ءىس جۇزىندە ءبىزدىڭ ەل تۇركيالىق ينۆەستورلاردىڭ كوپتەپ كەلۋىنە مۇددەلى. ماسەلەن, قازىر قازاقستاننىڭ ەكسپورت كولەمى ۇلعايىپ كەلەدى. تۇركياعا 2017 جىلى 1 ملرد 145 ملن اقش دوللارىنىڭ ءونىمى ەكسپورتتالدى.
ەگەر يمپورتتى قارايتىن بولساق, 130 ملن اقش دوللارىنىڭ شاماسىندا بولسا دا, تۇركيادان تاسىعانىمىز شيكىزاتتىق ەمەس ونىمدەر ەمەس. ونىڭ ىشىندە ماشينا جابدىقتارى, قۇرالدار مەن قۇرىلعىلار, ماتانىڭ ۇلەسى باسىم. ەندى قازاقستاننىڭ الدىندا ەكسپورتتاعى شيكىزاتتىڭ ۇلەسىن ازايتىپ, وڭدەلگەن ءونىمدى ساتۋ مىندەتى تۇر.
وسىعان وراي, مەملەكەت باسشىسىنىڭ رەسمي ساپارى كەزىندە كوپتەگەن سالادا ىنتىماقتاستىقتى تەرەڭدەتە ءتۇسۋ ۇسىنىلدى. قازىر بايىپتاپ قارايتىن بولساق, تۇركيادا وڭدەۋ ونەركاسىبى جاقسى دامىعان. الەمدىك دەڭگەيدە جەڭىل ونەركاسىپتىڭ, قايتا وڭدەۋ ونەركاسىبىنىڭ دامۋى بويىنشا قىتاي الدىڭعى ورىندا تۇرسا, تۇركيا سودان كەيىنگى ورىنداردا ورنالاسقان.
مىنە, مەملەكەت باسشىسى وسى ماسەلەلەرگە نازار اۋدارىپ, تۇركيا كاسىپكەرلەرىن قازاقستانعا ينۆەستيتسيا سالۋعا شاقىردى. ونىڭ ىشىندە قايتا وڭدەۋ سالاسىنا ماڭىز بەرىلۋدە. ويتكەنى, ەلىمىزدە 2017 جىلى قابىلدانعان ەكسپورتتىق ستراتەگيا بويىنشا 2022 جىلعا دەيىن شيكىزات ەكسپورتىنان بىرتىندەپ ارىلىپ, وڭدەلگەن ءونىم ەكسپورتىن ۇلعايتۋ مىندەتى قويىلدى. وسى مەجەدەن شىعۋ ءۇشىن بىزگە تۇركيانىڭ كومەگى قاجەت.
ماديار كەنجەبولات,
ەكونوميكا عىلىمدارىنىڭ كانديداتى
