قاي ەلدىڭ دە جارقىن بولاشاعى جان-جاقتى ءبىلىمدى, ۇشقىر ويلى تالانتتى جاستار. اتالعان جوبانىڭ باستى ماقساتى ءار سالاداعى دارىندى جاستاردىڭ باسىن قوسىپ, ولاردىڭ ارمان-ماقساتتارىنا جول اشۋ دەيدى ۇيىمداستىرۋشىلار. فورۋم جۇمىسىنا ازەربايجان, رەسەي, بەلارۋس, قىرعىزستان, وزبەكستان جانە قازاقستان جاستار ۇيىمدارىنىڭ مۇشەلەرى, مەملەكەتتىك ورگانداردىڭ وكىلدەرى, جاس كاسىپكەرلەر مەن ەرىكتىلەر قاتىستى.
شارانىڭ رەسمي اشىلۋ سالتاناتىندا تمد ەلدەرىنەن كەلگەن دەلەگاتسيا جەتەكشىلەرى ءسوز سويلەپ, ەلىمىزدىڭ قوناقجايلىلىعىنا العىستارىن ءبىلدىردى. ءوزارا تاجىريبە الماسىپ, تىڭ يدەيالارىمەن بولىسكەن جەتەكشى جاستار ەكونوميكا, الەۋمەت, ءبىلىم, مادەنيەت, سپورت سالالارىنداعى جەتىستىكتەردى سارالاپ, وسى باعىتتار بويىنشا ءالى دە شەشىمىن تابا الماي كەلە جاتقان ورتاق پروبلەمالارمەن كۇرەسۋدىڭ وڭتايلى جولىن قالىپتاستىرۋ ماسەلەسىنە توقتالدى. عالامعا ورتاق ماسەلەلەردىڭ تۇيتكىلدى تۇستارىن ساراپتاپ, ءبىلىم مەن بىلىك, ەڭبەك پەن تابىس قۇپيالارى توڭىرەگىندە وي ءبولىستى. باسقوسۋ اياسىندا «زاماناۋي ءتۋريزمنىڭ ترەندتەرى», «ۆولونتەرلىك ءومىر سالتى بەينەسى», «جاستار جانە بيزنەس», «اقپارات اعىمىنداعى جاستار» تاقىرىپتارىندا سۇحبات الاڭدارى ءوتتى. بىلىكتى جاستار ءوز تاجىريبە جولى مەن جەتىستىكتەرىنىڭ قۇپيالارىن ورتاعا سالدى.
جاستار ءىسى جونىندەگى فەدەرالدىق اگەنتتىكتىڭ حالىقارالىق قىزمەت ءبولىمىنىڭ باسشىسى دميتري يۆانوۆ ءوز سوزىندە رەسەي فەدەراتسياسى ءۇشىن تمد كەڭىستىگىندەگى ءوزارا ىقپالداستىقتا جاستار اراسىنداعى ءوزارا ءىس-قيمىلدى دامىتۋ باسىم باعىت بولىپ تابىلاتىنىن اتاپ ءوتتى.
ء «بىز ءوز تاراپىمىزدان ءار ءتۇرلى باستامالاردى كونسترۋكتيۆتى تۇردە قولداۋعا دايىنبىز. بىزدە گرانتتىق قولداۋدى جۇزەگە اسىراتىن مۇمكىندىكتەر بار. فورۋمعا قاتىسۋشىلاردىڭ العان تاجىريبەلەرى بولاشاقتا ءوز جەمىسىن بەرەدى دەپ ۇمىتتەنەمىز», – دەيدى ول. رەسەي دەلەگاتسياسىنىڭ باسشىسى ۇسىنىلعان جوبالاردى جۇزەگە اسىرۋ ءۇشىن جول كارتاسىن ازىرلەۋدى ۇسىندى. ال ازەربايجان جاستار ۇيىمدارىنىڭ ۇلتتىق كەڭەسىنىڭ ءتورايىمى م.مەدجيدوۆا جاستار كاسىپكەرلىگى مەن ەرىكتىلىك قىزمەتتى دامىتۋدىڭ تىڭ تەتىكتەرى, جاستار ۇيىمدارى مەن جوبالارىنىڭ وزەكتىلىگى جايلى وي ءوربىتتى. ونىڭ سوزىنشە, سوڭعى جىلدارى الەم جاستارىنىڭ بيزنەسكە دەگەن قۇلشىنىسى ارتقان. سوندىقتان ءار مەملەكەت جاستار ۇسىنعان ۇتىمدى جوبالارعا دەمەۋ كورسەتۋ قاجەت.
ودان بولەك قىرعىز رەسپۋبليكاسى ۇكىمەتى جانىنداعى جاستار ءىسى, دەنە شىنىقتىرۋ جانە سپورت جونىندەگى مەملەكەتتىك اگەنتتىگىنىڭ جاستار ساياساتى ءبولىمىنىڭ باس مامانى ا.اداماليەۆ, بەلارۋس رەسپۋبليكاسى ءبىلىم مينيسترلىگىنىڭ «بالالار مەن جاستاردىڭ كوركەم شىعارماشىلىعى ۇلتتىق ورتالىعى» رەسپۋبليكالىق جاستار ءبىلىم بەرۋ ورتالىعى مەكەمەسىنىڭ مەڭگەرۋشىسى د.تۋرونوك, وزبەكستاننىڭ بۇكىلالەمدىك جاستار قاۋىمداستىعىنىڭ توراعاسى م.الىمباەۆ, «ماسيس» «قازاقستاندىق ارميان قوعامى» رەسپۋبليكالىق قوعامدىق بىرلەستىگى توراعاسىنىڭ ورىنباسارى ا.ناۆاسارديان فورۋمدا قامتىلعان تاقىرىپتار توڭىرەگىندە ءوز ۇسىنىستارىن ورتاعا سالدى.
فورۋم قورىتىندىسى بويىنشا قاتىسۋشىلاردىڭ ۇسىنىستارى نەگىزىندە ءتيىستى ۇسىنىمدار قابىلداناتىن بولادى.
ارمان وكتيابر,
«ەگەمەن قازاقستان»
الماتى
