شاراعا «قازاقستان» رترك اق باسقارما توراعاسى ەرلان قارين, ء«بىلىم-يننوۆاتسيا» حالىقارالىق قوعامدىق قورىنىڭ پرەزيدەنتى دارحان وتە ەرماحان ۇلى جانە موڭعوليانىڭ بايان-ولگي ايماعىندا تۇراتىن ەسىمى الەمگە ءماشھۇر قازاقتىڭ بۇركىتشى قىزى ايشولپان نۇرعايىپقىزى مەن اناسى الماگۇل كوكسەگەن قاتىستى.
ايشولپان نۇرعايىپقىزى «قازاقستان» تەلەارناسىنىڭ تاپسىرىسىمەن جارىققا شىعاتىن «كوشپەندىلەر» دەرەكتى ءفيلمىنىڭ ءبىرىنشى بولىمىنە تۇسكەن بولاتىن. قىز بالاسىنا تاڭسىقتاۋ وسى ءبىر قىزىقتى كاسىپتى سەرىك ەتكەن ارۋدىڭ ادەمى ماشىعى الەم نازارىن وزىنە بۇعان دەيىن دە بىرنەشە مارتە اۋدارتقان ەدى. اتاپ ايتار بولساق, العاش رەت 2014 جىلى اعىلشىننىڭ Daily Mail باسىلىمى «قازاقتىڭ سالت-داستۇرىندەگى اسىل قۇندىلىقتاردىڭ ءبىرى - قۇسبەگىلىك ونەردى يگەرگەن ون ءۇش جاسار جالعىز قىز» اتتى ماقالا جاريالاپ, جاھان نازارىن قازاق ارۋى ايشولپان نۇرعايىپقىزىنا اۋدارتسا, 2016 جىلى تۇسىرىلگەن «بۇركىتشى قىز» (The Eagle Huntress) اتتى رەجيسسەر وتتو بەللدىڭ دەرەكتى ءفيلمى دە بويجەتكەن ەسىمىن الەمگە تانىمال ەتتى. بۇگىن, مىنە, ءار ەلدە تۇراتىن قازاقتاردىڭ ءومىرى مەن تۇرمىس-تىرشىلىگىندەگى ەرەكشەلىكتەرىمەن تانىستىرىپ, ۇلتىمىزدىڭ سالت-ءداستۇرىن دارىپتەۋدى ماقسات تۇتقان وتاندىق «كوشپەندىلەر» ءفيلمى ارقىلى ايشولپان ونەرى ەندى تۋعان حالقىمەن قاۋىشقالى وتىر.
«كوشپەندىلەر» دەرەكتى ءفيلمىنىڭ نەگىزگى ماقساتى كەزىندە شەتەلگە قونىس اۋدارىپ, سول جاقتاردا تۇراقتاپ قالعان قانداستارىمىزدىڭ ءومىرى مەن تۇرمىس-سالتىن كوپشىلىككە كورسەتۋ. دەرەكتى فيلمدەر توپتاماسى 12 بولىمنەن تۇرادى. وسى جوبانى جۇزەگە اسىرعان وتانداسىمىز, بەلگىلى رەجيسسەر قانات بەيسەكەەۆ. فيلم موڭعوليا, اۋعانستان, قىتاي, تۇركيا, يران جانە ت.ب ەلدەردى مەكەن ەتكەن قازاقتاردىڭ تاعدىرى جايلى باياندايدى. ياعني, ءار ەلدە تۇراتىن قازاقتاردىڭ تۇرمىس-تىرشىلىگى, ەرەكشەلىكتەرى كورسەتىلەدى. «كوشپەندىلەر» دەرەكتى فيلمدەر توپتاماسى ۇلتتىق ارنادان 14 قازاننان باستاپ 23 جەلتوقسانعا دەيىن ەفيرگە شىعاتىن بولادى. سول فيلمدەردىڭ العاشقىسىنىڭ كەيىپكەرى ورتامىزدا وتىرعان موڭعوليادا تۇراتىن قازاقتىڭ بۇركىتشى قىزى ايشولپان نۇرعايىپقىزى قازاقستانعا ءبىرىنشى رەت كەلىپ وتىر» – دەدى ەرلان قارين.
ءفيلمنىڭ كەيىپكەرلەرى كادردان تىس ءماتىنسىز, باستارىنان وتكەرگەن وقيعالارىن, اتا-بابالارىنىڭ تاريحىن باياندايتىن بولادى. العاشقى فيلمدە موڭعوليادا تۇراتىن باۋىرلارىمىز اتادان بالاعا مۇرا بولىپ كەلە جاتقان سالت-داستۇرلەردى ءسوز ەتەدى. اتامەكەننەن جىراقتا جۇرگەن قانداستارىمىزدىڭ شىنايى ءومىرى كەز كەلگەن كورەرمەننىڭ قىزىعۋشىلىعىن وياتارى ءسوزسىز.
نازەركە جۇماباي,
«ەگەمەن قازاقستان»
