ەندىگى ماقسات – قولادان قاعىلماۋ
كەشە كەشكىسىن بەنديدەن قازاقستان ۇلتتىق قۇراماسى فينليانديا كومانداسىمەن بولعان اسا جاۋاپتى كەزدەسۋدە جەڭىسكە جەتتى. بۇل ويىندا الەكسەي نيكيشوۆتىڭ جىگىتتەرى قارسىلاستارىن 10:4 ەسەبىمەن ۇتىپ, رەسەي, شۆەتسيا قۇرامالارىمەن بىرگە جۇلدەلى ورىنعا تالاساتىنىن كورسەتتى.
كەشە كەشكىسىن بەنديدەن قازاقستان ۇلتتىق قۇراماسى فينليانديا كومانداسىمەن بولعان اسا 
جاۋاپتى كەزدەسۋدە جەڭىسكە جەتتى. بۇل ويىندا الەكسەي نيكيشوۆتىڭ جىگىتتەرى قارسىلاستارىن 10:4 ەسەبىمەن ۇتىپ, رەسەي, شۆەتسيا قۇرامالارىمەن بىرگە جۇلدەلى ورىنعا تالاساتىنىن كورسەتتى.
ال سەيسەنبى كۇنى شۆەتسيا قۇراماسىنان ويسىراي ۇتىلعان قازاقستاندىق دوپتى حوككەي قۇراماسى كەلەسى كۇنى رەسەي كومانداسىنان دا 8:6 ەسەبىمەن جەڭىلىپ قالدى. جەڭىلىستىڭ اششى ءدامى كوڭىلدەن كەتپەي تۇرىپ, رەسەيلىك حوككەيشىلەردەن تاعى ۇتىلۋ كىم-كىمنىڭ دە ەڭسەسىن تۇسىرگەنى راس. بىراق اركىم شاماسىنا قاراي شابادى ەمەس پە؟ رەسەي قۇراماسى سوڭعى الەم چەمپيوناتىنىڭ جەڭىمپازى ەكەنىن ۇمىتپاعان ءجون.
بۇل كەزدەسۋ وتە تارتىستى باستالدى. العاشقى بولىپ ەسەپتى قازاقستاندىق قۇرامانىڭ شابۋىلشىسى راۋان ەساليەۆ اشتى. ورىس حوككەيشىلەرى ءبىزدىڭ قاقپاعا جاۋاپ گول سوعۋ ءۇشىن وتە قىزۋ ارپالىس جۇرگىزگەنىن, رەسەيلىكتەردىڭ العاشقى دوبى سونشالىقتى قيىنشىلىقپەن كەلگەنىن ايتۋ كەرەك. كوپ ۇزاتپاي قازاقستاندىق شابۋىلشى الەكساندر ناسونوۆ ەسەپتى ۇستەمەلەدى. ارتىنشا, 25 مينۋتتا بروننيكوۆ 12 مەترلىك ايىپ سوققىسىن ءساتتى ورىندادى. رەسەيلىكتەر دە قاراپ قالعان جوق. ءبىرىنشى تايمنىڭ ءوزى-اق تىم تارتىستى باستالىپ, ەكى جاق تەڭ ويىنمەن ۇزىلىسكە شىقتى. ەسەپ – 4:4.
ويىننىڭ ەكىنشى بولىگىن سەرگەك تە سەنىمدى باستاعان قازاقستان قۇراماسى تاعى ءبىر گول سوعىپ, جانكۇيەر قاۋىمدى ءبىر جەلپىنتىپ تاستاعان ەدى. الايدا, قۋانىشىمىز كوپكە سوزىلماي, رەسەيلىكتەر ەسەپتى جەدەل تەڭەستىرىپ قانا قويماي, ءۇستىن-ءۇستىن 3 گول سوعىپ العا وزدى. بۇدان كەيىنگى جەردە جالقى گولمەن جاۋاپ بەرگەنىمىز بولماسا, رەسەي قۇراماسىنان 6:8 ەسەبىمەن ۇتىلۋعا ءماجبۇر بولدىق.
سپورت جەڭۋ عانا ەمەس, جەڭىلىستەن ساباق الۋ ەكەنىن دە ەسكەرسەك, الدا ءالى شەبەرلىكتى سارقا جۇمسايتىن كەزدەسۋلەر بار. سوندىقتان دا ەل قۇراماسىنىڭ وسى ەڭبەگىنىڭ ءوزى كوپ بولىپ تالقىعا سالۋعا تۇرارلىق.
قانات ەسكەندىر.
الماتى.
