ءىس-شارانى قر تۇڭعىش پرەزيدەنتى قورى جانە قازاقستان رەسپۋبليكاسىنىڭ ۇلىبريتانيا بىرىككەن كورولدىگىندەگى جانە سولتۇستىك يرلاندياداعى ەلشىلىگى ۇيىمداستىردى.
مەملەكەت باسشىسى كىتابىنىڭ تۇساۋكەسەرى ۇستىمىزدەگى جىلعى كوكتەمدە قوردىڭ باستاماسىمەن رەسەي فەدەراتسياسىندا - ماسكەۋ جانە سانكت-پەتەربۋرگ قالالارىندا ءوتتى.
تاريحي كىتاپتىڭ تۇساۋكەسەر ءراسىمىن لوندوندا قر تۇڭعىش پرەزيدەنتى - ەلباسى قورىنىڭ اتقارۋشى ديرەكتورىنىڭ ورىنباسارى يگور روگوۆ وتكىزدى. ءىس-شاراعا "پارلامەنتاريلەردىڭ قارۋسىزدانۋ مەن يادرولىق قارۋدى تاراتپاۋ قوزعالىسىنىڭ" تەڭ توراعاسى, بارونەسسا سيۋزان ميللەر, قازاقستان-بريتان قوعامىنىڭ توراعاسى رۋپەرت گۋدمان, ۇلىبريتانيا پارلامەنتىنىڭ دەپۋتاتتارى, قوعامدىق قايراتكەرلەر, ديپلوماتيالىق كورپۋستىڭ وكىلدەرى قاتىستى.
"قازاقستان پرەزيدەنتىنىڭ وسى شىعارماشىلىق ەڭبەگى ءاربىر قازاقستاندىق ءۇشىن وتە جاقىن, ويتكەنى ەلىمىزدىڭ تاۋەلسىز مەملەكەت رەتىندە قالىپتاسۋى جىلدارىن كورسەتەدى. كىتاپتا ەلىمىزدە بولعان كۇردەلى ۇردىسكە, بەتبۇرىستى ساتتەرگە تەرەڭ تالداۋ جاسالعان. سونىمەن قاتار, وندا رەسپۋبليكانىڭ الدىندا تۇرعان جاڭا مىندەتتەر بەينەلەنگەن. وسىنىڭ بارلىعى كىتاپتى ناعىز تاريحي قۇجات رەتىندە كورسەتەدى. ونىڭ قۇندىلىعى وسىندا", - دەدى قر تۇڭعىش پرەزيدەنتى - ەلباسى قورىنىڭ اتقارۋشى ديرەكتورىنىڭ ورىنباسارى يگور روگوۆ.
ونىڭ ايتۋىنشا "تاۋەلسىزدىك داۋىرى" كىتابى جاستار ءۇشىن ەرەكشە پايدالى.
"ەگەمەندىك جىلدارى قازاقستاندىقتاردىڭ ەركىن, بەلسەندى, اشىق جاڭا بۋىنى كەلدى. بولاشاقتىڭ ىرگەتاسىن قالاۋ ءۇشىن ونىڭ قاينار كوزىن, ءوزىنىڭ تاريحىن ءبىلۋ كەرەك. ەلدىڭ بيىكتىككە قالاي قول جەتكىزگەنىن, قانداي سىن-تەگەۋرىندەردى ەڭسەرگەنىن ءتۇسىنۋى وتە ماڭىزدى بولىپ تابىلادى", - دەدى يگور روگوۆ.
قور مەملەكەت باسشىسى كىتابىنىڭ تۇساۋكەسەرىن شەتەلدە ۇيىمداستىرۋدى جالعاستىرادى, كەزدەسۋلەر بەرليندە, پاريجدە, سونداي-اق برازيليادا وتەدى.
بارونەسسا سيۋزەن ميللەر قازاقستاننىڭ يادرولىق قارۋسىز الەم قالىپتاستىرۋداعى ناقتى قادامدارىن اتاپ ءوتتى.
"تاۋەلسىزدىكتىڭ قىسقا مەرزىمىندە قازاقستان ايتارلىقتاي جەتىستىكتەرگە قول جەتكىزدى. تاۋەلسىزدىك جاريالانعانعا دەيىن دە 1989 جىلى قازاقستان الەمدە تۇڭعىش بولىپ سىناق پوليگونىن جابۋ ءۇشىن يادرولىق سىناقتارعا قارسى حالىقارالىق قوزعالىسقا جول اشتى", - دەدى بارونەسسا سيۋزەن ميللەر.
كەزدەسۋ بارىسىندا تانىمال بريتاندىق رەجيسسەر اندرە سينگەردىڭ سەمەي يادرولىق پوليگونىنداعى سىناقتاردىڭ سالدارى جانە يادرولىق قارۋسىز الەم قوزعالىسى تۋرالى "جەل تۇرعاندا" اتتى دەرەكتى ءفيلمى كورسەتىلدى.
