بۇل ەۋرووداق تاريحىنداعى العاشقى جاعداي. قابىلداماۋ سەبەبىن جاڭا جوبانىڭ كەلىسىلگەن دەفيتسيت پارامەترلەرىنەن اسۋىمەن تۇسىندىرەدى.
ەۋرووداقتىڭ قارجى-ەكونوميكا كوميسسارى پەر موسكوۆسكي بريۋسسەلدىڭ يتاليا ساياسي قۇندىلىقتارىنان كۇماندانبايتىنىن ايتتى. ال ەۋروكوميسسيا توراعاسىنىڭ ورىنباسارى ۆالديس دومبروۆسكيس بيۋدجەت تاپشىلىعى كورسەتكىشىن ءوسىرۋ ەكونوميكانىڭ وركەندەۋىن تەجەيدى دەيدى.
ء«بىزدىڭ سۇرانىسىمىزعا ناقتى تۇسىنىكتەمە كەلمەدى. بيۋدجەت تاپشىلىعى مەن مەملەكەتتىك قارىزدى ازايتۋ, ەكونوميكالىق ءوسىم جوسپارى تۋرالى سۇراققا جاۋاپ الا المادىق. بۇل شەكتەن شىعۋ ەمەس. دەگەنمەن, يتاليانىڭ كەيبىر مينيسترلەرى جوسپاردى دۇرىس دەپ سانايدى», دەدى موسكوۆسكي.
بريۋسسەل يتاليا ۇكىمەتىنە جالپى ەۋروپالىق نورماتيۆتەرگە سايكەس كەلمەگەن بيۋدجەت پارامەترلەرىن قايتا قاراستىرۋعا, بيۋدجەت تاپشىلىعى كورسەتكىشىن 0,8-0,9%-عا تومەندەتۋگە كەڭەس بەردى. تالاپتاردىڭ ورىندالۋىنا ءۇش اپتا كولەمىندە ۋاقىت بەرىلدى. بيۋدجەت جوباسىنىڭ باستى ماقساتى مەملەكەتتىك قارىزدى ازايتۋ بولۋى كەرەك. ويتكەنى يتاليا مەملەكەتتىك قارىز كولەمى بويىنشا گرەكيادان كەيىنگى ەكىنشى ورىندا.
يتاليا بۇعان دەيىن بىرنەشە رەت ەكونوميكا رەفورماسى جوسپارى مەن بيۋدجەت ساياساتىنان باس تارتپايتىنىن مالىمدەگەن بولاتىن. مەملەكەت بيلىگىنە كەلگەن پوپۋليستەر پارتياسىنىڭ ءۇش جىلدىق بيۋدجەت جوسپارى سايلاۋدا ۋادە ەتىلگەن الەۋمەتتىك شىعىنداردى وسىرۋگە نەگىزدەلگەن.
