-بىرىنە بەرىسپەي, تەڭ دارەجەدە ويىن جۇرگىزدى. ويىن سوڭىنان بەرىلەتىن 12 مەترلىكتەردىڭ سەرياسىندا ساتتىلىك قوناقتار جاعىندا بولدى.
قازاقستاندىق دوپتى حوككەي شەبەرلەرى ءۇشىنشى مارتە قولا جۇلدەگە قول جەتكىزدى. بىراق بۇل جولى قازاق جۇرتى مۇز ۇستىندەگى ءمىن مەن سىندى ءوز كوزدەرىمەن تاماشالاپ, ءوز كوڭىلدەرىمەن كوكەيگە ءتۇيدى. تورەشىلەر تاراپىنان جاسالاتىن قىساستىق پەن ءتۇرلى ايلانىڭ كۋاسى بولىپ, ءوز ەلىنىڭ نامىسى ءۇشىن اق قار, كوك مۇزدا «مەدەۋگە» اعىلدى. 10 رەت الەم چەمپيونى اتانعان شۆەتسيا سەكىلدى ەلمەن ءبىر دەڭگەيدە ويناۋ, كەي رەتتە باسىمدىق تانىتا ءبىلۋ – ەرلىكپەن پارا-پار ءىس. ءبىزدىڭ جىگىتتەرىمىز مۇنداي ويىنى ءۇشىن تەك ماقتاۋعا لايىق. بۇل دوپتى حوككەيدەن قاتىسىپ وتىرعان سوڭعى چەمپيوناتىمىز ەمەس. الدا ءالى تالاي جارىستار مەن سىن ساعاتتار بار. شىن مىقتىنى شىنايى تانيتىن كەز ءالى تالاي تۋادى. وسى جولى دا قازاقستاندىق بەنديشىلەر ءوز ونەرىمەن تالاي ەلدى ءتانتى ەتە ءبىلدى. اسىرەسە, شۆەتسيا قۇراماسىمەن بولعان قارىمتا كەزدەسۋ سپورت تاريحىندا «شۆەدتەردى ساستىرعان كۇن» رەتىندە اتاپ وتۋگە ابدەن تۇرارلىق.
راسىندا, مۇنداي ويىندى قازاقستاندىق بەنديشىلەردەن كوبى كۇتپەگەن ەدى. بۇل ويىن ناعىز فينالداعى ويىن سياقتى ءوتتى. بىراق, قوناقتار جاعىنان كەتكەن ءبىر اتتەگەن-ايدى دا ايتا كەتپەسكە بولمايدى. سول كۇنى بەنديدەن قازاقستان باپكەرلەرى شۆەتسيا قۇراماسىنىڭ ۇستىنەن شاعىم ءتۇسىردى. ونىڭ سەبەبى, قوناقتاردىڭ ويىنعا قوسىلماعان دانيەل موسسبەرگ دەگەن ويىنشىسىن ماتچقا تىركەتپەي, ەشكىمگە ەسكەرتپەي ايدىنعا شىعارعانى بولدى. مۇندايعا ءبىزدىڭ باپكەرلەر جول بەرە مە, قۇراما باپكەرى الەكسەي نيكيشوۆ پەن فەدەراتسيا وكىلدەرى جەدەلعابىل شۆەتسيا تاراپىنىڭ ورەسكەل قاتەلىك جىبەرگەنىن ايتىپ, حالىقارالىق بەندي فەدەراتسياسىنا شاعىمداندى. اتى دارداي بۇل ۇيىم, وكىنىشكە قاراي, ءبىزدىڭ شاعىمىمىزدى ەسكەرمەي, شەشىمدى شۆەتسيانىڭ پايداسىنا شىعاردى.
وسى وقيعاعا بايلانىستى ءوتكەن ارنايى جيىندا FIB باسشىلىعى قازاقستاننىڭ شاعىمىن قاراستىرىپ, شۆەتسيا قۇراماسىنا ايىپپۇل سالدى. ءسويتىپ, تىزىمدەگى جوق ويىنشىنى ماتچقا قوسقان شۆەتسيا بار بولعانى 2500 ەۋرو تولەممەن قۇتىلدى. مىنە, وسىدان كەيىن سكانديناۆيا وكىلدەرى فينالعا جولداما الىپ, وندا رەسەي قۇراماسىن 5:4 ەسەبىمەن جەڭىپ, 11-ءشى رەت الەم چەمپيونى اتاندى. ال ءبىزدىڭ ەل جارتىلاي فينالدا رەسەيلىكتەردەن 6:4 ەسەبىمەن جەڭىلگەن فينليانديانى ءۇشىنشى ورىن ءۇشىن وتكەن ماتچتا 10:5 ەسەبىمەن ۇتىپ, قولا جۇلدەنى يەلەندى.
ءسويتىپ, الماتىدا ءبىر جەتىگە سوزىلعان الەم چەمپيوناتى اياقتالدى. بۇل باسەكە, شىنى كەرەك, ءبىزدىڭ شۆەتسيامەن بولعان كەزدەسۋدەگى قاتەلىكتەر جانە حالىقارالىق بەندي فەدەراتسياسى باسشىلىعىنىڭ سوعان بايلانىستى بۇرىس شەشىم قابىلداعانى بولماسا, وتە جوعارى دەڭگەيدە ءوتتى. ەندى ءبىزدى بيىل تاعى ءبىر بەندي باسەكەسى كۇتەدى. الەم چەمپيوناتى كەزىندە وسى جىلدىڭ سوڭىندا, ياعني جەلتوقساندا الماتى تورىندە بەنديدەن ازيا چەمپيوناتىنىڭ وتەتىنى بەلگىلى بولدى. بۇل تۋرالى قازاقستان بەندي وداعىنىڭ ءباسپاسوز قىزمەتى مالىمدەدى.
قانات ەسكەندىر, الماتى.
سۋرەتتەردى تۇسىرگەن يۋري بەككەر.
